Старшыню сената Еўрапейскага гуманітарнага ўніверсітэта, які працуе ў Вільні прафесара дэпартамента гісторыі Паўла Церашковіча звольнілі з універсітэта. Загад за подпісам прарэктара Бернардаса Гайлюса аб датэрміновым скасаванні кантракта, тэрмін якога заканчваецца ў верасні 2014 года, Церашковіч атрымаў 5 лютага.
Нагадаем, у канцы студзеня рэктар ЕГУ Анатоль Міхайлаў адмовіў у працягу працоўнага кантракта Церашковічу. Сенат універсітэта выказаў прынцыповую нязгоду з гэтым рашэннем і звярнуўся да генеральнай асамблеі сузаснавальнікаў універсітэта і кіраўніцкага савета з просьбай адмяніць яго.
Каментуючы факт датэрміновага скасавання кантракта, Церашковіч сказаў, што расцэньвае гэта як «нервовы крок адміністрацыі, істэрычную рэакцыю на падзеі, што адбываюцца ва ўніверсітэце».
«Няма такога ў сусветнай практыцы, каб рэктар звальняў старшыню сената», –– сказаў прафесар. На думку Церашковіча, яго звальненне адбылося менавіта зараз, каб ён не мог узяць удзел у канферэнцыі донараў ЕГУ, якая павінна прайсці 18 лютага ў Вільнюсе. Бо скасаванне працоўнага дагавора, сказаў Церашковіч, азначае і ануляванне права на жыхарства ў Літве.
Прафесар таксама звярну ўвагу, што ў справаздачы Еўрапейскай камісіі асацыяцыі ўніверсітэтаў, якая праводзіла атэстацыю ЕГУ ў 2013 годзе, адзначаныя шэраг парушэнняў у сістэме менеджменту ўніверсітэта. У прыватнасці камісія заўважыла, што пазіцыя проваста (першага прарэктара), заснаваная ў снежні 2013 года, не прапісана ў статуце. Рэкамендавана змяніць склад кіраўніцкага савета ўніверсітэта, уключыўшы туды студэнтаў і прадстаўнікоў грамадзянскай супольнасці. «Заўвагі справаздачы, –– сказаў Церашковіч, –– супадаюць з тым, пра што гаворыць дэмакратычная платформа «За новы ЕГУ».
Церашковіч зазначыў, што кіраўніцкі савет універсітэта можа адмяніць рашэнне рэктара, на што ён і спадзяецца.
«Яшчэ ўчора я прымаў экзамен у ЕГУ, і ў мяне ўзнікла думка: а раптам гэта мой апошні экзамен? Калісьці мяне прымусілі пакінуць БДУ, у тым ліку з-за супрацоўніцтва з ЕГУ. Думаю, зараз мне вяртацца няма куды, у Беларусі працу ва ўніверсітэце я не знайду», –– сказаў прафесар.
У сярэдзіне студзеня ў ЕГУ зноў абвастрыўся канфлікт паміж адміністрацыяй і сенатам ВНУ, звязаны з правядзеннем рэформы прафесарска-выкладчыцкага складу ўніверсітэта. Адміністрацыя настойвае, што змены адбываюцца ў сувязі з наступнай акрэдытацыяй ВНУ для паляпшэння ўмоў працы выкладчыкаў і адпавядаюць нормам Мінадукацыі Літвы. У сваю чаргу прадстаўнікі дэмакратычнай платформы «За новы ЕГУ» заяўляюць, што пры абвяшчэнні конкурсу на замяшчэнне выкладчыцкіх пасадаў адміністрацыя ўніверсітэта наўпрост ўмяшалася ў дзейнасць сената і фактычна прысвоіла яго паўнамоцтвы.
Платформу «За новы ЕГУ», якая атрымала большасць на выбарах у сенат універсітэта 19 лістапада, стварыла група выкладчыкаў, нязгодных з «аўтарытарным стылем кіравання» адміністрацыі.
***
Еўрапейскі гуманітарны ўніверсітэт быў адкрыты ў Мінску ў 1992 годзе. У 2004 годзе беларускія ўлады, незадаволеныя самастойнасцю яго кіраўніцтва, закрылі ВНУ. У 2005 годзе ЕГУ аднавіў працу ў Вільні ў статусе беларускага ўніверсітэта ў выгнанні.
Каментары