Былога палітвязня з турмы на Акрэсціна вывезлі ў лячэбна-працоўны прафілакторый.
Васіль Парфянкоў, які разам з Уладзімірам Яроменкам быў асуджаны на 5 сутак арышту, павінен быў заўтра, а 12:00 выйсці на волю з турмы на Акрэсціна. Але перадачу для яго не прынялі, а ўзялі толькі для Яроменка.
Васіля адвезлі ў Першамайскі РУУС Мінска, а адтуль, паводле інфармацыі праваабаронцаў, яго павезлі ў лячэбна-працоўны прафілакторый (ЛПП).
Пакуль што гэта неафіцыйная інфармацыя, але, тым не менш, участковы міліцыянт паведаміў праваабаронцы Анастасіі Лойцы, што гэта дакладна.
На Васіля Парфянкова і Уладзіміра Яроменка былі заведзены крымінальныя справы «за парушэнне прэвентыўнага нагляду». Яроменак быў асуджаны на тры месяцы арышту і павінен адбываць пакаранне пасля разгляду касацыйнай скаргі.
На Парфянкова справа была заведзена яшчэ раней, але да гэтага часу яна не была перададзена ў суд. Па ўсёй бачнасці, яго вырашылі не асуджаць на максімальны па гэтым артыкуле тэрмін да шасці месяцаў, а адправіць на год у ЛПП.
Васіль Парфянкоў быў першым, каго асудзілі па справе аб падзеях 19 снежня 2010 года.
У лютым 2011 года суд Фрунзенскага раёна Мінска прызнаў яго вінаватым ва ўдзеле ў масавых беспарадках і прыгаварыў да чатырох гадоў пазбаўлення волі з адбываннем пакарання ў калоніі строгага рэжыму. Акрамя таго, Парфянкоў павінен быў выплаціць больш як 14 млн. рублёў за разбітае шкло дзвярэй у Доме ўрада падчас несанкцыянаванай акцыі апазіцыі. У жніўні 2011 года ён быў памілаваны ўказам Лукашэнкі.
5 студзеня 2012 года за Парфянковым устанавілі прафілактычны нагляд, а ў красавіку Следчы камітэт Першамайскага раёна Мінска распачаў у дачыненні да яго новую крымінальную справу — за парушэнне ўмоў прафілактычнага нагляду. У маі 2012 года суд Першамайскага раёна прызнаў Парфянкова вінаватым у парушэнні ўмоў прафілактычнага нагляду і прыгаварыў да шасці месяцаў арышту. У жніўні 2012 г. Парфянкова этапавалі ў арыштны дом у Баранавічы, дзе ён і адбываў пакаранне. Выйшаў на волю ў лютым 2013 г.
Цяпер чытаюць
Сям’ю з дзіцём не пусцілі есці ўнутры кавярні піцу навынас. «Гараж» апраўдваецца, інтэрнэт спрачаецца7
Сям’ю з дзіцём не пусцілі есці ўнутры кавярні піцу навынас. «Гараж» апраўдваецца, інтэрнэт спрачаецца
Беларускія абрады, арнаменты і беларуская мова паўсюль. Як нашчадак перасяленцаў зрабіў сяло каля Байкала зноў беларускім, і чаму гэта можа хутка скончыцца1313
Каментары