Чаму мужчын трыгерыць «жаночая піўная» і абанементы з улікам менструацыі? Пра што гавораць у шоу Ментусавай і Раецкай
Пакуль у краіне зверху прыдумалі Год беларускай жанчыны, беларускі рашылі расказаць, што іх насамрэч хвалюе. У эфір вярнулася шоу «Жанчыны цяжкіх паводзінаў». Кацярына Раецкая, Марына Ментусава і Настасся Карасёва зноў сабраліся разам, каб абмеркаваць розныя праблемы: ад агрэсіўных мужчынскіх каментарыяў у інтэрнэце да дэпрэсіі і гвалту. І што рабіць з мужчынамі, якія не плацяць аліменты.
Фармат новага сезона жаночага шоу просты: вядоўцы чытаюць ананімныя пытанні ад беларусак і адказваюць на іх.
Што насамрэч патрэбна беларускам у Год беларускай жанчыны
Пачынаюць з абвешчанага Лукашэнкам Года беларускай жанчыны.
Вядоўцы задаюцца простым пытаннем: што канкрэтна зрабілі ўлады для жанчын? Звольнілі адзіную жанчыну-міністарку, забаранілі аборты ў прыватных клініках, пакінулі за кратамі сотні палітзняволеных жанчын.
«Спачатку ты забіваеш болт на свой электарат, а жанчын — больш за палову насельніцтва. А потым пачынаеш разумець, што не проста так былі жаночыя маршы. Гэтыя заляцанні праз шэсць гадоў — гэта даволі забаўна. Але гэта лепш, чым Год рускай мовы, напрыклад», — кажа Кацярына Раецкая.
Размова хутка сыходзіць з узроўню лозунгаў на ўзровень базавых патрэбаў — закон пра хатні гвалт, вызваленне жанчын-палітвязняў.
«Хаця б каб дзяржава сказала: «Мы супраць гвалту». А не калі яны на ўсіх узроўнях за гвалт», — фармулюе Марына Ментусава.
Вядоўцы закранулі таксама тэму аліментаў і хто плаціць, калі мужчына знік з жыцця дзіцяці. У такой сітуацыі, разважаюць, мог бы дапамагчы аліментны фонд: дзяржава пакрывае выдаткі на дзіця, а ўжо потым сама выбівае грошы з даўжніка.
«Як дзяржава бегае за экстрэмістамі, адчайна і люта. Але яна магла б пераключыць свой фокус», — заўважае Кацярына Раецкая.
Чаму мужчын трыгерыць «жаночая піўная»
Гарачымі тэмамі для абмеркавання сталі адкрыццё піўной «толькі для жанчын» і ўвядзенне фітнэс-абанементаў з улікам менструальнага цыкла. У сацсетках гэтыя ініцыятывы выклікалі шквал агрэсіўных каментароў з боку мужчын.
На думку вядоўцаў, гэта прыклад таго, як у беларускім грамадстве ўспрымаюцца жаночыя межы, жаночае цела і само права жанчыны на асобную прастору, дзе можна пачуваць сябе бяспечна.
«Некаторыя мужчыны пачалі пісаць пра тое, што яны будуць спецыяльна прыходзіць да гэтай піўной і спрабаваць туды ці ўвайсці, ці падпільноўваць дзяўчат, якія адтуль будуць выходзіць, — кажа Марына Ментусава і дадае:
— Адна піўная толькі для жанчын, адна-адзіная. І мы не забіраем памяшканне ў мужчынскай піўной, ніхто вас не дыскрымінуе. Адваліце!»
Што да абанемента ў залу, то жанчыны хочуць, каб іх фізіялогію ўлічвалі.
«Паглядзіце ролікі пра мужчын, якія нібыта адчуваюць менструальны боль. Ім на пузіка клеяць дэтэктары, і яны нічога не могуць зрабіць, па доме ходзяць і стогнуць: «Я не магу нават руку падняць». А мы пры гэтым рэжымы звяргаем. Ну, ці амаль звяргаем. Робім усё тое ж самае, сцякаючы крывёй», — каментуе Марына Ментусава.
«Мужчынам стала нармальна параўноўваць жанчын з калекамі ці жывёламі праз коску, і ўсё таму, што ім не дазволілі падоўжыць абанемент на тыя ж пяць дзён», — кажа Раецкая.
Інвентарызацыя падтрымкі
Частка выпуску была прысвечана псіхалагічнаму стану.
Настасся Карасёва адкрыта распавяла пра свой досвед цяжкай дэпрэсіі, якую не вытрымалі нават яе тагачасныя адносіны. «Ну а ты доўга яшчэ будзеш у такім стане?» — такая рэакцыя, з якой даводзіцца сутыкацца з боку, здавалася б, блізкага чалавека.
«Мне здаецца, што я сама сабе больш за ўсіх дапамагла. Бо ніхто акрамя нас не дапаможа сабе лепш, чым мы самі», — заўважае Карасёва.
Разам з гэтым яна кажа і пра важнасць правільна падабраных антыдэпрэсантаў, і пра калег, якія ўвайшлі ў яе стан і разгрузілі яе на працы.
Ментусава ў адказ прапануе не абстрактную «любоў да сябе», а вельмі канкрэтны падыход — «інвентарызацыю падтрымкі»: сесці і выпісаць, хто і ў чым сапраўды можа быць табе апорай. Хто можа проста выслухаць, хто дапаможа па працы, хто дасць «пінок», а хто дазволіць табе быць слабай.
«Часам нам не трэба, каб нас штурхалі. Часам трэба, каб нам дазволілі пабыць «анучай» і прынялі нас у гэтым стане», — кажа Марына Ментусава.
Што далей
Галоўная місія абноўленага шоу — падсвятляць экспертныя жаночыя галасы. У планах вядоўцаў запрасіць да размовы не толькі палітычных лідарак, як Святлана Ціханоўская ці Марыя Калеснікава, але і экспертак з розных сфер. Гэта і Ганна Самарская (Women in Tech), і пісьменніца Ева Вежнавец, і спартсменка Аляксандра Герасіменя, і спявачка Ганна Шаркунова.
Каментары
Ўяўляю, які бы пікішавалі жанчыны, калі б адкрылі нейкае заведзенне, выключна для мужчын)
На жаль тое ці заканамерна, але абліччча сучаснага, даўно вырадзіўшагася, фемінізму (ідэялогіі, прама скажам, разлічанай не на найразумнейшых асоб) сёння цалкам вызначаецца левакамі.
Таму любыя яго ўвасабленні і знакі ў рэальным жыцці "трыгераць" мяне таксама.
Прыблізна так, як носьбіты вошаў не пераймаліся б іх вывядзеннем, а аб'яўлялі б гэта новай нормай, гуртаваліся б у суполкі і ладзілі б сходкі ў людных месцах. Альбо як дэманстрацыі пад чырвонымі флагамі. Ну, вы зразумелі.
Мо спачатку варта нешта зрабіць з жанчынамі што лічаць што дзеці абавязаныя жыці з мамай бо "гэта ж мама"? А бацька тут проста крыніца фінансавання хацелак мамы? Мо спачатку ўзаконіць пражыванне дзяцей 50 на 50 па змоўчванні?