25 krasavika ŭ Mahilovie pačaŭsia sudovy praces u spravie maładafrontaŭca Siaržuka Niahacina, abvinavačanaha ŭ raspaŭsiudzie drukavanych materyjałaŭ, jakija hańbiać dziaržaŭny ład, a taksama ŭ drobnym chulihanstvie i supracivie milicyjantam. Jaho zatrymali 23 krasavika ŭviečary: u chłopca parvaŭsia pakiet, ź jakoha pasypalisia na tratuar kala 300 asobnikaŭ roznych demakratyčnych hazet, što j pryciahnuła ŭvahu milicejskaha patrula.
Eks-deputat Siarhiej Skrabiec 25 krasavika nakiravaŭ u prakuraturu Biełarusi i staršyniu KDB zajavy «pra złačynstvy» — tak jon acaniŭ zajavy specsłužbaŭ pra zatrymku dvuch kurjeraŭ ź Litvy, jakija vieźli jamu 200 tys.dalaraŭ.
Ofis bieraściejskaj filii BSDP (NH) 26 krasavika naviedali milicyjanty z upraŭleńnia pa baraćbie z abaračeńniem narkotykaŭ. Narkotykaŭ nie znajšli, ale ŭziali niekalki asobnikaŭ vinšavalnych ulotak z nahody 1 traŭnia. Na kaardynatara ruchu «Vola narodu» pa Bieraściejščynie, aktyvista BSDP Ihara Masłoŭskaha skłali pratakoł za dziejańnie ad imia niezarehistravanaj arhanizacyi. Prezydyjum Vykanaŭčaha biuro maje namier nakiravać aficyjny list ministru ŭnutranych spraŭ, kab pryciahnuć da adkaznaści bieraściejskich milicyjantaŭ za pieravyšeńnie imi paŭnamoctvaŭ i parušeńnie zakanadaŭstva.
U Mahilovie 26 krasavika milicyjanty pieraškodzili pravieści Čarnobylskuju akcyju, preventyŭna zatrymaŭšy siabroŭ PBNF Ryhora Kostusieva i Źmitra Sałaŭjova, siabra BSDP Paŭła Vusava, siabra AHP Uładzimiera Šancava. Zatrymanych adpuścili praź niekalki hadzin, nie składajučy pratakołaŭ.
Studentku Aksanu Cimčanku j kiraŭnika arhanizacyi «Suzorje» Źmitra Šymanskaha zatrymali ŭ Bieraści 26 krasavika padčas akcyi «Śviečka pamiaci»: jany razdavali ŭlotki ź infarmacyjaj pra vyniki Čarnobylskaj katastrofy. Na dziaŭčynu skłali pratakoł za niezakonnaje raspaŭsiudžvańnie drukavanaj pradukcyi.
Haradzienskuju žurnalistku Irynu Čarniaŭku 26 krasavika vyklikali ŭ abłasnuju prakuraturu j prymusili dać tłumačeńni pa skarzie namieśnika ministra pa padatkach i zborach Vasila Kamienki. Jon ličyć, što žurnalistka ŭ artykule «Pravierki ŭ padatkovaj» («Narodnaja vola», 5 krasavika
2005 h.) raskryła tajamnicu papiaredniaha śledztva. Žurnalistka rastłumačyła, što karystałasia adkrytymi krynicami.
U Miensku padčas Čarnobylskaj akcyi 14-hadovamu školniku Daniłu Barysieviču, aktyvistu niezarehistravanaj arhanizacyi «Zubr», paškodzili źviazki na ruce.
27 krasavika asudžany ŭdzielniki Čarnobylskaj akcyi — hramadzianie Ŭkrainy: Andrej Bokač — na 15 sutak, Alaksandar Mašłaj, Andrej Hrymaluk i deputat Łuckaha harsavietu Ihar Huź — na 10 sutak kožny, Alaksiej Panasiuk — na 9 sutak. 10 sutak aryštu atrymaŭ karespandent časopisu «Russkij Newsweek» Alaksiej Amiotaŭ, 8 sutak — žurnalist hazety «Moskovskij komsomolec» Michaił Ramanaŭ. Na sudy da rasiejcaŭ i ŭkraincaŭ nie puskali dyplamataŭ, parušajučy hetym Vienskuju kanvencyju ab konsulskich adnosinach ad 1963 h. 30 krasavika paśla ŭmiašańnia rasiejskich dyplamataŭ asudžanyja hramadzianie Rasiei byli adpuščany i vyviezieny na radzimu.
«Maładafrontaŭcy» Kiryła Šymanovič i Aleh Hniedčyk atrymali 27 krasavika za Čarnobylskuju akcyju pa 10 sutak aryštu. Na stolki ž byŭ asudžany kiraŭnik BPS Siarhiej Vysocki, a taksama Mikita Dziadziuška i Anatol Biakasaŭ. Asudžanaha pa toj samaj spravie Siarhieja Lisičonka ŭ noč na 1 traŭnia dastavili sa specpryjomniku ŭ infekcyjnuju bolnicu.
Z aktyvistami Svabodnaha prafsajuzu metalistaŭ UP «Los» (h.Barań Aršanskaha rajonu) ślesarami Ryhoram Maksimienkam, Vadzimam Dziudziakovym i Michaiłam Voranavym 27 krasavika administracyja zavodu admoviłasia praciahvać kantrakt. Jany, u svaju čarhu, nakiravali kiraŭnictvu sustrečnyja zajavy z patrabavańniem skasavać kantrakt u suviazi ź nievykanańniem jaho administracyjaj: zarobki vypłačvajucca nia dvojčy ŭ miesiac, jak napisana ŭ kantrakcie, a tolki adzin raz. Pakolki administracyja admoviłasia płacić rabotnikam kampensacyi, jany padrychtavali zajavy ŭ sud.
Pieršy dopyt zatrymanaha Andreja Klimava adbyŭsia 27 krasavika. Klimaŭ admoviŭsia davać pakazańni, zajaviŭšy, što nie daviaraje śledčamu j ličyć dopyt biessensoŭnym. 29 krasavika Klimavu pradjavili abvinavačańnie za arhanizacyju akcyi 25 sakavika. Pavodle rašeńnia prakurora, jon zastaniecca za kratami sama mieniej da 22 červienia.
Palitźniavoleny Valer Levanieŭski, jak stała viadoma 28 krasavika, pačaŭ čytać lekcyi pa jurydyčnaj tematycy i pytańniach pravavoj dziejnaści viaźniam kalonii №22 u Ivacevickim rajonie, dzie adbyvaje pakarańnie.
Padčas raspaŭsiudu niezarehistravanaj hazety «Vybar» u Mahilevie 27 krasavika zatrymany aktyvisty «Zubra» Jaŭhien Suvoraŭ, Mikałaj Iljin i Hanna Pietrakievič — na ich skłali pratakoły za raspaŭsiudžvańnie drukavanaj pardukcyi biez vychodnych źviestak. Niepaŭnaletniuju Hannu Pietrakievič pastavili na ŭlik u inspekcyi pa spravach niepaŭnaletnich i praviali ź joj «prafilaktyčnuju hutarku».
28 krasavika blizkija zabitaj žurnalistki Vieraniki Čarkasavaj atrymali pastanovu mienskaj prakuratury ad 18 krasavika, zhodna ź jakoj ź jaje syna Antona Filimonava dy ajčyma Ŭładzimiera Mialeški źniatyja padazreńni «praz adsutnaść u ich dziejańniach składu złačynstva».
Syny Michaiła Maryniča 28 krasavika nakiravali ŭ prakuraturu Biełarusi skarhu na administracyju Aršanskaj kalonii: jany ličać, što tam ichniaha baćku sprabavali zabić i tamu naŭmysna nie davali jamu lekaŭ napiaredadni insultu.
U aktyvistki AHP Maryny Bahdanovič 28 krasavika apisali majomaść biez udziełu paniatych: jana asudžana na 150 bazavych vieličyń štrafu za akcyju 26 krasavika j na 200 b.v. za akcyju pradprymalnikaŭ 1 sakavika.
U padtrymku hazety «Borisovskije novosti» 28 krasavika aktyvisty «Zubra» vyviesili raściažku na moście nad šašoj Miensk—Maskva. Milicyjanty zatrymali na 15 chvilin žurnalista hazety Alaksandra Abramoviča, jaki fatahrafavaŭ padzieju. Sud nad redaktaram hazety Anatolem Bukasam pačaŭsia 29 krasavika: jaho vinavaciać u paklopie i abrazie redaktara hazety Barysaŭskaha harvykankamu «Adzinstva» Viery Pratasievič.
Administracyjnaja kamisija pry Navapołackim harvykankamie 28 krasavika razhladała spravu zatrymanaha padčas raspaŭsiudu studenckaha biuleteniu studenta Połackaha dziaržuniversytetu Aleha Viaževiča. Chłopca apraŭdali «praz adsutnaść składu pravaparušeńnia», a kanfiskavanyja asobniki pastanavili viarnuć uładalniku.
Mienskija haradzkija ŭłady admovili prafsajuzu REPAM u arhanizacyi 1 traŭnia šeścia pa praspekcie Skaryny j mitynhu na Kastryčnickaj płoščy. Aficyjnaj padstavaj dla admovy stała spaźnieńnie z zajaŭkaj: čynoŭniki harvykankamu kažuć, što jana pastupiła da ich 19 krasavika — mienš čym za 15 dzion da mierapryjemstva. Prafsajuznyja aktyvisty havorać, što padavali zajaŭku 15 krasavika.
U Homieli 1 traŭnia preventyŭna zatrymany 10 aktyvistaŭ moładzievych arhanizacyj, jakija mielisia razdavać minakam cukierki «Limonnyja» i «Limońnik». U zatrymanych adabrali partrety Łukašenki, kuplenyja ŭ kniharni, i adpuścili, nie składajučy pratakołaŭ.
1—2 traŭnia adbyłasia akcyja Biełaruskaj chryścijanskaj demakratyi — vinšavańnie na Vialikdzień. U śpisie vinšavańnia było 70 čałaviek — heta biełaruskaja elita, narodnyja piśmieńniki, paety, akademiki, navukoŭcy, palityki, kandydaty ŭ prezydenty, hramadzkija dziejačy. Sens akcyi — prezentacyja idej chryścijanskaj demakratyi. Siarod padarunkaŭ byli muzyčny dysk z chryścijanskimi śpievami, prahramka chryścijanskaj demakratyi. Zatrymańniaŭ nie było.
Kamientary