Uładzimier Kołas:

«Biełarusy pavinny navučycca mieć svaju ŭładu»

«NN»: Mnohija, kali im kažuć pra toje, što Kołas vyłučajecca kandydatam u prezydenty, pytajucca: «Jon heta surjozna?» Skažycie, Vy sapraŭdy całkam śviadoma ŭklučajeciesia ŭ prezydenckuju honku? Ci majecie Vy nastroj da pieramohi i vieru ŭ jaje, žadańnie pieramahčy?

Uładzimier Kołas: Asabista mnie čaściej davodziłasia čuć jakraz parady za heta ŭziacca. A nakont nastroju, žadańnia i da taho padobnaha, to, viedajecie, ja nie lublu patetyki. Ale hetuju prablemu treba vyrašać. Ad jaje zaležyć naš los. Ad jaje zaležyć budučynia maich dziaciej i maich vučniaŭ. I budučynia majoj krainy. My padychodzim da apošniaj miažy, za jakoj užo nie zastaniecca mahčymaści vyrašyć hetuju prablemu cyvilizavanym šlacham. Tamu ja staŭlusia da hetaj spravy surjozna.

«NN»: Kali i čamu Vy vyrašyli pajści ŭ vialikuju palityku?

UK: Dumać pačaŭ paśla 2001 hodu. Byŭ tady mocna ŭražany, jak tanna ŭsio było zdadziena. A jašče bolš — tym, što ludzi, u jakich ja vieryŭ i ad jakich čakaŭ kankretnaj spravy, navat nie pasprabavali jaje zrabić. Nu a paźniej palityka sama pryjšła da mianie.

«NN»: Ci zrobicca dla Vas palityka asnoŭnym zaniatkam, prynamsi, na najbližejšy čas?

UK: Tak, zrobicca.

«NN»: Apišycie, kali łaska, vaš dośvied kiraŭničaj pracy.

UK: Hety dośvied užo dastatkova apisany. Dumaju, nie było ŭ Biełarusi takoj spravy ci arhanizacyi, jakoj było pryśviečana bolš artykułaŭ u ajčynnaj i zamiežnaj presie, čym Biełaruskamu liceju. Chto miarkuje, što heta zdaryłasia vypadkova, ci samo pa sabie, toj pamylajecca. Darečy, doŭhi čas Licej pracavaŭ jak Respublikanski centar Ministerstva adukacyi — raspracoŭvaŭ źmiest adukacyi i navučalnyja prahramy, vydavaŭ knihi i padručniki, jakimi mahli karystacca ŭsie biełaruskija škoły, i mieŭ filii va ŭsich abłaściach Biełarusi.

Adnak chacieŭ by zaścierahčy tych, chto siońnia znoŭ pačynaje šukać dla biełarusaŭ «baćku», jaki budzie vučyć ich hulać u chakiej, pierabirać bulbu, puhaj hnać mieści vulicu i farbavać travu… Ci mieŭ, naprykład, Vacłaŭ Havał «dośvied kiraŭničaj pracy»? Ale čechi dali ź im rady, i niabłaha.

«NN»: Jakuju hałoŭnuju vysnovu Vy zrabili sa svajho ŭdziełu ŭ parlamenckaj vybarčaj kampanii?

UK: Što pieramahčy na vybarach — nia samaja ciažkaja prablema. Prablema — abaranić pieramohu.

«NN»: Ci majecie Vy pieradvybarnuju prahramu? Jakija hałoŭnyja punkty jana maje i čamu? Kali možna vyłučyć stryžniovuju ideju vašaj budučaj palityki, što heta za ideja?

UK: Prahramu, naturalna, maju. Dziesiać apošnich hadoŭ my praciahvajem vypracoŭvać jašče beeseseraŭski resurs — ź planami i zadačami, pastaŭlenymi jašče pry Mašeravie, z adpaviednaj strukturaj ułady. Ale śviet źmianiŭsia, i naša kraina niby vypała sa svajho času. Ciapierašniaje kiraŭnictva, jakoje sieła na beeseseraŭskaha kańka, nia choča i nia moža raźvitacca ź im, bo nia viedaje, jak heta zrabić. Pavinna pryjści novaja farmacyja palitykaŭ, jakaja viernie Biełaruś z paralelnaha vymiareńnia ŭ realny čas i zrobić jaje nie pieradavoj savieckaj respublikaj, a pieradavoj eŭrapiejskaj krainaj. Prosty biełarus nie pavinien žyć horš za niemca ci francuza.

Hałoŭnaja meta majoj prahramy — biełarusy pavinny navučycca mieć svaju ŭładu. My nadta doŭha žyli pry čužoj, a časam i varožaj uładzie, jakaja zaŭsiody nam chłusiła, nikoli pa-sapraŭdnamu nia dbała pra našy intaresy, ad jakoj treba było chavacca, da jakoj treba było prystasoŭvacca, ale spadziavacca tolki na siabie. Mnohija prosta nia vierać u isnavańnie inšaj, svajoj ułady, jakaja budzie dapamahać, a nie pieraškadžać nam žyć. Ale niedarečna dumać, što takaja ŭłada moža ŭstalavacca raptoŭna, u vyniku niekalkich «mudrych» ukazaŭ prezydenta. Maja prahrama praduhledžvaje paetapnaje pieraraźmierkavańnie ŭłady, pieradaču realnych paŭnamoctvaŭ miascovym orhanam samakiravańnia, padzieł ułady pamiž parlamentam, Radaj ministraŭ i prezydentam, sudom pa miery taho, jak usie ŭdzielniki hetaha pracesu buduć hatovyja da čarhovaha etapu.

Inakš kažučy, nijakich revalucyj i ziemlatrusaŭ ja nie planuju. My — usie razam — pastupova i asensavana piarojdziem ad ciapierašniaj prymityŭnaj systemy ŭłady da sučasnaj madeli, u jakoj buduć pradstaŭlenyja intaresy ŭsiaho hramadstva.

Poŭny varyjant čytajcie ŭ papiarovaj i pdf-versii hazety "Naša Niva"

Hutaryŭ Aleś Kudrycki

• 0
• 0
• 0
• 0
• 0
• 0
• 0
• 0