2004. Akudovič i Razanaŭ
Valancin Akudovič 2 lutaha 2004 hodu vydaŭ knižku «Razburyć Paryž». Radujusia, kali niechta niešta vydaje na tutejšaj movie, jašče bolšaja radaść achoplivaje, kali vydadzienaje pa biełarusku čytajecca i abmiarkoŭvajecca. Valancin naležyć da tych vydavalščykaŭ biełtekstaŭ, kaho nie abminaje čytacki rezanans. Pra Valancina havorać, spračajucca, jaho cytujuć. Akudovič jość, i jon — žyvy. Kab adbycca i być, Akudovič zrabiŭ paradaksalny chod, napisaŭšy pracu «Mianie niama». Kab zastavacca žyvym, jon uvieś čas havoryć pra śmierć: «Litaratura — heta vieličny sarkafah z mumijami žyćcia, a kožny litaratar — najpierš mumifikatar. Tamu kali našyja vusny varušacca nad tekstami Hamera, Džojsa ci Alesia Razanava, heta jany varušacca ad pacałunkaŭ niabožčykaŭ (u apošnim vypadku jašče nie zusim astyłych)…» Kali pra stvaralnikaŭ Adyseja z Ulisam i možna tak skazanuć, dyk pra žyvoha Razanava niamožna. Pamiž śvietam žyvych i śvietam miortvych jość miaža, dakładnaja i vyraznaja. Na mohiłkach jaje paznačajuć dataj. 2.02.2004 Aleś Razanaŭ byŭ žyvy, heta dakładny fakt, pra jaki viedaŭ i Valancin. U pryrodzie nie isnuje kryšku miortvych i troški ciažarnych. Tamu ja nie prymaju paraŭnańniaŭ litaratury z sarkafaham i litaratara z mumifikataram ci jakim taksydermistam. Stvaralniki ptušynych pudziłaŭ i čałaviekaabrysnych mumij naležać da kasty navukoŭcaŭ, a nie da cechu litarataraŭ; prynamsi, tak było da 2.02.2004.
Napisana 10.11.2004, 16:45.
Poŭny varyjant čytajcie ŭ papiarovaj i pdf-versii hazety "Naša Niva"
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary