Kałasy pad siarpom

Ułady zvalniajuć dyrektaraŭ biełaruskamoŭnych škołaŭ adnaho za druhim.

Kaniec navučalnaha hodu prynios skrušnyja naviny nia tolki ŭ Biełaruski licej. Pry kancy traŭnia, pierad vypusknymi, adpravili na pensiju dyrektarku Biełaruskaj słavianskaj himnazii (byłoj škoły №36) Homielu Tacianu Cyhanok. Z dyrektaram mienskaj škoły №2 (u Sierabrancy), vice-prezydentam Tavarystva biełaruskaj škoły Alaksandram Siadziakam, abyšlisia bolš kulturna. Jon budzie zvolnieny paśla ispytaŭ — z 30 červienia, kali ŭ jaho skončycca termin kantraktu. Farmalna «orhany adukacyi» majuć takoje prava — nie praciahvać kantraktu i nie tłumačyć pryčyn takoha ŭčynku. Adnak varta zadumacca, što A.Siadziaka kiravaŭ škołaj z 1994 h. i dahetul da jaho pretenzijaŭ nie było. Moža, pryčyna ŭ tym, što jon, jak i Ŭładzimier Kołas, sprabavaŭ biez administracyjnaha dazvołu ŭdzielničać uviesnu ŭ miascovych vybarach. Naturalna, što A.Siadziaku, jak i jahonaha kalehu ź liceju, nie zarehistravali navat kandydatam.

Sytuacyja ŭ licei zastajecca tryvožnaj. Hvałtam pastaŭlenuju dyrektarku adklikali na «padvyšeńnie kvalifikacyi», adnak nie nazaŭždy. Heta stała viadoma na naradzie, jakuju 6 červienia z udziełam U.Kołasa, Lavona Barščeŭskaha dy Iryny Sidarenki pravioŭ namieśnik ministra adukacyi Kazimier Faryna. Na dumku ministerstva, U.Kołas nia moža być kiraŭnikom liceju. Mierkavańnie ž pedkalektyvu roźnicca na 180 hradusaŭ.

Ułady «cisnuć» na ŭstanovu i roznymi pravierkami. 5 červienia tut była pravierka z sanepidemstancyi, 10 červienia pačałasia finansavaja pravierka, śledam za joj Minadukacyi raspačało kompleksnuju pravierku dziejnaści liceju.

U svoj čarod baćki liceistaŭ padali zajaŭki na pikietavańnie: pikiety majuć adbyvacca štodnia z 19 da 26 červienia. Na ahulnym schodzie 6 červienia byli pryniatyja zvaroty da kiraŭnika Administracyi prezydenta Ŭrała Łatypava i ŭłasna da Alaksandra Łukašenki.

Kiraŭnictva liceju hatovaje da vychadu navučalnaj ustanovy z-pad dziaržaŭnaj «strachi». «My pačynali jak niadzielnaja škołka, arhanizavanaja ź inicyjatyvy supołki TBM Savieckaha rajonu Miensku, i tolki paźniej pierajšli ŭ strukturu Minadukacyi. My možam znoŭ viarnucca ŭ status niedziaržaŭnaj ustanovy», — zaznačyŭ U.Kołas na ahulnym schodzie 6 červienia. Hetaje mierkavańnie było vykazanaje kiraŭnikom liceju i 9 červienia ŭ adkrytym liście da Alaksandra Łukašenki.

Dla baćkoŭ liceistaŭ hety krok pedkalektyvu — takaja samaja niespadziavanka, jak i dla kiraŭnictva Minadukacyi. Jasnaja reč, što za navučańnie dziaciej u niedziaržaŭnaj ustanovie daviadziecca płacić. Mnohija zadumvajucca pra toje, ci dazvolać im srodki vučyć dzicia ŭ niedziaržaŭnym licei. «Viadoma, tolki baćkoŭskich hrošaj na dziejnaść liceju nia chopić, tamu my šukajem fundataraŭ», — zaznačaje nahody U.Kołas. Pavodle jahonych słovaŭ, adpaviednyja pieramovy ciapier viaducca.

Arkadź Šanski

• 0
• 0
• 0
• 0
• 0
• 0
• 0
• 0