Palavańnie na pakiemonaŭ. U Brytanii masava rabujuć kramy, jakija handlujuć kartkami z kazačnymi istotami

U Anhlii za niekalki tydniaŭ abrabavali adrazu niekalki kramaŭ, jakija handlujuć hetymi kartkami. Straty — dziasiatki tysiač jeŭra, piša Bi-bi-si.

Adnoj z apošnich achviar staŭ mahazin Celestial Collectables u horadzie Uorynhtan u hrafstvie Češyr. Da hetaha rabaŭniki naviedali mahaziny ŭ Brystali, Notynhiemie, Rehbi, Bornmucie, Piterbora i inšych miescach.

Kartačnaj hulni Pokemon TCG sioleta, uvosień, spoŭnicca 30 hadoŭ. Redkija i kaštoŭnyja kartki ź jaje kalekcyjaniery źbirajuć i abmieńvajuć užo daŭno, ale z časoŭ kavidu ich papularnaść u internecie vielmi vyrasła, i ź joj vyraśli i ceny.

Miljonnyja aktyvy

Na niadaŭnim aŭkcyjonie, jaki pravodziŭ śpiecyjalizavany aŭkcyjonny dom Stanley Gibbons Baldwins, byli pradadzieny «aktyvy ŭ paokiemonach» na paŭtara miljona funtaŭ (bolš za dva miljony dołaraŭ).

Bolšaść kartak kaštujuć niašmat, ale ceny samych redkich, padšturchnutyja popytam z boku i kalekcyjanieraŭ, i prosta inviestaraŭ, paimknulisia ŭvierch.

U lutym videabłohier, restler i baksior Łohan Poł pradaŭ z aŭkcyjonu zvyšredkuju vysakajakasnuju kartku z pokiemonam Pikaču za rekordnyja 16,5 młn dalaraŭ.

Na kartki z pakiemonami, jakija padaraželi, źviarnuli ŭvahu i złačyncy.

«Niekatoryja z hetych złodziejaŭ navat nie viedajuć, što mienavita jany kraduć», — kaža ekśpiert pa kartkach z Stanley Gibbons Baldwins Roj Raftery.

Jon sam pasiaredničaŭ u prodažach kartak-pakiemonaŭ na ahulnuju sumu bolš za dva miljony funtaŭ. Adna ź ich syšła za 955 tysiač jeŭra, druhaja — za 510 tysiač, jašče adna — za 96 tysiačy.

«Złodziei viedajuć, što paokiemony — heta dobry kuš, što pokiemonaŭ ciapier varta brać. Jany ličać, što heta lohkaja zdabyča, heta lahčej, čym abrabavać bank ci juvielirnuju kramu», — kaža Raftery.

U siaredzinie krasavika palicyja hrafstva Uiłtšyr zajaviła, što čarhovaj achviaraj takich rabaŭnikoŭ staŭ mahazin u horadzie Troŭbrydž.

Uładalnik mahazina Celestial Collectables va Uorynhtonie Krys Hrandzi raskazvaje, što jaho mahazin abrabavali ŭ ličanyja chviliny.

«Jany padjechali na furhonie, švabrami padniali videakamiery ŭvierch, raźbili škło dźviarej. I potym praktyčna za čatyry chviliny ačyścili ŭvieś mahazin», — kaža Hrandzi.

Chvala rabavańniaŭ

Pra toje, što jon staŭ čarhovaj achviaraj palaŭničych za kartkami z pakiemonami, Hrandzi daviedaŭsia ad svajho klijenta, jaki patelefanavaŭ pozna ŭviečary i paviedamiŭ, što ŭ mahazinie raźbita škło.

«Dobra choć, što najaŭnyja i samyja kaštoŭnyja rečy zachoŭvajucca ŭ siejfie, — kaža Hrandzi. — Jany ŭziali ŭ asnoŭnym karty z aficyjnaj katehoryjaj [kaštoŭnaści], kuču asobnych kart i kuču zapiačatanych kałod. Kalekcyjnyja kałody koštam ad 46 da 345 jeŭra».

U sumie, pavodle acenki Hrandzi, rabaŭniki vynieśli tavaru na 70 tysiač jeŭra.

Jon cudoŭna viedaje, što jaho Celestial Collectables — nie adziny mahazin, jaki abrabavali dziela kartak z pakiemonami.

Z mahazina Trove UK u Bornmucie vynieśli kartak na 35 tysiač jeŭra.

Z mahazina Full Fire TCG u Hłostery — na 29 tysiač jeŭra.

Jašče adzin handlar, ź Piterbora, pazbaviŭsia tavaru na 95 tysiač.

Inśpiektar Liam Kinan z palicyi hrafstva Češyr skazaŭ Bi-bi-si, što ŭ ich hrafstvie Celestial Collectables pakul — adzinaja achviara padobnych rabavańniaŭ, ale jon z kalehami viedaje pra takija vypadki ŭ inšych hrafstvach i pracuje ŭ kantakcie z tamtejšaj palicyjaj.

• 0
• 0
• 0
• 4
• 0
• 0
• 0
• 0