Palavod kałhasa «Čyrvony bajec» z mahiloŭskaha Kiraŭska pierasieŭ ź siejałki na tank, a potym — na bajavy mapied. I pajechaŭ šturmavać Zaparožža
Stała viadoma pra jašče adnaho biełarusa, jaki zahinuŭ u rasijskim miasnym šturmie. Heta 51‑hadovy Mikałaj Habruś sa Starcaŭ (Kiraŭska). Spačatku jon byŭ tankavym miechanikam u bataljonie, ale kali praź miesiac bataljon staŭ rotaj, pryjšłosia i Habrusiu iści ŭ šturm. Vynik bieź niečakanaściaŭ.
Na zaparožskim kirunku ŭkrainskija ŭzbrojenyja siły źniščyli jašče adnaho biełaruskaha džentlmiena ŭdačy, jaki zamiest raźmieranaha žyćcia na radzimie zrabiŭ staŭku na chutkija hrošy ad Pucina.
Havorka pra ŭradženca Starcaŭ (Kiraŭska) Mahiloŭskaj vobłaści Mikałaja Habrusia.
Mikałaj naradziŭsia ŭ 1974 hodzie. Pa infarmacyi z baz Belpol — nie sudzimy. Z zapisanych miescaŭ pracy — pasada palavoda ŭ haspadarcy «Čyrvony bajec» Kiraŭskaha rajona.
Ale navat biez kryminalnaha minułaha maralny kompas Habrusia akazaŭsia źbity, i ŭ 2025‑m hodzie jon naniaŭsia vajavać na baku Rasii ŭ jaje złačynnaj vajnie suprać Ukrainy.
Jak čałaviek z ekśpiertnym viedańniem techniki Habruś trapiŭ u tankavy bataljon 136 bryhady v/č 64454 (z 2024 — «Apšeronskaja», stacyjanarnaja dysłakacyja — Apšeronsk, Dahiestan).
Da svajho adjezdu na vajnu ŭ sakaviku 2025‑ha Habruś zastrachavaŭ u Rasii svajo žyćcio, paznačyŭšy adrasam pražyvańnia Ryžskuju šašu ŭ horadzie Vałakałamsku Maskoŭskaj vobłaści.
Ale doŭha absłuhoŭvać tanki Habrusiu nie pryjšłosia. Ź infarmacyi ad jahonych sasłužyŭcaŭ viadoma, što ciaham viesnavoj kampanii tankavy bataljon Habrusia ŭcisnuŭsia da roty. Adpaviedna, i jaho — u mai 2025‑ha — ź miechanikaŭ pieraviali ŭ šturmaviki. Vydali matacykł, aŭtamat z aptyčnym prycełam i adpravili šturmavać ukrainskija pazicyi na Zaparožžy.
Imavierna, «Naša Niva» znajšła navat momant rasstrełu Habrusia ŭkrainskimi abaroncami padčas jaho pieršaha i apošniaha šturmu, ale my nie budziem dałučać videa z etyčnych mierkavańniaŭ.
Habruś staŭ čarhovym zahinułym biełarusam z pazyŭnym «Biełarus».
Apošni apublikavany im kantent — videa z abstalavanaha akopa, u jakim niekalki čałaviek niemaładoha ŭzrostu ŭ dobrym humory siadziać za stałom i padbadziorvajuć adzin adnaho, vypivajučy minierałku.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam25
Kamientary