Z usioj krainy

Z usioj krainy

Padarunki ad Zavalniuka

Staršynia kałhasu “Savieckaja Biełaruś” Vacłaŭ Mackievič pryvioz ź Miensku 140 padarunkaŭ dla dzietak svaich adnaviaskoŭcaŭ. Lalki, sšytki, elektronnyja hulni, a taksama myła j zubnuju pastu pieradaŭ dla smurhonskich małych ad ich amerykanskich adnahodkaŭ ksiondz Uładzisłaŭ Zavalniuk. Darosłym ajciec Uładzisłaŭ dasłaŭ nasieńnie morkvy, kapusty, burakoŭ, pamidoraŭ. Viadoma, biaspłatnaje.

Kvietki Tadevušu

Zazvyčaj maładyja, što biaruć šlub, uskładajuć kvietki da Pierapravy — pomnika, pastaŭlenaha paśla druhoj suśvietnaj. Ale smurhonski chłopiec Juraś Rurak i jahonaja naračonaja Natalla, nasupierak tradycyi, pajechali da “kamienia Kaściuški”, što ŭ miastečku Zaleśsie — kolišnim majontku Ahinskich, bo tam paznajomilisia.

Brakańjery adkryli sezon

Try mienčuki pryjechali na Računskaje vadaschovišča “rybki pałavić”, prychapiŭšy palaŭničyja strelby. Zabili 2 kačak i 3 biełych lebiedziaŭ. Škodu ŭ laśnictvie aceńvajuć u 1130 tys. rub. Zatrymany pakul tolki adzin brakańjer, 1977 h.n. Uzbudžanaja kryminalnaja sprava.

Tancy daražejuć

Na Smurhonščynie padaraželi dyskateki. Ciapier, kab patančyć u sielskim klubie, treba zapłacić 500 rubloŭ, u centralnych DK (ich u rajonie 10) tancy kaštujuć 800 rubloŭ, a ŭ Smurhonskim haradzkim domie kultury — 1000 rubloŭ (raniej było 600). Ceny ŭźnialisia, bo patrebnyja hrošy na ramont tancplacovak.

Saŭčanka niezadavoleny

U Smurhoni pryjaždžaŭ staršynia Haradzienskaha abłvykankamu Ŭładzimier Saŭčanka. Bolš za ŭsio jaho cikaviła padrychtoŭka da pasiaŭnoj. Uhniaviła načalnika toje, što 50% haspadarak rajonu nia majuć fosfarnych uhnajeńniaŭ, a na žyviołahadoŭčych kompleksach samaje nizkaje siaredniasutačnaje prybaŭleńnie ŭ vazie i najbolšy raschod kormu. Samym słabym haspadarkam Saŭčanka paabiacaŭ dapamahčy: kałhasu imia Nieŭskaha vydzielić traktar, a kałhasu imia Dziaržynskaha — kambajn.

Ściahi niezaležnaści

Užo druhi hod zapar nieviadomyja patryjoty svojeasabliva adznačajuć Dzień Voli ŭ Smurhoniach. Ranicaj 25 sakavika jany raskidali pa drevach, što ŭ centry horadu, bieł-čyrvona-biełyja ściažki. Na žal, amal nichto nie źviarnuŭ uvahi na ściažki, što zabłytalisia ŭ halinkach.

Taciana Skarynkina, Smurhoni

Tajamničy virus

U Mahilovie vyjaŭleny virus nieviadomaha pachodžańnia. Paciarpieli bolš za 250 čałaviek, bolšaść ź jakich — dzieci. U Ministerstvie achovy zdaroŭja kažuć, što pryčyna infekcyi kančatkova jašče nia vyznačanaja. Chutčej za ŭsio, krynicaj zachvorvańnia stałasia sadavina ci harodnina, u jakoj znachodziŭsia virus nieviadomaha pachodžańnia. Takich uspyšak virusnaj infekcyi na terytoryi Biełarusi raniej nie było.

Pakroŭski

Barany nia projduć

Baranavicki rajvykankam, stvarajučy hierb rajonu, źviarnuŭsia ŭ biełaruskuju Hieraldyčnuju słužbu. Tam prapanavali ščyt z 4 hałovami baranoŭ. U rajvykankamie, adnak, paličyli baranoŭ nieprymalnymi i zahadali miascovaj architekturnaj słužbie terminova raspracavać hierb, jaki b mieŭ bolš šlachietny vyhlad.

Rusłan Raviaka, Baranavičy

Dalary ŭ prezervatyvie

Na bieraściejskaj mytni ŭ ciahniku “Maskva-Berlin” zatrymali rasiejca, jaki sprabavaŭ pravieźci praź miažu zvyš 31 tys. dalaraŭ, schavaŭšy ich pad štanami ŭ prezervatyvie. Suprać jaho ŭzbudžanaja kryminalnaja sprava.

Nasieńnie ružaŭ

Z nadychodam viasny vuličnyja handlary pačali pradavać tannyja pakunački z roznym nasieńniem. Siarod ich časam sustrakajucca j padrobki. Tak, adna haspadynia-bieraściejka nabyła nasieńnie ružaŭ, choć ružy zaŭždy sadziać flansami.

Ciomnyja za 60, śvietłyja za 40

U ružanskich punktach pryjomu škłatary nieviadoma čamu za ciomnyja piŭnyja butelki dajuć pa 60 rubloŭ, a za śvietłyja — pa 40.

Chočuć pravasłaŭnuju himnaziju

U Bieraści z błasłavieńnia ŭładyki Safronija, hałavy Bieraściejska-Kobrynskaje japarchii, pačaŭsia zbor podpisaŭ za budaŭnictva ŭ horadzie pravasłaŭnaj himnazii. Chto padpisvajecca, a chto j nie.

I.Chviedarovič, Bieraście

Byvaj, zbroja

Idzie rasfarmavańnie 1146-ha hvardziejskaha zenitna-rakietnaha pałka, jaki z 1956 h. stajaŭ u Voršy dy achoŭvaŭ bujny vajskovy aeradrom u Bałbasavie. Paśla vyvadu avijapałka stratehičnych bambavalnikaŭ u Rasieju patreba ŭ rakietčykach źnikła. Ciapier užo nia budzie dla miascovych chłopcaŭ chalaŭnaj słužby pad bokam u baćkoŭ, a aficeram daviadziecca pracaŭładkoŭvacca. Rasfarmavanaja i bryhada mabilnych siłaŭ, što stajała ŭ Baravusie. Niazvolnienych aficeraŭ pieraviali ŭ desantnyja čaści Viciebsku j Bieraścia.

Viktar Lutynski, Vorša

Asudžanyja milicyjanty

26 sakavika sudździa Kastryčnickaha rajonu Miensku Marharyta Ryštoŭskaja pakarała pazbaŭleńniem voli piacioch milicyjantaŭ z RUUS Pieršamajskaha rajonu. Supracoŭniki kryminalnaha vyšuku Uładzimier Kramsajeŭ, Siarhiej Burdyka, Aleh Dančanka, Alaksandar Jerafiejeŭ i były ŭčastkovy Mikałaj Lipski pryznanyja vinavatymi va ŭžyvańni fizyčnaha ŭździejańnia da padazronych i atrymali, adpaviedna, 6, 4,5, 3 (z adterminoŭkaj), 3 (hetaksama) i 4,5 hodu pazbaŭleńnia voli. Sud kvalifikavaŭ ichnyja dziejańni jak pieravyšeńnie ŭłady ci słužbovych paŭnamoctvaŭ i prymianiŭ da ich č.2 art.167 KK 1960 h. Aprača taho, Kramsajeŭ pryznany vinavatym u złoŭžyvańni ŭładaj i słužbovym stanoviščam (art.424 č.1 KK 1999 h.), a Mikałaj Lipski — u złačynstvach, praduhledžanych art.205, č.1 (kradziež) i art.210, č.2 KK Biełarusi 1999 h. Pa art.295, č.2 KK 1999 h. Lipski apraŭdany ŭ suviazi ź niedakazanaściu viny. 5 hod asudžanyja nia zmohuć pracavać u pravaachoŭnych orhanach.

B.T.

z usich staron

Narkaman z zenitkaj

U Rasiei ŭ Pieciarburhu supracoŭniki transpartnaj milicyi kanfiskavali ŭ 26-hadovaha narkamana, zatrymanaha ŭ padjeździe svajho domu, zenitnuju ŭstanoŭku “Ihołka”, prydatnuju dla stralby. Narkaman kaža, što znajšoŭ jaje na vajennym palihonie kala stancyi Alaksandraŭskaja, doŭha chavaŭ na leciščy, a potym pryvioz u horad — pakazać siabram.

Niebiaśpieka pralacieła mima

Kaśmičny abjekt dyjametram bolš za 70 m prajšoŭ na vielmi małoj adlehłaści ad Ziamli — 461 tys. km (dla paraŭnańnia: radyjus miesiacavaj arbity składaje 384 tys. km). Asteroid ruchaŭsia z boku Sonca i byŭ vyjaŭleny, tolki kali pačaŭ addalacca ad Ziamli. U vypadku sutyknieńnia z našaj planetaj jon vyklikaŭ by razbureńni, ekvivalentnyja vybuchu jadravaj bomby mahutnaściu 4 mehatony — h.zn. bolšyja, čym Tunhuski metearyt.

Bolš za 10 tysiačaŭ zabitych i paranienych

Z pačatku kontraterarystyčnaj aperacyi na Paŭnočnym Kaŭkazie ŭ žniŭni 1999 h. federalnyja siły stracili zabitymi 3220 vajskoŭcaŭ, paranienymi — 8972. Hetyja ličby tyčacca tolki asabovaha składu Minabarony i ŭnutranych vojskaŭ Rasiei.

Pavodle Internetu