Kinaklasyka na teleekranie. Sacyjalnaja drama Sidni Połaka «Zahnanych koniej prystrelvajuć, ci nia tak?» i prypavieść Rabera Bresona «Łancelot Aziorny».
BT, 21.40
Zahnanych koniej prystrelvajuć, ci nia tak? (They Shoot Horses, Don't They?)
ZŠA, 1969, kalarovy, 120 chv.
Režyser: Sidni Połak
Roli vykonvajuć: Džejn Fonda, Hih Janh, Śjuzan Jork, Red Batanz, Boni Biedelija, Brus Dern
Žanr: Drama
Pryzy: «Oskar» i «Załaty hlobus» aktoru Hihu Janhu za najlepšuju druhaplannuju rolu, premija «Bafta» aktrysie Śjuzan Jork i šče 2 uznaharody j 6 naminacyj.
Vialikaja depresija. Małady kaŭboj i sivy marak, ciažarnaja žančyna j stomleny fermier, cyničnaja dziaŭčyna bieź minułaha i staraja aktrysa biez pryšłaha… Usie jany pryjechali na tancavalny maraton u spadzievie atrymać pryz 1500 dalaraŭ. Jany buduć tančyć da apošniaha, jak zahnanyja koni, na apošnim uzdychu, hublajučy apošnija siły j pačućcio realnaści.
Ale zahnanych koniej prystrelvajuć… I ci zdolnyja pieramožcy žyć dalej?
Klasyčnaja drama Sidni Połaka, jakaja zrabiła jaho režyseram pieršaj vieličyni.
Ład, 22.50
Lancelot Aziorny (Lancelot du Lac)
Francyja – Italija, 1974, kalarovy, 85 chv.
Režyser: Raber Breson
Roli vykonvajuć: Luk Sajman, Łaŭra Kandaminas, Umberta Bałsan, Uładzimier Antolek-Aresek, Patryk Bernhard, Čarlz Bałsan
Žanr: Historyka-pryhodnickaja prypavieść
Adznaka: 7 (z 10)
Režyser Raber Breson – adzin z sama značnych kinatvorcaŭ, stvaralnik unikalnaj i askietyčnaj ekrannaj movy, jakaja śviedčyć pra transcendentnaje. Zvarot da kaściumnaj lehiendy niečakany dla režysera, ale j hetaje teatralnaje vidovišča Breson nasyčaje maralnym ryharyzmam i relihijnaj bieskampramisnaściu.
Karciny Bresona nadzvyčaj redkija hości na teleekranach, a što da «Lancelota Aziornaha», dyk jon kiepska viadomy nat kinamanam.
Francuskija stužki telekanał «Ład» zvyčajna dublažuje na biełaruskuju movu.
Kamientary