Hienieralnaja prakuratura i Śledčy kamitet Biełarusi pravodziać razhlad pa fakcie samahubstva padpałkoŭnika KDB Alaksandra Kazaka.
Pra heta Interfaksu paviedamili ŭ Śledčym kamitecie.
«Z ulikam nieabjektyŭnaj infarmacyi pa hetym fakcie, jakaja źjaviłasia ŭ sietcy Internet i vyklikała masu čutak i zdahadak, da zakančeńnia razhladu inšaja infarmacyja pradstaŭlena nie budzie»,— padkreślili ŭ SK.
2 listapada Radyjo Svaboda napisała pra toje, što Alaksandra Kazaka znajšli miortvym u lesie. Heta paćvierdzili siabry kaapieratyvu indyvidualnych zabudoŭščykaŭ «Piejzaž», jaki znachodzicca niepadalok ad Ždanovičaŭ. Kazaka pachavali na mohiłkach u Tarasavie.
Jašče 1 listapada ŭ KDB nie paćviardžali infarmacyju pra śmierć Kazaka.
U SK taksama tady kazali, što kryminalnuju spravu nie zavodzili. «Kryminalnaj spravy pa fakcie zabojstva čałavieka, jakoha vy nazyvali, Śledčym kamitetam nie raspačynałasia. Ja bačyła hety infarmacyjny patok. Ale dakładna, kryminalnaj spravy ŭ nas niama», — zajaviła tady pradstaŭnica SK Jula Hančarova.
9 listapada Alaksandr Łukašenka pravioŭ naradu, na jakoj abmiarkoŭvałasia dziejnaść KDB. Pa vynikach narady dziaržaŭny sakratar Rady biaśpieki Biełarusi Leanid Malcaŭ adznačyŭ, što ŭ svaich vystupach hienprakuror i staršynia Śledčaha kamiteta pastavili šerah pytańniaŭ. U pryvatnaści, jany tyčylisia apošnich padziej, źviazanych z KDB.
«Usim viadoma pra samahubstva padpałkoŭnika KDB Alaksandra Kazaka. Jość i šerah inšych pytańniaŭ, jakija patrabujuć ŭvažlivaha rasśledavańnia», — zajaviŭ Leanid Malcaŭ.
Vynikam narady stała toje, što kiraŭnika KDB Vadzima Zajcava adpravili ŭ adstaŭku.
Kamientary