Polskija bajkiery ušanujuć u Biełarusi achviar stalinskich rasstrełaŭ
U Biełarusi znachodziacca ŭdzielniki12-ha Katyńskaha motaprabiehu. 70 matacyklistaŭ ciaham piaci dzion naviedajuć kala 20 miascovaściaŭ. Za ŭvieś čas motaprabiehu, a heta try tydni, jany nakruciać na svaich matacykłach 6 tysiač kiłamieptraŭ i pabyvajuć u piaci krainach.
U Biełaruś udzielniki Katyńskaha motaprabiehu pryjechali ź Litvy. U aŭtorak jany naviedali Ašmiany, Lidu, Surkučy i Hrodna. Siońnia jany jeduć pa maršrucie Roś — Vaŭkavysk — Słonim — Baranavičy i zavieršać dzień u Zavośsi, na radzimie Adama Mickieviča. Uviečary tam adbydziecca paetyčnaja viečaryna.
U nastupnyja dni bajkiery naviedajuć Śviciaź, Navahradak, Nalibaki, Vałožyn, Bahdanava. U Kurapatach i Chatyni, u miescach masavych pachavańniaŭ, jany ŭskładuć vianki i zapalać źničy.
U mnohich miascovaściach adbucca sustrečy ź miascovymi žycharami. Matacyklisty płanujuć naviedać šerah dziciačych damoŭ i pieradać ich vychavancam padarunki ad polskich viernikaŭ. Admysłova dziela hetaha ŭ polskich kaściołach i ŭ internecie adbyŭsia dabračynny zbor hrošaj.
Meta Katyńskaha motaprabiehu — ušanavać pamiać achviar i pakutnickuju śmierć palakaŭ, biełarusaŭ, rasiejcaŭ, ukraincaŭ i litoŭcaŭ.
Kamientary