U pieršy dzień raboty sesii parlamentary paśpieli razhledzić 16 pytańniaŭ. Ale dyskusija razharnułasia tolki pa adnym ź ich — novaj redakcyi zakonu «Ab reklamie».
2 krasavika ŭ Miensku adkryłasia viasnovaja sesija Pałaty pradstaŭnikoŭ Nacyjanalnaha schodu Biełarusi: za try miesiacy, časam jakich buduć pracavać deputaty, im naležyć pryniać 50 zakonaprajektaŭ, jakija zaraz znachodziacca na paradku dnia.
Jašče stolki ž dakumentaŭ dapracoŭvajucca ŭ pastajannych parlamenckich kamisijach. Jany buduć vynosicca ŭ Avalnuju zalu, jak ich tolki ich padrychtujuć da razhladu. Padčas adkryćcia pieršaha plenarnaha pasiedžańnia staršynia Pałaty pradstaunikoŭ Uładzimier Kanaploŭ padkreśliŭ, što ŭ mižsesijny peryjad praviedzienaja hruntoŭnaja praca, jakuju nie prypynili ni miascovyja vybary, ni rabota deputataŭ u vybarčych akruhach.
Kanaploŭ: «Padčas sesii my razhledzim kompleks mieraŭ pa palapšeńni demahrafičnaj sytuacyi. Praciahniecca rabota pa raźvićciu zakanadaŭstva ab pravach dziciaci. Buduć razhledžanyja prajekty zakonaŭ pa pytańniach uzmacnieńnia dziaržaŭnaj abarony dziaciej z prablemnych siemjaŭ, usynaŭleńnia i spahnańnia alimentaŭ».
Samym važkim na sesii stanie razhlad zakonaprajektaŭ, jakija majuć sacyjalnuju skiravanaść. I heta, pa słovach Kanaplova, nie vypadkova, tamu što «čałaviek i jahonyja patreby stali punktam adliku ŭsioj zakonatvorčaj dziejnaści».
Vialiki rezanans u hramadztvie, adznačyŭ śpikier, vyklikali prajekty zakonaŭ «Ab dziaržaŭnych sacyjalnych ilhotach, pravach i harantyjach dziela asobnych katehoryjaŭ hramadzianaŭ» i «Ab prafesijnym pensyjnym strachavańni».
Kanaploŭ: «Tut spatrebicca maksymalnaja pryncypovaść i adkaznaść. Mienavita ad našaha rašeńnia zaležyć, ci budzie zabiaśpiečanaja sacyjalnaja spraviadlivaść i padtrymka samych nieabaronienych katehoryjaŭ hramadzianaŭ».
Jašče adzin doŭhačakany dakument — novy Kodeks ab ziamli, jaki ŭžo amal dva hady znachodzicca ŭ kamisii pa ahrarnych pytańniach.
Kanapleŭ: «Jaho pryniaćcie dazvolić pierajści da cyvilizavanaha mechanizmu rynkavaha abaračeńnia ziamielnych učastkaŭ. Ziamlu buduć nabyvać pa kadastravym, to bok blizkim da rynkavaha, košcie».
Adrazu paśla ŭračystaha adkryćcia pačalisia pracoŭnyja budni. U pieršy dzień raboty sesii parlamentary paśpieli razhledzić 16 pytańniaŭ. Ale dyskusija razharnułasia tolki pa adnym ź ich — novaj redakcyi zakonu «Ab reklamie». Jon uvodzić šerah abmiežavańniaŭ na vytvorcaŭ reklamy. Pry hetym, jak padkreśliła namieśnica staršyni pastajannaj kamisii pa žyllovaj palitycy, budaŭnictvie, handlu j pryvatyzacyi Hanna Burava, zakonaprajekt uličvaje mižnarodny vopyt u sfery reklamy i specyfiku raźvićcia ajčynnaha reklamnaha rynku, a taksama intaresy ajčynnych vytvorcaŭ.
Burava: «Zakonaprajektam praduhledžvajecca, što reklama nie pavinna pieravyšać 20% abjomu viaščańnia dla radyjo‑ i teleprahramaŭ na praciahu sutak. Pry hetym ad 18‑j pa 22‑iu reklama nie pavinna pieravyšać 30% abjomu viaščańnia na praciahu kožnaj hadziny».
Najbolš istotnyja novaŭviadzieńni tyčacca reklamy piva i tytuniu. Jak paviedamiła Burava, ad 1 studzienia 2008 hodu zabaraniacca reklama tytuniovych vyrabaŭ, a piva, paśla taho, jak zakon nabudzie moc, možna budzie reklamavać tolki ad 7‑j ranicy da 8‑j viečara. Ale šerah parlamentaroŭ navat i z hetymi žorstkimi normami nie pahadzilisia. Naprykład, deputatka Maryja Chudaja paličyła ich zanadta miakkimi.
Chudaja: «Takoj kolkaści času, jak vy zakłali — 30% viaščańnia, asabliva ŭ pramiežak ad 18‑j pa 22‑iu, kali žadajuć hladzieć mienavita veterany, i chočuć pahladzieć dobry film i potym pajści i lehčy adpačyvać. A hetymi dziejańniami my škodzim zdaroŭju i psychičnamu stanu našych ludziej».
Deputat Mikałaj Dubovik taksama nie zadavoleny proćmaj reklamy ŭ prajm‑tajm.
Dubovik: «Kali hladziš jaki film, ci prahramu — tut na samym cikavym miescy pieraryvajuć film i pakazvajuć doŭha i ŭparta reklamu. U hety čas chočacca ŭziać niešta ciažkoje i špurnuć u televizar. Kali b jon byŭ čužy, ja b, peŭna, tak i zrabiŭ».
Staršynia kamisii pa pravach čałavieka, nacyjanalnych adnosinach i ŚMI Jury Kułakoŭski zastupiŭsia za biełaruskich vytvorcaŭ piva i prapanavaŭ abmiežavać reklamu tolki rasiejskich piŭnych brendaŭ.
Kułakoŭski: «Ja žadaju, jak deputat ad Babrujskaj vybarčaj akruhi, kab u nas było piva «Babroŭ», a nie «Bačkaroŭ» albo «Try karony» i inšyja. Čamu? My sami sabie vyniščajem svajho vytvorcu, kali zabaraniajem reklamu piva na svaich kanałach. A na rasiejskich kanałach pahladzicie, što robicca?»
Niahledziačy na toje, što nakont novaj redakcyi zakonu «Ab reklamie» razharnulisia vialikija sprečki, kali pryjšoŭ čas hałasavać, tolki dziesiać parlamentaroŭ vykazalisia suprać jaho pryniaćcia, a 90 deputataŭ padtrymali dakument.
Siońnia Pałata pradstaŭnikoŭ taksama pryniała ŭ pieršym čytańni papraŭki ŭ zakon «Ab elektrasuviazi». Pavodle jaho, paradak vykarystańnia radyjochvalaŭ budzie vyznačacca tolki prezydentam. Taksama siońnia byli ratyfikavanyja šerah mižnarodnych pahadnieńniaŭ i pryniatyja da viedamu niekalki dekretaŭ prezydenta.
Kamientary