«Hadzińnik Fišera»: košt — 300 rubloŭ za chvilinu, astatniaje — biaspłatna.
«Asablivaściu ŭstanovy źjaŭlajecca toje, što vy płacicie tolki za čas, praviedzieny ŭ nas, — usiaho 300 biełaruskich rubloŭ za chvilinu, — kažuć aŭtary idei. — Usio astatniaje — biaspłatna!»
U novaj kaviarni (zała raźličanaja na 50 čałaviek) naviedniki zmohuć sustrakacca ź siabrami, siadzieć u internecie, čytać knihi i časopisy, pisać, malavać, zajmacca lubym vidam tvorčaj dziejnaści,a akramia taho hulać u nastolnyja hulni (tut budzie śpiecyjalny pakoj dla «Mafii»), udzielničać u tematyčnych viečarach, hladzieć kino na prajektary. U najaŭnaści jość i Xbox.
«U nas niama zvykłaj kuchni i raznastajnaha mieniu, ułaścivych zvyčajnaj kaviarni, — infarmujuć na svajoj staroncy ŭ sacyjalnaj sietcy „Vkontaktie“ arhanizatary. — Ale ŭsie našyja naviedniki — heta našyja hości, jakich my z radaściu častujem harbataj, kavaj, piečyvam i cukierkami. Taksama vy možacie prynieści ježu z saboj. A voś ałkahol i kureńnie — pad zabaronaj».
«Hadzińnik Fišera» raźličany ŭ pieršuju čarhu na ludziej tvorčych, bo miescaŭ dla sustrečy ŭ mastakoŭ, paetaŭ i muzykaŭ u horadzie nie tak šmat. Akupić układańni pasprabujuć u tym liku za košt praviadzieńnia muzyčnych i tematyčnych viečaroŭ.
«Pakul u pamiaškańni idzie ramont, płanujem adkrycca ŭ kancy žniŭnia, u skrajnim vypadku — u pačatku vieraśnia», — skazaŭ adzin z aŭtaraŭ prajekta Alaksandr Vierabiej.
Pačastunak, jaki prapanujuć naviednikam, budzie biaspłatnym. Ci nie bajacca ŭładalniki «antykaviarni» patoku hałodnych minčan?
«Ryzyka, zrazumieła, jość. Ale my raźličvajem, što publika chutka „adfiltrujecca“. A na piečyva, kavu, harbatu, toj ža internet treba nie tak šmat hrošaj. Našaja zadača — arhanizavać u Minsku ŭtulnaje miesca dla sustrečy adnadumcaŭ, jakoje chutka zavajuje papularnaść», — adznačajuć stvaralniki ŭstanovy.
Kamientary