Chalezin stavić u Polskim teatry śpiektakl pra svaju žonku

Hierojami śpiektakla stali žonka kandydata ŭ prezidenty Biełarusi, žurnalistka «Novaj haziety» Iryna Chalip, redaktar charter97.org Natalla Radzina, siastra Andreja Sańnikava Iryna Bahdanava, udava vykradzienaha ŭ Biełarusi biznesmena Iryna Krasoŭskaja, dačka palitviaźnia Źmitra Bandarenki Julija, dyrektar Svabodnaha teatra Natalla Kalada.

U svaim błohu kiraŭnik Biełaruskaha Svabodnaha teatra prypadniaŭ zasłonu sakretnaści i raskazaŭ pra śpiektakli, jaki ciapier stavić u Polskim teatry ŭ Varšavie:

«Ideja śpiektakla naradziłasia paśla taho, jak na sustreču z nami ŭ Lijon, dzie my tady vykładali, pryjechaŭ z Paryža Andžej Sievieryn. Jaho imklivaje źjaŭleńnie — usiaho na niekalki hadzin dla pieramovaŭ — vyhladała krychu dziŭnym. Na toj momant, u lutym 2010 hoda, Sievieryn słužyŭ u teatry „Kamiedzi Fransez“, i było vidavočna, što razmaŭlać jon źbiraŭsia nie pra pastanoŭku Maljera na hrand-scenie hetaha teatra-muzieja. Da taho ž, jaho „rehalii“ stvarali peŭnuju dystancyju — kavaler Ordena Hanarovaha Lehijona; lubimy aktor Andžeja Vajdy; „śviatynia“ „Kamiedzi Fransez“…

Ale my ŭbačyli vielmi adkrytaha, emacyjnaha čałavieka, jaki za try chviliny raźbiŭ usie ŭmoŭnyja barjery. Jon paviedamiŭ, što ź vieraśnia sychodzić u hadavy adpačynak u teatry (u štatnych aktoraŭ „Kamiedzi Fransez“ jość prava raz na dziesiać hadoŭ brać hadavy adpačynak z zachavańniem zarobku) i padpisvaje kantrakt z varšaŭskim Teatrom Polskim, što ŭžo niekalki dziesiacihodździaŭ u vielmi hłybokim kryzisie. Andžej prapanavaŭ nam pastavić śpiektakl u hetym teatry, z tymi aktorami, jakija ŭvojduć u abnoŭlenuju trupu. Pieršapačatkova havorka išła pra pjesu „Pakaleńnie Jeans“, ale vielmi chutka my adkarektavali prajekt, vyrašyŭšy sumiaścić na scenie 2 teksty — „Pakaleńnie Jeans“ i pjesu Natalli Kalady „Im śnilisia sny“, jakaja raskazvaje pra žonak vykradzienych i zabitych biełaruskich palitykaŭ i hramadskich dziejačaŭ. Pryčym my płanavali zrabić dvuchaktavy śpiektakl, u jakim „Pakaleńnie“ pavinien byŭ stavić ja, a „Sny“ — Uładzimir Ščerbań.

Adkazaŭšy pryncypovaj zhodaj, my i nie mierkavali, što hety prajekt adsuniecca na dva hady, ciaham jakich u našaj krainie adbuducca padziei, što prymusiać nas asieści ŭ Anhlii. Usie kalizii, uzhadnieńni i dva kastynhi zastalisia za śpinaj, i 28 sakavika ja pravioŭ pieršuju repietycyju. Ale papiaredničała hetamu surjoznaja transfarmacyja prajekta. Pa-pieršaje, Vałodzia nie zmoh udzielničać u hetaj pracy, bo adnačasova repietuje dva śpiektakli ŭ Anhlii — „Karala Lira“, premjera jakoha projdzie ŭ šekśpiraŭskim teatry „Hłobus“ 17 i 18 traŭnia, i dapracoŭvaje „Minsk-2011“, jaki rychtujecca da vialikaha brytanskaha tura i pakazu na scenie teatra Young Vic.

Daviałosia pierapracoŭvać i pjesy.

Nie budu zanuracca ŭ prafiesijnyja niuansy, a ŭ kancy raskažu pra raźmierkavańnie rolaŭ. Ciapier pra heta kazać možna, bo skład zaćvierdžany, pracuje, i, spadziajusia, źmianieńniaŭ bolš nie źviedaje. Vierchni radok — imia aktora, nižni — piersanaž, rolu jakoha jon vykonvaje.

Premjera pryznačanaja na 9 červienia».

• 0
• 0
• 0
• 0
• 0
• 0
• 0
• 0