Hajdukievič pachvaliŭsia, što da jaho pryjechaŭ pamočnik Trampa. A voś i nie

«Siońnia pa zaprašeńni ŁDPB pryjechała delehacyja z ZŠA. U jaje ŭvachodziać jak pradstaŭniki Respublikanskaj partyi, tak i Demakratyčnaj. Nazavu tolki niekatorych. Tut štaty, hladzicie jakija, Fłaryda, Ńju-Džersi, Kalifornija, Čykaha. Adzin z členaŭ delehacyi — heta pamočnik hubiernatara štata Ilinojs, kiraŭnik vybarčaj kamisii Čykaha ad Demakratyčnaj partyi. Jość tam i naš užo ŭsim viadomy Styŭ Samaryn, jaki źjaŭlajecca pamočnikam na hramadskich pačatkach prezidenta Trampa, i ŭvachodzić u kiraŭnictva Respublikanskaj partyi. Jość i pradstaŭniki relihijnych arhanizacyj amierykanskich, jość ludzi ź biełaruskimi karaniami, jakija pryjechali siudy, i jany chočuć ubačyć svaju radzimu tam, dzie naradzilisia ich prodki», — zajaviŭ Hajdukievič u efiry «Minsk-Naviny» 30 červienia.

«Usim viadomy» Styŭ Samaryn — heta novaje imia rasijanina Uładzisłava Rudolfaviča Śpiektarava. Jon naradziŭsia 20 listapada 1968 hoda ŭ Samary, vučyŭsia na suviazista, zacikaviŭsia relihijaj i ŭ 1997 hodzie pa pratestanckaj linii pajechaŭ u ZŠA.

Samaryn — časty hość biełaruskich prapahandysckich resursaŭ z pačatku dziasiatych. Jość taki žanr u prapahandzie — «amierykanski ekśpiert» chvalić Łukašenku. Samaryn/Śpiektaraŭ hadami nie vypaŭzaje z efiraŭ, chvalačy praŭleńnie biełaruskaha dyktatara. U 2021 hodzie «Jeŭraradyjo» ŭvažliviej pahladzieła na jaho i vyśvietliła, što toj stvaryŭ dźvie relihijnyja NDA ŭ ZŠA, ad imia adnoj ź ich (ścipła nazvanaj Global Christian Ministry) uznaharodziŭ sam siabie zvańniem doktara bahasłoŭja.

Na sajcie «Akademik.ru» Samaryn zrabiŭ sabie vizitku, dzie pieraličyŭ usie svaje dasiahnieńni. Praŭda, schavaŭ jašče pra adno — u 2015 hodzie jaho sudzili ŭ Fłarydzie za drobny kradziež.

Pavialičyć

Čamu Hajdukievič nazyvaje pryjezd Samaryna ŭ Biełaruś čymści asablivym — nie zrazumieła.

Sam Samaryn ukazaŭ u svajoj bijahrafii, što jon byŭ dacentam kafiedry suśvietnaj ekanomiki i finansaŭ Mižnarodnaha ŭniviersiteta «MITSA» ŭ Minsku.

Tolki ŭ 2025 hodzie jon byŭ zaŭvažany ŭ našaj krainie ŭ studzieni jak «mižnarodny naziralnik na vybarach prezidenta Biełarusi», a ŭ mai i červieni jon prychodziŭ na zdymki da biełaruskich televizijnych studyj u Minsku. Zdajecca, Samaryn nikoli nie źjaždžaŭ.

Znajści «pamočnika Trampa» siarod kiraŭnictva čaho b ni było ŭ Respublikanskaj partyi ZŠA nie ŭdałosia. Jość tolki zapis ab tym, što jon zarehistravaŭsia jak vybarščyk-respublikaniec u Fłarydzie. Ci varta ŭdakładniać, što pra «hramadskaha pamočnika Trampa» Hajdukievič taksama schłusiŭ.

• 1
• 0
• 12
• 7
• 0
• 0
• 1
• 0