«Heta ŭžo prosta niekiravanyja natoŭpy». Letniaje nastupleńnie Pucina vyčarpałasia, ale i ŭkrainskaja armija nastupać nie moža
Rasijskaje letniaje nastupleńnie na ŭschodzie Ukrainy zajšło ŭ tupik — vajskovaja hrupoŭka, jakaja pahražała Sumam, spyniłasia, a sproby prasunucca na inšych napramkach pravalvajucca. Pavodle ekśpiertaŭ, rasijskija padraździaleńni stracili arhanizavanaść i dziejničajuć biez efiektyŭnaha kamandavańnia. Vajennyja manieŭry z abodvuch bakoŭ užo niemahčymyja, što pieratvaraje vajnu ŭ pazicyjnaje supraćstajańnie.
Mienš čym za dva tydni tamu kramloŭski lidar Uładzimir Pucin zajaviŭ sa sceny forumu ŭ Sankt-Pieciarburhu, što jon nie vyklučaje zachopu horada Sumy rasijskaj armijaj. Praź niekalki dzion hałoŭnakamandujučy USU Alaksandr Syrski abviaściŭ, što, vidać, hetaha nie adbudziecca — bo «chvala varožaha letniaha nastupleńnia» syšła na ništo. Vojski Pucina byli spynienyja, piša BILD.
Amierykanski Instytut vyvučeńnia vajny (ISW) paćviardžaje heta: rasijskaja vajennaja hrupoŭka kolkaściu kala 50 tysiač sałdat i aficeraŭ znachodzicca prykładna ŭ 19 km ad Sum, adnak temp jaje nastupleńnia zapavoliŭsia.
Nie ŭdajecca prasunucca rasijskim vojskam i ŭ rajonie Kanstancinaŭki — da hetaha stratehična važnaha horada, raźmieščanaha pamiž Kramatorskam i Pakroŭskam, jany sprabujuć padstupicca tydniami, ale marna.
Adna z pryčyn niaŭdač rasijskaj armii — niedachop kamandziraŭ i ŭzajemadziejańnia asobnych atradaŭ. Upłyvaje hibiel zanadta vialikaj kolkaści aficeraŭ.
Ekśpiert pa pytańniach biaśpieki i palitołah Kryścijan Miolinh tłumačyć:
Heta ŭžo navat nie bataljony, a zusim maleńkija padraździaleńni, jakija nie navučany ŭzajemadziejničać — pa sutnaści, niekiravanyja natoŭpy, jakija, praŭda, nie vajujuć ź viłami, jak u Siaredniavieččy, ale i nie ŭjaŭlajuć saboj kłasičnych vajennych farmiravańniaŭ».
Pa słovach Miolinha, havaryć pra nastupleńnie ŭ zvyčajnym razumieńni ŭžo nie davodzicca:
«Ni ŭkrainskija, ni rasijskija vojski bolš nie zdolnyja pravodzić bujnyja, skaardynavanyja vajennyja manieŭry».
Z hetaj pryčyny skaardynavanyja apieracyi suchaputnych sił i VPS bolš nie pravodziacca, a bieź ich front naŭrad ci istotna zrušycca. Mahčyma, mienavita tamu ŭ apošnija tydni Pucin uzmacniŭ abstreły ŭkrainskich haradoŭ.
«Heta, pa sutnaści, prajava biezdapamožnaści. Kali na froncie nie ŭdajecca prasunucca, to robicca staŭka na cisk na palityčnaje kiraŭnictva šlacham demaralizacyi nasielnictva».
Pakul što, adnak, hety płan nie pracuje, kaža Miolinh, i pa vielmi prostaj pryčynie — ukraincy nie vierać, što sastupki Kramlu pryviaduć da čahości lepšaha.
Kamientary
Maju spadziavańnia rB miaža na poŭdnie ź dźvuch bakoŭ zaminavana na zachadzie poŭnačy ....pa uschodzie kulamioty filtracyjnyja łahieria...
I biaražy nas ...ŭsie abiarehi bahi ..varožki