«Zanadta dobry». Ajcišniki prykidvajucca mienš daśviedčanymi, kab atrymać pracu ŭ kryzis

Pad dopisam 300+ kamientaroŭ, mnohija paćviardžajuć. Tak, adnoj karystalnicy «pramym tekstam skazali», što treba zanižać dośvied, piša Devby.io.

— Ja pakul nie razumieju, što z hetym rabić i jak «zanižać» dośvied, tamu što akramia CV u mianie jość jašče [profil u] LinkedIn i kuča inšych servisaŭ, dzie ŭsio napisana, jak jość. Kali ja raspaviadaju pra svoj dośvied, jon [apovied] taksama vydaje. Dy i chłusić niejak nie chočacca.

Inšaja śpiecyjalistka piša, što «pryjšłosia vydalić sa svajho dośviedu hod u jakaści lida, kab pierastać atrymlivać «ovierkvalifajd». I spracavała».

Jašče adzin śpiecyjalist kožny raz «vyrazaje z CV lišnija kiejsy», kab nie pačuć, što jon zanadta dobry dla pracadaŭcy. 

— Było, paśla parački admoŭ. Ejčary chočuć [naniać] daśviedčanaha i ŭsioviedajučaha [kandydata], ale nie vielmi daśviedčanaha i ŭsioviedajučaha.

Kamuści pryjšłosia vydalić z reziume radok, što ŭ jaho jość navukovaja stupień, a chtości «niekalki hadoŭ vydaliŭ — i ŭsio jašče ovierkvalifajd».

Pavialičyć

«Zrazumieła, što jon pryjšoŭ «pierasiadzieć», pakul šukaje niešta lepšaje»

U kamientarach adznačylisia rekrutary i mieniedžary. Jany tłumačać, što časam pracadaŭcy nie ŭ stanie abo prosta nie chočuć najmać darahoha śpiecyjalista — tamu nie razhladajuć tych, u kaho dośvied 5-15+ hadoŭ, chaj navat u hety kankretny momant kandydaty nie suprać atrymlivać mienš. 

«Ale ŭ rešcie rešt, jamu [kandydatu ź vialikim dośviedam] stanie sumna», — upeŭnieny kamientatary (i takich adkazaŭ niamała). 

Pavialičyć

Taksama karystalniki dadajuć, što kamandu važna sfarmavać «z supracoŭnikaŭ supastaŭlalnaha ŭzroŭniu, kab nie parušaŭsia bałans i ijerarchija». 

— …Kali čałavieku patrebien padmajstar, jon nie voźmie majstra: ź im budzie dyskamfortna, bo dla jaho ty nie budzieš aŭtarytetam. I zrazumieła, što jon pryjšoŭ «pierasiadzieć», pakul šukaje niešta lepšaje, i chutka sydzie.

— Kiruju rekrutmientam 20 hadoŭ. Tak, heta praŭda, ale sprava nie ŭ hadach dośviedu, a ŭ jaho maštabie i ŭzroście. 

Kali vy kiravali kamandaj u 100 čałaviek, to vas buduć vielmi nieachvotna razhladać na kamandu navat u 60 čałaviek. Kali vaš patencyjny kiraŭnik maładziejšy za vas, to šancy rezka padajuć. Kali pa reziume vy mahli b pretendavać na rolu vašaha patencyjnaha kiraŭnika (heta značyć abjom zadač i adkaznaści na papiarednich miescach dastatkovy dla jaho/iaje roli), to šancy rezka padajuć. Narešcie, kali vy znachodzilisia ŭ adnoj roli (nie kampanii) bolš za 5 hadoŭ — heta drenny znak: dadatkovaha dośviedu ŭžo nie dadajecca, a hady i zapyty rastuć — [a značyć] «Davajcie voźmiem maładoha, nie vyharałaha, z anałahičnym dośviedam». Heta ŭsio, viadoma, abahulnieńni, u realnym śviecie vielmi šmat vyklučeńniaŭ.

«Mahčyma, sydu, kali atrymaju dzie-niebudź jašče prapanovu. Ale jaje niama»

My taksama znajšli niekalki čałaviek, jakija skručvali dośvied u reziume (abo im raili), kab atrymać pracu.

Ała*, frantend-raspracoŭščyca, u IT — 7+ hadoŭ:

— Ja naŭmysna «zaniziła» svoj dośvied, kab znajści pracu — vykreśliła z reziume niekalki hadoŭ, na praciahu jakich viała kamandu. 

Sprava była tak: my z mužam pierajechali ŭ Polšču — a praz paru hadoŭ razyšlisia. I dalej «kožny sam za siabie», — tak mnie skazaŭ užo były muž. Praź jašče niejki čas ja zastałasia biez pracy. A ŭ nas dačka — i jaje treba karmić, i za zdymnuju kvateru płacić. 

Ja stała šukać novuju pracu, ale prapanoŭ nie było. Vyrašyła viarnucca dadomu — u Minsku svaja kvatera, užo minus adna prablema. Plus ja znajšła nievialikuju padpracoŭku na fryłansie na paru miesiacaŭ — u Biełarusi ŭžo nie prapali b. 

Z pošukam pracy nie šancavała — albo ihnor, albo admovy. U adnym miescy skazali: «vy ovierkvalifajd dla nas», u inšym — «vam budzie nudna, i vy chutka sydziecie». Ejčara biantežyła, što ŭ mianie nie budzie matyvacyi zatrymacca ŭ kampanii. U mianie dačka, jakuju ja vychoŭvaju adna, — heta nie matyvacyja, pa-vašamu? 

U rešcie rešt ja zaniziła svoj dośvied, jak mnie paraiŭ adzin dobry znajomy — i atrymała ofier. Tak, ja mahu bolš i lepš, i, mahčyma, sydu, kali atrymaju dzie-niebudź jašče prapanovu na kłasnych umovach. Ale jaje niama, a ja ŭžo paŭhoda adpracavała ŭ hetym miescy (i praciahnu dalej). Pryčym pracuju ja dobra, a značyć — ja karysnaja dla kampanii, jana tolki ŭ plusie ad taho, što ŭziała mianie.

«Źviartałasia da karjernaha kansultanta, i jon paraiŭ «zabyć hadoŭ 7»

Arkadź (tut i dalej imiony źmienienyja dziela biaśpieki), praduktovy i UX/UI-dyzajnier, u IT 15+ hadoŭ:

— Ja dyzajnier — praduktovy i UX/UI, dośviedu ŭ mianie — 15+ hadoŭ. Zaraz šukaju pracu, ale pakul biezvynikova. Źviartałasia da karjernaha kansultanta, i jon paraiŭ «zabyć hadoŭ 7», kab atrymać ofier, chacia b jak midł — i pačać pracavać. 

«Kožny miesiac prastoju abydziecca tabie daražej — ściš apietyty, a tam, hladziš, i niešta jašče znojdzieš», — skazaŭ jon. A ja nie chaču i nie mahu tak! Tamu pakul šukaju, reziume nie «čyściła». 

«Daŭno ŭžo składaju asobnaje reziume pad kožnuju vakansiju»

Siarhiej, inžynier-prahramist, u IT kala 25 hadoŭ:

— Ja pryjšoŭ da taho, što daŭno ŭžo składaju asobnaje reziume pad kožnuju vakansiju. 

Hladžu: aha, z hetymi technałohijami ja 3 hady pracavaŭ, a tut u mianie 10 hadoŭ dośviedu. Raz-raz — padniaŭ navierch usio, što relevantna ŭ dadzienym kankretnym vypadku, a astatniaje ŭniz, kali miesca chopić. A niešta «staroje» i niepatrebnaje mahu i nie dapisvać — nu, prosta kab reziume nie pieraŭtvaryłasia ŭ praścinu, bo ja ŭ IT z pačatku nulavych.

I što ŭ vyniku — ja nachłusiŭ u reziume? Nie. Zaniziŭ svoj dośvied? Taksama nie. Prosta taki padychod. Darečy, zaŭvažu jašče: kali vykarystoŭvać farmuloŭki, jakija dadzieny ŭ apisańni vakansii, — ejčary buduć zadavoleny. «Heta stopracentny metč», — niejak skazała mnie adna. Ja pra siabie paśmiajaŭsia: viadoma, słova ŭ słova vašaje apisańnie ž.

• 7
• 0
• 5
• 2
• 0
• 3
• 0
• 0