Horača, jak u piekle. Jak Jeŭropa pieražyła adzin z samych haračych miesiacaŭ za ŭsiu historyju nazirańniaŭ

Dva čałavieki zahinuli z-za rekordnaj śpioki ŭ Francyi, paviedamiła ŭ sieradu nacyjanalnaje Ministerstva ekałohii, a ŭsiaho tolki za adzin dzień dapamoha z-za nadta vysokaj tempieratury pavietra spatrebiłasia bolš čym 300 žycharam krainy.

Rekordna haračaje nadvorje, jakoje pryjšło na ŭvieś kantynient, — śledstva antrapahiennaj źmieny klimatu, zajaviła klimatyčnaje ahienctva AAN, i takija pieryjady śpioki zdarajucca ciapier usio čaściej.

Ispanija, Partuhalija i Anhlija: rekordnaja piekła

Adrazu ŭ niekalkich krainach pačatak leta 2025 hoda akazałasia niebyvała haračym. Tak, u Ispanii i Anhlii červień 2025 hoda staŭ samym haračym miesiacam za ŭsiu historyju nazirańniaŭ. 

Dziaržaŭnaja mietearałahičnaja słužba Ispanii Aemet zajaviła, što nadzvyčaj haračy červień — z. siaredniaj tempieraturaj 23,6°C — «pabiŭ rekordy» i pierasiahnuŭ siaredni pakazčyk lipienia i žniŭnia.

Jak padličyli mietearołahi ŭ Anhlii, siaredniaja tempieratura červienia tut skłała 16,9 hradusa pa Celsii, heta rekord dla pieršaha miesiaca leta. U cełym u Vialikabrytanii (a nie tolki ŭ Anhlii) hety červień staŭ druhim samym ciopłym z momantu pačatku viadzieńnia tempieraturnych nazirańniaŭ u 1884 hodzie.

Na macierykovaj častcy Partuhalii ŭ červieni była zafiksavana rekordnaja dzionnaja tempieratura — +46,6°C. Tak horača było ŭ miastečku Mora za 90 km ad Lisabona, heta maksimum dla macierykovaj častki Partuhalii, paviedamili mietearołahi z partuhalskaha instytuta mora i atmaśfiery. Siaredniamiesiačnyja danyja jašče nie apublikavanyja.

Italija: adklučeńnie elektryčnaści i koma z-za ciepłavoha ŭdaru

U Italii ad mocnaj śpioki zahinuli dva čałavieki, a ŭ italjanskaj kamunie Tece-sul-Brenta (pravincyja Vičenca) rabočy na budoŭli apynuŭsia ŭ komie paśla dzionnaj źmieny na śpiakocie. Jaho naparnik taksama źviarnuŭsia pa miedycynskuju dapamohu, adčuŭšy siabie drenna, paviedamlaje italjanskaje infarmacyjnaje ahienctva Ansa.

A ŭ Łambardyi da vieraśnia zabaranili pracy na adkrytym pavietry ŭ pieryjad z 12:30 da 16:00. Hetaja zabarona ŭ pieršuju čarhu tyčycca budaŭničych placovak, ramontnych rabot na darohach, sielskahaspadarčych rabot.

Anamalnaja śpiakota pryviała 1 lipienia da adklučeńniaŭ elektryčnaści ŭ centry Fłarencyi — z-za ŭzrosłaj nahruzki na sietku ad kandycyjanieraŭ. Taksama ŭ aŭtorak na davoli praciahły čas adklučałasia elektryčnaść u italjanskim Bierhama.

U Taskanie za čas śpiakoty kolkaść špitalizacyj vyrasła na 20%, paviedamlajuć rehijanalnyja ŚMI.

U 13 abłaściach Italii, uklučajučy Łambardyju i Emiliju, žycharam było rekamiendavana nie vychodzić na vulicu ŭ samyja haračyja hadziny dnia.

U Fłarencyi ŭ aŭtorak mietearołahi zarehistravali tempieraturu 38,9°C, a ŭ paŭdniovym horadzie Kaljary na vostravie Sardzinija tempieratura pavietra dasiahnuła 38,6 °C.

Lipień: praciah budzie

Rekordny červień skončyŭsia, ale pakul śpioka nie adstupaje.

Pa danych mietearołahaŭ ź ispanskaj klimatyčnaj słužby Aemet, u pieršy dzień lipienia ŭ niekalkich punktach na Pireniejskim paŭvostravie tempieratura pieravysiła 43°C. U noč na aŭtorak u Sievilji było 28°C, u Barsiełonie — 27°C.

U aŭtorak, 1 lipienia, u parku Sent-Džejms u Łondanie tempieratura dasiahnuła 34,7°C — pakul heta maksimalnaja tempieratura dla Łondana za ŭvieś 2025 hod.

U paniadziełak, 30 červienia, samaja vysokaja dzionnaja tempieratura ŭ Vialikabrytanii — 33,1°C — była zafiksavana ŭ łondanskim aeraporcie Chitrou. Tempieratura ŭ rajonie Uimbłdona dasiahnuła 32,9°C, što zrabiła 30 červienia 2025 hoda samym haračym dniom adkryćcia tenisnaha turniru za ŭsiu jaho historyju.

Pavodle papiarednich źviestak, jakija pradstaviła mietearałahičnaja słužba Vialikabrytanii, siaredniaja tempieratura ŭ krainie ŭ červieni skłała 15,2°C, što stała druhim samym vysokim pakazčykam za ŭsiu historyju nazirańniaŭ dla pieršaha letniaha miesiaca.

«Hety pakazčyk byŭ vyšejšy tolki ŭ červieni 2023 hoda, kali siaredniaja tempieratura za miesiac skłała 15,8°C», — havorycca ŭ paviedamleńni mietearałahičnaj słužby.

Mietearałahičnaja słužba Niamieččyny papiaredziła, što tempieratura ŭ niekatorych rehijonach moža dasiahnuć amal 38°C u aŭtorak i sieradu, 2 i 3 lipienia.

Z-za śpiakoty źniziŭsia ŭzrovień vady ŭ Rejnie, z-za čaho byli abmiežavanyja račnyja pieravozki — i ich košt vyras.

Ale jość šaniec, što śpiakota chutka ŭsio ž taki pojdzie na spad. Jak prahnazujuć sinoptyki, z čaćviarha na poŭdni Jeŭropy pačniecca pastupovaje źnižeńnie tempieratury pavietra.

Turcyja, Hrecyja i Čarnahoryja: lasnyja pažary

U Turcyi śpioka pryviała da lasnych pažaraŭ. Ministr lasnoj haspadarki Turcyi Ibrahim Jumakły paviedamiŭ, što za apošnija try dni pažarnyja i ratavalniki ŭ krainie vyjazdžali na 263 lasnyja pažary. Usiaho ratavalniki ŭžo evakuiravali bolš za 50 000 čałaviek — u asnoŭnym žycharoŭ Zachodniaj pravincyi Iźmir.

Pažary taksama achapili rajony bilecik, Chataj, Sakaryja i Manisa. 

Tempieratura ŭ Hrecyi nabližajecca da adznaki 40°C užo na praciahu niekalkich dzion. Lasnyja pažary bušujuć blizu niekalkich prybiarežnych haradoŭ, ahoń źniščyŭ niekalki damoŭ. Miascovyja žychary byli vymušanyja evakujavacca.

Lasnyja pažary taksama byli zarehistravanyja ŭ Čarnahoryi.

Francyja: začyniena naziralnaja placoŭka Ejfielevaj viežy

U Francyi, dzie 30 červienia ŭ mnohich haradach krainy byli zafiksavanyja maksimalnyja načnyja i dzionnyja tempieratury, zachoŭvajecca haračaje nadvorje.

Ministr klimatu Ańjes Pańje-Runaše nazvała niezvyčajnuju śpiakotu ŭ horadzie biesprecedentnaj situacyjaj.

Z-za jaje, u pryvatnaści, była začyniena vierchniaja naziralnaja placoŭka Ejfielevaj viežy. U paryžskim aeraporcie Arli niadaŭna była zafiksavana tempieratura 37,6 °C.

Upieršyniu za piać hadoŭ u paryžskim rehijonie abvieščany maksimalny — čyrvony — uzrovień tryvohi ŭ suviazi z ekstremalnaj śpiakotaj. Anałahičny ŭzrovień tryvohi byŭ abvieščany i ŭ inšych 15 rehijonach Francyi. U hetych rehijonach u aŭtorak, 1 lipienia, byli začynienyja 1896 škoł i kaledžaŭ.

Pieryjady śpioki ŭjaŭlajuć surjoznuju niebiaśpieku i dla zdaroŭja ludziej, i dla navakolnaha asiarodździa, papiaredžvajuć ekśpierty. Vysokija tempieratury ŭ Adryjatyčnym mory spryjajuć źjaŭleńniu invazijnych bijałahičnych vidaŭ, a taksama paskarajuć rastavańnie lednikoŭ ŭ harach, jakija i tak z kožnym hodam stanoviacca mienš.

U paniadziełak, 30 červienia, Viarchoŭny kamisar AAN pa pravach čałavieka Folkier Ciurk padkreśliŭ, što čarhovaja chvala śpiakoty kaža ab nieabchodnaści źmianieńniaŭ — u tym liku admovy ad roznych vidaŭ vykapniovaha paliva, vykarystańnie jakoha źjaŭlajecca adnoj z hałoŭnych pryčyn źmieny klimatu.

«Pavyšeńnie tempieratury, pavyšeńnie ŭzroŭniu mora, pavodki, zasuchi i lasnyja pažary pahražajuć našamu žyćciu, našamu zdaroŭju, mahčymaści žyć u čystym, zdarovym i ŭstojlivym navakolnym asiarodździ», — skazaŭ Folkier Ciurk, vystupajučy ŭ Saviecie AAN pa pravach čałavieka.

Pa danych Mižuradavaj hrupy ekśpiertaŭ AAN pa źmianieńni klimatu, pieryjady śpioki ciapier paŭtarajucca ŭsio čaściej i achoplivajuć usiu vialikuju terytoryju, chvali śpioki stanuć jašče bolš vyjaŭlenymi — z-za taho, što płanieta praciahvaje nahravacca. Paskarajuć hety praces, pa danych ekśpiertaŭ AAN, antrapahiennyja faktary.

Ryčard Ałan, prafiesar Univiersiteta Redynha (Vialikabrytanija), nahadvaje, što rost uzroŭniu parnikovych hazaŭ nie daje płaniecie pazbavicca ad liškaŭ ciapła.

«Bolš ciopłaja, bolš suchaja atmaśfiera bolš efiektyŭna sušyć hleby, a heta aznačaje, što chvali śpioki ŭzmacniajucca», — rastłumačyŭ jon.

• 1
• 0
• 0
• 0
• 2
• 5
• 0
• 0