Abarona Łužyna i Fiadot-stralec
24 lutaha na telekanałach ekranizacyja ruskaj klasyki “Abarona Łužyna” i redki žanr kinałubka-hratesku “Padańnie pra Fiadota-stralca”, taksama na ekranach “Addany sadoŭnik”, “Šyza” i “Pad hipnozam”
Ład, 18.55
Padańnie pra Fiadota-stralca (Skaz pro Fiedota-strielca)
Rasieja, 2002, kalarovy, 102 chv.
Režyser: Siarhiej Aŭčaroŭ
Roli vykonvajuć: Kanstancin Vierabjoŭ, Andrej Miahkoŭ, Uładzimier Haściuchin, Volha Paškova, Natalla Ščarbakova, Volha Vołkava, Alena Habiec, Viktar Sucharukaŭ, Siarhiej Dancoŭ
Žanr: Kinałubok-hratesk pavodle adnajmiennaha padańnia Leanida Fiłatava
Adznaka: 7 (z 10)
Stary biazdomny raspaviadaje padańnie pra Fiadota-stralca. U kazačna-hratesknaj krainie car (Andrej Miahkoŭ) daje zadańni zuchavatamu maładcu Fiadotu. Sakavitaja (i vieršavanaja!) mova Leanida Fiłatava, persanažy kazak z sučasnymi zvyčkami, kplivy hratesk. Tłustyja rusałki, hnutkaja achviara dla ŭsich katavańniaŭ, car-niedareka i pjanyja, jakija nie adroźnivajucca ad zabitych… Ale na źmienu persanažam ruskaj kazki pryjduć Fredzi Kruhiery, panki j Supermeny.
Siarhiej Aŭčaroŭ – adziny rasiejski režyser, jaki śviadoma pracuje ŭ žanry łubka, narodnaj pacieški j falklornaha padańnia (“Nieskładucha”, “Jano”, “Barabanijada”, “Laŭšun”). Jahony mastacki śviet satyryčny, ekscentryčny, trahikamična-hrateskny – i ni na što nie padobny.
NTV, 22.05
Šyza (Šiza / Šiza)
Kazachstan – Rasieja – Francyja – Niamieččyna, 2004, kalarovy, 86 chv.
Režyserka: Hulšat Amarava
Roli vykonvajuć: Ałžas Nusupbajeŭ, Volha Łandzina, Eduard Tabišaŭ, Viktar Sucharukaŭ, Hulnara Jeralijeva, Nurtaj Kanahat
Žanr: Drama
Šyza – mianuška 15-hadovaha chłopca, jaki žyvie z maci j jejnym paluboŭnikam Sakuram. Hrošy, ułada, žančyny, cyničnaje staŭleńnie da ludziej – heta žyćcio Sakury, jaki zarablaje kułačnymi bajami. Hety śviet, pryvablivaje j Šyzu. Ale kali na rynhu zabivajuć čałavieka, žyćcio hieroja źmianiajecca. Chacia ŭ jaho nievialiki rozum, ale vialikaje serca…
Karcina demanstravałasia na “Listapadzie”-2004.
ANT, 23.00
Pad hipnozam / Doktar Son (Doctor Sleep)
Vialikabrytanija, 2002, kalarovy, 108 chv.
Režyser: Nik Ŭilinh
Roli vykonvajuć: Horan Viśnič, Pedzi Konsidajn, Šyrli Hiendersan, Miranda Ota, Koryn Redhrejv, Kłer Rušbruk
Žanr: Akultna-mistyčny trymcieńnik
Adznaka: 5 (z 10)
Doktar Stroter, jaki pracuje nielehalna, zdolny čytać vobrazy ŭ snach zahipnatyzavanych pacyjentaŭ. Dapamahajučy kinuć palić śledčaj Łozi, jon bačyć dziaŭčynku, jakaja tonie. Łozi rasšukvaje mańjaka, ale dzicia, jakoje vyrvałasia z ruk zabojcy, maŭčyć. Doktar Stroter vyrašaje dapamahčy. Ale śledztvu pryjdziecca sutyknucca z satanizmam, čornaj mahijaj i pierasialeńniem dušaŭ.
Niezaŭvažny strašny film z małaviadomymi aktorami (dyj nia vielmi zhrabnaju režysuraj!) cikavy asobnymi siužetnymi pavarotami… i hipnozam, jaki źjaŭlajecca tajemnaj zbrojaj kinaekrana.
ANT. 00.00
Abarona Łužyna (The Luzhin Defence)
Francyja – Vialikabrytanija, 2000, kalarovy, 109 chv.
Režyser: Marlin Horys
Roli vykonvajuć: Džon Turtura, Emili Ŭotsan, Džeraldzin Džejmz, Ściuart Ŭiłsan, Krystafer Tompsan
Žanr: Drama pavodle adnajmiennaha ramanu Ŭładzimiera Nabokava
Adznaka: 6 (z 10)
Jon – hienijalny šachmatyst, jaki zasiarodžany na hulni. Jahonaja luboŭ da žančyny – adzinaje, što pryviazvaje da realnaha śvietu. Ale ŭ šachmatnuju hulniu ŭmiešvajecca žorstkaja realnaść, a kachańniu pieraškadžajuć šachmatnyja tryźnieńni.
Džon Turtura, jaki ŭžo adnojčy hraŭ persanaža na miažy ŭjaŭnaha j realnaha śvietu (“Bartan Fink”) – praniźliva pakazvaje zasiarodžanaść i samotu, nieprystasavanaść, zakachanaść i krochkaść, jakaja miažuje z varjactvam. Smak ramanu pieradaje j atmasfera epochi – z sastareła-čynnymi strojami, padstryžanymi hazonami i muzykaj Šastakoviča.
Ciapier čytajuć
«Kali ŭžo siudy prylacić ukrainskaja rakieta!» Vyzvaleny žurnalist Jaŭhien Mierkis raskazaŭ pra škłoŭskuju kałoniju1
Kamientary