Rymašeŭski: Kali ničoha nie źmienicca, daviadziecca bajkatavać vybary

Eks-kandydat u prezidenty Biełarusi Vital Rymašeŭski raskazaŭ, što abmierkavaŭ ź niamieckimi palitykami płany pa supracoŭnictvie i dapamozie, jakuju Hiermanija moža akazać Biełarusi.

— Pra što vy havaryli ź niamieckimi palitykami?

— My abmiarkoŭvali płany pa supracoŭnictvie i dapamozie, jakuju ŭrad Hiermanii moža akazać demakratyčnaj supolnaści Biełarusi. Kiroŭnyja partyi FRH nadajuć Biełarusi šmat uvahi. Važna, kab našyja pazicyi byli ŭzhodnienyja. My havaryli pra toje, jak źmianiłasia palityčnaja situacyja ŭ respublicy za apošnija paŭhoda. Paśla pryniaćcia novych zakonaŭ stała našmat składaniej arhanizoŭvać demanstracyi i akcyi pratestu, ažyćciaŭlajecca tatalny kantrol za pieramiaščeńniami i vykazvańniami biełaruskich apazicyjanieraŭ.

— Jak vy aceńvajecie ŭzrovień padtrymki FRH demakratyčnym siłam Biełarusi?

— Pazicyja, jakuju zaniała FRH, dapamahła mnohim aryštavanym za ŭdzieł u akcyi pratestu 19 śniežnia 2010 hoda vyjści na volu. Kali b nie takaja pryncypovaja pazicyja Zachadu, situacyja ŭ Biełarusi była b našmat horšaja. Majučy znosiny ź niamieckimi palitykami, ja baču, što ich źviazvaje ź Biełaruśsiu nie prosta palityčny intares, ale i asabistaje spačuvańnie da taho, što adbyvajecca. Jany niastomna patrabujuć vyzvaleńnia palitviaźniaŭ.

— Adnak Łukašenka hłuchi da patrabavańniaŭ Zachadu?

— Toje, što ŭ apošni čas byli adpuščanyja na svabodu niekatoryja palitviaźni, jakraz kaža pra toje, što Minsk Zachad čuje. Kali b Jeŭrasajuz byŭ bolš kansalidavany, kali b takija palityki, jak były premjer Italii Silvia Bierłuskoni i litoŭski prezident Dala Hrybaŭskajcie nie vystupali sa svaimi sumnieŭnymi vykazvańniami, to na svabodzie byli b užo ŭsie.

— Ci mohuć vyzvalić palitviaźniaŭ da 19 śniežnia hetaha hoda?

— Składana rabić prahnozy. U 2012 hodzie ŭ Biełarusi projduć parłamienckija vybary, adnak ja nie ŭpeŭnieny, što da vybaraŭ na svabodu vyjduć usie. My spadziavalisia, što ŭsich adpuściać hetaj vosieńniu i mocna rasčaravanyja tym, što hetaha nie adbyłosia. Niamieckija palityki taksama ličać heta drennym sihnałam.

— Vy nie škadujecie, što brali ŭdzieł u akcyjach pratestu?

— Ja byŭ tam, dzie pavinien byŭ być. Što da dziejańniaŭ apazicyi ŭ cełym, to mnohaje možna było b zrabić pa-inšamu. Našyja dziejańni musili być bolš rašučymi. Kandydatam u prezidenty nie ŭdałosia vypracavać adzinaha scenaru praviadzieńnia demanstracyi. U nas nie było sumiesnaha płana. Paciarpiełych mahło b być našmat mienš.

— Što zaminała vam abjadnacca?

— Asabistyja ambicyi, KDB i nie zusim akreślenaja i razroźnienaja pazicyja zachodnich krain u dačynieńni da biełaruskaj apazicyi padčas pieradvybarnaj kampanii. Chočacca vieryć, što padčas parłamienckaj pieradvybarnaj kampanii my budziem dziejničać inakš. Ja sam ŭmoŭna asudžany na dva hady, tamu na vybary mianie nie puściać. Akramia taho, biełaruskija ŭłady ŭžo niekalki razoŭ admaŭlali našaj partyi ŭ rehistracyi. Kali ničoha nie źmienicca, nam daviadziecca bajkatavać vybary.

— Vas vypuścili na svabodu našmat raniej za inšych źniavolenych. U apazicyjnych kołach nie ŭsie z razumieńniem pastavilisia da taho, što vy napisali zvarot da Łukašenki…

— Moj farmalny zvarot z prośbaj pra sadziejničańnie ŭ maim vyzvaleńni było kampramisnym rašeńniem. Ja pajšoŭ na hety krok, tamu što mnie było važna vyjści na volu. Ja nie dumaju, što pierastupiŭ rysu, i niasu adkaznaść za svaje ŭčynki. My nie padrychtavali partyju da takich represij. Nichto nie viedaŭ, što Łukašenka tak žorstka adreahuje na našuju demanstracyju. Ułady pavinnyja adkazvać za represii. A my pavinnyja adkazvać za toje, što nie padrychtavalisia da reakcyi ŭładaŭ na mitynh i nie byli hatovyja da pravakacyj praź niaŭmieńnie damovicca adno z adnym, skazaŭ Vital Rymašeŭski ŭ intervju «Niamieckaj chvali».

• 0
• 0
• 0
• 0
• 0
• 0
• 0
• 0