«Prezident zdavaŭsia ščyrym»: list ministra Mładzienava baranesie Eštan

Biełaruski palitolah Dzianis Mieljancoŭ vykłaŭ u svaim błohu

adrasavany kiraŭnicy jeŭrapiejskaj dypłamatyi Ketryn Eštan (z kopijaj usim ministram zamiežnych spraŭ) list baŭharskaha ministra zamiežnych spravaŭ Mikałaja Mładzienava pra vyniki jaho pieramovaŭ z Alaksandram Łukašenkam.

Jak paviedamiŭ Dzianis Mieljancoŭ, hety list byŭ raspaŭsiudžany siarod udzielnikaŭ ekśpiertnaj pracoŭnaj hrupy pa Biełarusi, jakaja niadaŭna sustrakałasia ŭ Vašynhtonie.

Sam fakt pieradačy ŭ ŚMI jak infarmacyi pra tajnyja pieramovy Łukašenki, tak i tekstu hetaha lista moža być sihnałam biełaruskamu režymu: paśla doŭhich hadoŭ manipulacyj ź jaho boku Jeŭropa bolš nie źbirajecca hulać utajnuju.

Prapanujem vam pierakład hetaha dakumienta.

* * *

28 žniŭnia 2011 h.

Darahaja Keci,

ja pišu vam pra niekatoryja padziei ŭ Biełarusi, jakija, na moj pohlad, mahli b stvaryć mahčymaść dla Jeŭrasajuza spryjać pracesu demakratyzacyi.

Na praciahu apošnich niekalkich tydniaŭ my prymali niekatoryja sihnały ź Biełarusi, jakija śviedčyli pra zacikaŭlenaść u palapšeńni adnosinaŭ krainy ź Jeŭrasajuzam. Naš analiz pakazvaje, što takaja zacikaŭlenaść, mahčyma, była abumoŭlenaja finansavymi abmiežavańniami, ź jakimi sutykajucca biełaruskija ŭłady, a taksama ŭpłyvam sankcyjaŭ i vonkavaha asiarodździa ŭ cełym.

Padčas maich pačatkovych kantaktaŭ ź ludźmi z atačeńnia prezidenta Łukašenki ja zajaviŭ, što nie moža być nijakich dyskusijaŭ, pakul niama bačnaha palapšeńnia situacyi z pravami čałavieka ŭ krainie, što źjaŭlajecca asnovaj našaj supolnaj pazicyi ŭ Jeŭrasajuzie. Heta ŭklučaje ŭ siabie poŭnuju palityčnuju amnistyju dla ŭsich pieraśledavanych, abvinavačanych i asudžanych pa spravie paślavybarnych buntaŭ u śniežni 2010 hodu.

Na majo vialikaje ździŭleńnie, reakcyja ź Minska była stanoŭčaj.

U hetym pryčyna, čamu ŭ piatnicu, 26 žniŭnia, ja prylacieŭ u Biełaruś i mieŭ 2,5-hadzinnuju hutarku z prezidentam, padčas jakoj jon pahadziŭsia z nastupnym:

1. Da kanca nastupnaha tydnia prynamsi čatyroch viaźniaŭ vyzvalać, a spravy jašče dvuch inšych spyniać biez jakich-niebudź dalejšych nastupstvaŭ;

2. Da kanca vieraśnia / pačatku kastryčnika ŭsie astatnija palityčnyja aktyvisty buduć vyzvalenyja;

3. Na pačatku nastupnaha tydnia prezident pavinien vystupić na nacyjanalnaj kanfierencyi nastaŭnikaŭ, na jakoj jon zakliča da nacyjanalnaha «kruhłaha stała» pamiž uładami, hramadzianskaj supolnaściu i apazicyjaj. «Kruhły stoł» pavinien zabiaśpiečyć sapraŭdny dyjałoh, nakiravany na ŭzhadnieńnie palityčnaj budučyni i demakratyzacyi Biełarusi. Jon pavinien hruntavacca na pryncypach zachavańnia terytaryjalnaj cełasnaści i niezaležnaści Biełarusi i raźvićcia šmatpartyjnaj demakratyi.

4. Padčas abviaščeńnia hetaj inicyjatyvy prezident źvierniecca da Jeŭrasajuza z prośbaj nakiravać «hrupu mudracoŭ» dla kantrolu i, mahčyma, spryjańnia hetamu dyjałohu.

Ja liču, što hetyja inicyjatyvy, u vypadku ich realizacyi na praciahu najbližejšych niekalkich dzion, stvaryli b mahčymaść dla ES kanstruktyŭna padtrymać demakratyzacyju ŭ Biełarusi. Heta stvaryła b dla nas umovy, kab pracavać z uładami i apazicyjaj nad raspracoŭkaj umovaŭ realnaj šmatpartyjnaj demakratyi. Va ŭsich krain ES, jakija pierachodzili da demakratyi, jość vopyt i viedy, jakija možna prapanavać. Heta było b u intaresach Jeŭropy i naroda Biełarusi, kali my pahodzimsia, kab vyznačyć hrupu razumnych i spraktykavanych śpiecyjalistaŭ, jakija mahli b kantralavać, nakiroŭvać i spryjać takomu dyjałohu ŭ Biełarusi. Heta było b znakam našaj hatovaści ŭmacoŭvać jeŭrapiejskija prychilnaści našych uschodnich susiedziaŭ.

Maja acenka sustrečy była vielmi stanoŭčaj. Prezident zdavaŭsia ščyrym u svaim pamknieńni pieraharnuć staronku minułaha takim čynam, kab kraina mahła ruchacca napierad. Jon havaryŭ pra nieabchodnaść novaj kanstytucyjnaj damoŭlenaści, jakaja pryviadzie krainu da šmatpartyjnaj demakratyi, i pra niebiaśpieku kancentracyi «zavialikaj ułady», jak jon heta zrabiŭ. Jon vidavočna ličyć, što zachavańnie niezaležnaści Biełarusi budzie jaho samaj važnaj spadčynaj. Jon pahadziŭsia z tym, što najbolš nadziejnyja harantyi niezaležnaści — heta tryvałyja adnosiny ź Jeŭrasajuzam i funkcyjanavańnie demakratyčnych instytutaŭ.

Ja spadziajusia, što na nastupnym tydni my možam vitać takoje raźvićcio padziej, kali jany buduć raźvivacca tak, jak było abiacana, i na našaj nastupnych sustrečach mieć bolš hłybokija dyskusii.

Mikałaj Mładzienaŭ, ministr.

• 0
• 0
• 0
• 0
• 0
• 0
• 0
• 0