«Dabiehałasia, karaciej». Śpiavačka Łarysa Hrybalova trapiła ŭ balnicu ź mini-insultam
Znakamitaja artystka i biznesvumien apublikavała ŭ instahramie zdymki z balnicy.
Łarysa Hrybalova apublikavała ŭ storys zdymak z balničnaha łožku: bačna, što ŭ jaje ruku ŭstaŭlenaja kropielnica. «Dabiehałasia, karaciej», — padpisała zdymak artystka. I dadała, što zaraz jana ŭ paradku i chvalavacca za jaje nie treba.
Śpiavačka napisała, što ŭ jaje zdaryłasia tranzitornaja išemičnaja ataka. Heta časovaje parušeńnie krovazvarotu ŭ mozhu — jaho jašče nazyvajuć mini-insultam. Simptomy vielmi nahadvajuć insult (słabaść abo zdranćvieńnie, prablemy z maŭleńniem, strata zroku i dvajeńnie, hałavakružeńnie, prablemy z kaardynacyjaj), ale prachodziać chutčej. Pry hetym, jość surjoznaja ryzyka ŭźniknieńnia insultu — asabliva niebiaśpiečnyja pieršyja 48 hadzin.
Łarysa raspaviała padpisčykam, što kłapociacca pra jaje ŭ balnicy dobra. Jana paviedamiła, što adčuvaje siabie ŭžo lepš. I navat žartuje: apublikavała fota časopisa sa śpievakom Procharam Šalapinym na vokładcy (jaho pryniesła siastra Julija) i napisała: «I ciapier ja dumaju, da čaho? Da taho, što ja ŭžo babula ci inšaha mužyka ŭ kijosku nie było?».
Nahadajem: u 2023 hodzie da Łarysy Hrybalovaj prychodziŭ HUBAZiK. Raniej jana trapiła ŭ čorny śpis vykanaŭcaŭ, jakim zabaroniena vystupać u našaj krainie.
Łarysa Hrybalova — znakamitaja viadoŭca i śpiavačka. Viadomaść jana nabyła ŭ 90‑ch hadach, kali stała tvaram papularnaj prahramy «Usio narmalna, mama!» na biełaruskim telebačańni.
Kamientary
Da taho, što spažyvaj svaju štodzionnuju duchoŭnuju ježu, nie ablapajsia.