U Biełastoku klijent pahražaŭ biełaruskamu taksistu z-za akcentu. Spravaj zojmiecca prakuratura

Padjechaŭ, zabraŭ klijenta, davioz da miesca pryznačeńnia. Usio išło dobra, pakul u kancy pajezdki biełarus nie nazvaŭ canu. Tut pasažyr vyjšaŭ ź siabie — nie tamu, što pajezdka vyjšła darahoj, a tamu, što pačuŭ akcent. Dalej pajšli pahrozy, zvanok u palicyju. Ciapier spravaj zojmiecca prakuratura. Most vyśvietliŭ, što adbyłosia.

«Ništo nie pradkazvała nieadekvatnych pavodzin»

Pajezdka doŭžyłasia ŭsiaho dźvie chviliny i prachodziła spakojna. Kiroŭca i pasažyr jechali moŭčki.

— Ništo nie pradkazvała nieadekvatnych pavodzin, — raskazvaje Siarhiej, udakładniajučy, što pasažyr byŭ ćviarozy.

Kali biełarus zaviaršyŭ pajezdku, nazvaŭ klijentu canu — čatyrnaccać z pałovaj złotych (mienš za čatyry jeŭra). Toj, zdavałasia, nie zrazumieŭ. Siarhiej udakładniŭ: 14,40. Mužčyna na zadnim siadzieńni raspaznaŭ akcent i zastaŭsia im vidavočna niezadavoleny. «U hetaj krainie, k**, pramaŭlajuć vyrazna», — skazaŭ jon.

Siarhiej spačatku ŭśmichnuŭsia, ale kanflikt z-za movy narastaŭ. Tady taksist pakazaŭ mužčynu, što ŭ sałonie viadziecca videazapis. Heta jašče bolš vyvieła pasažyra ź siabie — jon demanstratyŭna skazaŭ u bok rehistratara: «Hej, kamiera, hetaja k**a skazała, što palakam ***.

Ničoha takoha biełarus nie kazaŭ. Ale pasažyr staŭ pahražać. Siarhiej paprasiŭ mužčynu vyjści z mašyny, ale toj tolki dastaŭ telefon, kab sa svajho boku taksama źniać taksista, pierajšoŭ na kryk i schapiŭ biełarusa za vopratku. Siarhiej staŭ telefanavać u palicyju. Pačuŭšy hołas aŭtamatyčnaha apieratara, pasažyr pakinuŭ sałon.

Advakat piša zapyt u prakuraturu

Siarhiej moh paviedamić apierataru pra kanfliktnaha klijenta, ale vyrašyŭ spynić zvanok i źjechać. Adnak praz 200 mietraŭ ubačyŭ narad palicyi.

— Padjechaŭ da ich, chacieŭ vyśvietlić, jak lepš pastupić, i pakazać rehistratar. Ale jany zajmalisia inšaj mašynaj i skazali, što mocna zaniatyja, — raskazvaje Siarhiej.

Patrulnyja tolki paraili mužčynu znoŭ patelefanavać pa ahulnym numary palicyi. Ale jon pastupiŭ pa-inšamu. Kalehi parekamiendavali jamu advakata, jaki śpiecyjalizujecca na spravach, źviazanych z ksienafobijaj. Siarhiej adpraviŭ jamu videa z rehistratara i toj, prahledzieŭšy zapis, skazaŭ, što voźmiecca za spravu i nakiruje zajavu ŭ prakuraturu.

Vynik takich spraŭ nie vidavočny i zaležyć ad abstavin. U Krakavie biełaruski taksist vyjhraŭ sud u byłoha klijenta, jaki pavodziŭ siabie hruba i prapanoŭvaŭ jamu «valić va Ukrainu». A ŭ Biełastoku klijent, vyjšaŭšy ź siabie, nie tolki abraziŭ biełaruskaha taksista, ale i nanios škodu jaho mašynie. Ale prakuratura spyniła vytvorčaść pa spravie «ŭ suviazi z adsutnaściu prykmiet złačynstva». Tam pryjšli da vysnovy, što pasažyr «dziejničaŭ pad upłyvam mocnych emocyj i nie mieŭ namieru pryčynić kamu-niebudź škodu». U takich vypadkach zastajecca tolki hramadzianski pazoŭ u sud.

• 0
• 2
• 1
• 1
• 1
• 1
• 4
• 0