Vieniesuelskaha dypłamata zatrymali pjanym za rulom

U Minsku padčas kiravańnia aŭtamabilem u stanie ałkaholnaha apjanieńnia zatrymany druhi sakratar pasolstva Balivaryjanskaj Respubliki Vieniesueła ŭ Respublicy Biełaruś.

Za leta heta ŭžo druhi vypadak zatrymańnia zamiežnaha dypłamata za rulom. 2 lipienia ŭ Minsku byŭ zatrymany pjanym za rulom Aŭdzi Q7 ataše pasolstva Respubliki Italija ŭ Biełarusi Maŭrycya Kračateli. Niahledziačy na vidavočnyja prykmiety, dypłamat ad miedycynskaha ahladu admoviŭsia, što pa biełaruskich zakonach pryraŭnoŭvajecca da kiravańnia transpartnym srodkam u pjanym vyhladzie. Mienavita tamu ŭ dačynieńni da jaho byŭ składzieny pratakoł ab administracyjnym pravaparušeńni.

Cikava, što MUS nie maje prava vydavać infarmacyju pra takija incydenty bieź viedama Ministerstva zamiežnych spravaŭ, da kampietencyi jakoha i adnosiacca razhlady z naškodziŭšymi dypłamatami. Adrazu paśla publikacyi pra italjanskaha ataše MZS Biełarusi zładziŭ hłabalnaje raźbiralnictva z HUUS Minharvykankama z nahody taho, chto i čamu vydaŭ sakretnuju infarmacyju. Na ščaście HUUS, infarmacyja pajšła pa nieaficyjnych kanałach, i staličnaj milicyi ŭdałosia vyjści adnosna suchoj z dypłamatyčnaha skandału.

Zdavałasia b, incydent ź italjanskim dypłamatam pavinien byŭ pasłužyć pieraściarohaj usim astatnim supracoŭnikam dypłamatyčnych misij, jakija pracujuć u Biełarusi. Ale nie prajšło i miesiaca, jak u Minsku zdaryŭsia čarhovy taki ž skandał.

Hetym razam incydent adbyŭsia z druhim sakratarom pasolstva Vieniesueły, zahadčykam konsulskaha adździeła Cini Dzi Łarenca Łuidžy Džavani. Pavodle dadzienych DAI, aŭtamabil «Folksvahien-Pasat» z dypłamatyčnymi numarami byŭ spynieny supracoŭnikami dziaržaŭtainśpiekcyi 28 lipienia ŭ 4 hadziny ranicy, bo pa vonkavych prykmietach za rulom mašyny siadzieŭ niećviarozy čałaviek.

Kali inśpiektary spynili aŭtamabil, to vyśvietlili, što za rulom — druhi sakratar pasolstva Vieniesueły, pryčym było vidavočna, što jon znachodziŭsia ŭ stanie mocnaha ałkaholnaha apjanieńnia. Ad miedycynskaha ahladu dypłamat admoviŭsia, tamu ŭ dačynieńni da jaho byŭ składzieny administracyjny pratakoł pa ŭsio tym ža artykule Kodeksa ab administracyjnych pravaparušeńniach — 18.16. Zhodna ź im, da adkaznaści pryciahvajecca kiroŭca, jaki kiravaŭ aŭtamabilem u stanie ałkaholnaha apjanieńnia abo jaki admoviŭsia ad miedycynskaha ahladu.

Zrešty, dypłamat u lubym vypadku nie moža być pryciahnuty da adkaznaści za dadzienaje pravaparušeńnie. Mienavita tamu paśla składańnia pratakoła jon byŭ adpuščany, a infarmacyja pra incydent nakiravanaja ŭ MZS Biełarusi, jakoje ŭžo pa svajoj linii praviadzie raźbiralnictva.

Cikava, što ŭ červieni Cini Dzi Łarenca Łuidžy Džavani paśpiachova abaraniŭ mahistarskuju dysiertacyju pa śpiecyjalnaści «Palitałohija» i atrymaŭ stupień mahistra palityčnych navuk u Akademii kiravańnia pry prezidencie Respubliki Biełaruś. Jon padavaŭ vialikija nadziei i voś tak hučna, niepryhoža sieŭ u łužynu.

• 0
• 0
• 0
• 0
• 0
• 0
• 0
• 0