Kali Bond byŭ čałaviekam

Novy Džejmz Bond ździŭlaje psychalahičnaj hłybinioj, skupymi kamputarnymi efektami j poŭnaj pieraacenkaj staroha brendu.

Karcina “Kazino “Rajal” pastaŭlenaja pavodle pieršaj knihi Jana Fłeminha pra Džejmza Bonda. Adnajmienny raman 1953 hodu ličycca sama ačałaviečanym u “bandyjanie” – a znakamity superšpijon šče maje ludzkija słabaści. Kniha ŭžo była adnojčy ekranizavanaja – ale tolki, jak parodyja na zubadrabilnyja pachodžańni ahienta 007, jakija pasypalisia paśla “Doktara No”.

Novaje pračytańnie źmianiaje akcenty. Nie hlamurny Bond, pad zaviazku nafaršavany darahoju reklamaj, nie mašyna dla zabojstva biez paproku j strachu – a mužčyna, zdolny adčuvać bol.

U filmie Džejmz Bond, jaki tolki atrymaŭ prava na zabojstva (i razhramiŭ afrykanskuju ambasadu) – pryjaždžaje ŭ čarnahorskaje kazino, kab abyhrać u pokier bankira terarystaŭ.

Dziejańnie zasiarodžvajecca na psychalahičnym dvuboi, kali zamiest bombaŭ – pozirki, z techničnaha abstalavańnia – špryc i defibrylatar, a ŭ jakaści zbroi – rozum i naziralnaść. Nervovy cik stanovicca śviedčańniem i katastrofaj, a za branioju tvaru – čužaja duša.

Aktor Denieł Krejh – nia kičavy pryhažun, heta “niapravilny” Bond sa svajoj samotaj i słabaściu. Dvuboj viadziecca j ź “dziaržaŭnym skarbnikam” (aktrysa Eva Hryn), jakaja pa lehiendzie – paluboŭnica Bonda. Zakachanaść i parazy Bonda – byli niedapuščalnyja ŭ hieraičnym seryjale.

Roŭna jak niedapuščalnyja byli j vymovy, jakija atrymaŭ novy Bond ad svajoj kiraŭnički (Džudzi Denč). Taja papraknuła hieroja spažyvieckim staŭleńniem da žančynaŭ (!)

Ale film nie abzavioŭsia palitkarektnymi feminisckimi štampami. Prosta maska superahienta siońnia patrabuje “dakumentalnaj” dušy.

Dla prychilnikaŭ realistyčnaha kino ŭ filmie nia budzie ničoha novaha: hieroi ź nieabchodnym uzroŭniem emocyj, amal fantastyčnyja bojki – źniatyja ŭ zvyšžorstkaj naturalistyčnaj maniery “Trafika” j “Suki-lubovi”; sučasnyja budni teraryzmu, napisanyja scenarystam “Małoj na miljon” – Połam Chahisam.

Ale dla amataraŭ “bandyjany” heta sapraŭdny šok.

Hlamurny mit pajšoŭ šlacham dackaje “Dohmy”.

Kazino “Rajal” (Casino Royale)

ZŠA – Vialikabrytanija – Čechija, 2006, kalarovy, 144 chv.

Režyser: Marcin Kempbeł

Roli vykonvajuć: Denieł Krejh, Eva Hryn, Mads Mikielsen, Džudzi Denč, Džankarła Džanini.

Žanr: Pryhodnickaja drama

Adznaka: 5,5 (z 10)

Usie filmy

• 0
• 0
• 0
• 0
• 0
• 0
• 0
• 0