Kaciaryna Andrejeva viartajecca ŭ žurnalistyku i anansavała ŭ chutkim časie pieršaje videaintervju
Byłaja palitźniavolenaja žurnalistka «Biełsat» Kaciaryna Andrejeva abviaściła, što viarnułasia ŭ prafiesiju paśla piaci z pałovaj hadoŭ źniavoleńnia. Jana ŭžo zrabiła pieršaje intervju — z byłoj źniavolenaj pravaabaroncaj Nastaj Łojkaj. Pra razmovu jany damovilisia padčas taho, jak «jechali razam u busiku da litoŭskaj miažy» paśla vyzvaleńnia z homielskaj žanočaj kałonii, piša «Biełsat».
«Ja spadziajusia, što heta budzie sieryja intervju, — apaviała Kaciaryna Andrejeva ŭ efiry «Ranicy z «Biełsatam». — Pakul što ja vyrašyła paspravabać svaje siły ŭ pieršym, pahladzim, jak heta atrymałasia. My z Nastaj Łojkaj damovilisia pra hetaje intervju, kali jechali razam u mikraaŭtobusie da litoŭskaj miažy ŭ dzień našaha vyzvaleńnia — 19 sakavika. Troški bolš za miesiac tamu. Jašče raniej u kałonii my siabravali i abmiarkoŭvali, što było b dobra, kali my vyzvalimsia prykładna ŭ adzin čas, kab ja ŭziała ŭ jaje intervju. I jana skazała, što dla jaje heta budzie vielmi pryjemna».
Žadańnie sfakusavacca na vialikich intervju i «human story»
Pavodle słovaŭ Kaciaryny, źjaviłasia novaja tendencyja — kali byłyja palitźniavolenyja žurnalisty razmaŭlajuć z byłymi palitviaźniami:
«My majem ahulny dośvied i razumiejem adzin adnaho lepš, čym žurnalist, jaki byŭ uvieś hety čas na voli».
Kaciaryna Andrejeva apaviała, što jaje pieršaje paśla vyzvaleńnia intervju vyjdzie ŭžo «ŭ najbližejšyja dni» na telekanale «Biełsat» i pakazała ŭryvak z hetaj razmovy.
Taksama jana paviedała, što zaraz choča sfakusavacca na vialikich intervju i «human story», i mienavita historyja Nasty Łojki stała pieršaj kropkaj u hetym napramku.
«Nasta padkreśliła, što dla jaje vielmi važna, kab razmova nie adbyvałasia z punktu hledžańnia achviary. Joj by vielmi nie chaciełasia, kab ludzi pabačyli ŭ joj achviaru katavańniaŭ. Mnie ciažka havaryć pra heta, ale Nasta pieražyła vielmi składanyja časy i šmat u čym jejny dośvied byŭ ciažejšym za moj. Ale ciapier jana choča nie toje, kab «pieraharnuć staronku», a znachodzić u sabie siły, kab daravać. I jana pra heta adkryta kaža», — paviedamiła Kaciaryna
«Nasta niazłomnaja, ja viedała jaje jašče da našaj «pasadki». Jejnyja kaštoŭnaści, bazavyja pryncypy, jakimi jana kirujecca ŭ svaim žyćci i stasunkach ź ludźmi i ŭ pravaabarončaj dziejnaści, — jany zastajucca niaźmiennymi, i heta vielmi dobra. I tyja čatyry hady, što jana praviała za kratami, nie paŭpłyvali na jejny śvietapohlad i karcinu suśvietu. Ja spadziajusia, što našyja hledačy zmohuć heta acanić, kali intervju vyjdzie», — dadała žurnalistka.
Novyja ŭmovy i vykliki dla žurnalistaŭ
Kaciaryna Andrejeva zaŭvažyła, što biełaruskija žurnalisty ŭ vyhnańni zaraz sutykajucca sa šmatlikimi vyprabavańniami i vyklikami, ale heta nie pieraškadžaje im pracavać na karyść čytačoŭ i hledačoŭ u źmienienych umovach:
«Zaraz biełaruskaja žurnalistyka stała bolš składanaj dla nas — i z etyčnaha, i z techničnaha punktu hledžańnia. U nas ciapier niama karespandentaŭ u Biełarusi, jakija mahli b zdabyvać infarmacyju i ekskluziŭ. Usio hruntujecca bolš na źviestkach, jakija my biarem z sacyjalnych sietak. Što składana i nie moža nie adbivacca na jakaści. Źjavilisia novyja vykliki — i ad majsterstva žurnalista zaležyć, jak skarystać hetuju situacyju takim čynam, kab zdabyvać ekskluziŭ i rabić cikavy kantent dla hledačoŭ navat u takich umovach, u vyhnańni».
Andrejeva: Kaleśnikavu kupili za «Biełaruśkalij», mianie za źniaćcio sankcyj z bankaŭ. Kali b sankcyj nie było, za što b nas kuplali?
Kaciaryna Andrejeva: Ja była maralna hatovaja za toj strym adsiedzieć dva hady, ale ŭsio pasypałasia, kali inkryminavali zdradu dziaržavie
Paźniak — Andrejevaj: Chvała Vam, Kaciaryna! U Vas vydatny muž
«Vieru, što siłaviki mohuć inakš». Nasta Łojka raskazała pra źniavoleńnie, HUBAZiK i stakholmski sindrom
Ciapier čytajuć
Stała viadomaja asoba rabočaha «Biełaruśkalija», jaki zahinuŭ pry abrušeńni hornaj parody1
Kamientary