BT havoryć pra Łukašenku ŭ 1250 razoŭ bolej, čym pra apazicyju

Manitorynh «Aśviatleńnie vybaraŭ u ŚMI» daŭ niesuciešny vynik: nijakimi svabodnymi vybarami i nie pachnie.

Praviedzieny pieršy etap manitorynhu «Aśviatleńnie prezidenckich vybaraŭ‑2010 u biełaruskich ŚMI», što tradycyjna ładzić Biełaruskaja asacyjacyja žurnalistaŭ.

Pad pryceły ekśpiertaŭ u halinie miedyjaŭ trapili vasiemnaccać ŚMI, jak dziaržaŭnych, tak i niedziaržaŭnych, jak papiarovych, tak i elektronnych.

U niezaležnych ŚMI Niaklajeŭ na pieršym miescy

Što datyčyć niezaležnych vydańniaŭ, to asablivych pretenzii tut niama. I naviny.by, i «Naša Niva», i «Narodnaja vola» aśviatlajuć vybary dosyć šmatbakova.

Cikava, što va ŭsich zhadanych miedyjach najbolšaje miesca siarod kandydataŭ vyłučajecca Uładzimiru Niaklajeva.

A voś «Kamsamolskaja praŭda» najbolš uvahi nadała Alaksandru Łukašenku. Jamu addadziena 82% hazietnaj płoščy, što advodzicca pad vybary. I reprezientavany jon, asnoŭnym čynam, stanoŭča. Na ŭsich astatnich pretendentaŭ nabrałasia ŭsiaho tolki 18%.

U 17 razoŭ mieniej za sport

«U dziaržaŭnych ŚMI tema prezidenckich vybaraŭ nie była pryjarytetnaj. Heta vynikaje choć by z taho, što siužetam na temu vybaraŭ advodziłasia ŭ 2‑3 razy mieniej času, čym nadvorju i ŭ 17 razoŭ mieniej, čym sportu», — kaža adzin z kaardynataraŭ manitorynhu fiłosaf Aleś Ancipienka.

Dziaržaŭnyja ŚMI amal nie padavali materyjałaŭ, pryśviečanych zboru podpisaŭ. A kali niešta i praślizhvała, to daminavaŭ iranična‑prynižalny ton, dy ŭžyvalisia abraźlivyja paraŭnańni.

«Ryžy, ryžy, kanapaty, źniaŭsia z honki kandydataŭ», — tak telekanał ANT prakamientavaŭ rašeńnie Siarhieja Ryžova spynić udzieł u prezidenckich vybarach.

Aproč Łukašenki, dziaržaŭnyja ŚMI taksama aśviatlali dziejnaść CVK, naziralnikaŭ. Heta padavałasia ŭ niejtralnym śviatle.

«Dziaržaŭnyja vydańni źmiaščali materyjały, jakija stvarali ŭražańnie pradvyznačanaści vybaraŭ», — kaža A.Ancipienka.

«Panarama» advodzić na vybary 0,86% času

Viečarovaja navinovaja prahrama «Panarama» na telekanale BT temie prezidenckich vybaraŭ adviała ŭsiaho tolki 0,86% efirnaha času.

Alaksandru Łukašenku vydzialajecca 75% času. Zhadki pra inšych kandydataŭ byli pa niekalki siekund. Tak byli imhniennyja nahadvańni pra kandydataŭ Niaklajeva i Pravalskaha. Ale heta 0,01% času. To bok pra Łukašenku ŭ «Panaramie» raskazvajuć u 1250 razoŭ bolej.

Na ANT i Pieršym kanale radyjo Łukašenka taksama zajmaje 70 i 80% času adpaviedna. Na ANT adzin raz (!) zhadvali Ramančuka i Ryžova.

A voś «Sovietskaja Biełorusii» addała apazicyi až 13,6% płoščy. Što praŭda, havorka pra apazicyju zusim nie piersanifikavanaja i časta niehatyŭnaja. Vyłučyć niekaha z kandydataŭ niemahčyma.

Ujavić sabie takuju karcinu dzieści ŭ krainach Jeŭrasajuza niemahčyma. Tam napiaredadni vybaraŭ ŚMI imknucca davać adnolkavuju infarmacyju pra ŭsich mahčymych kandydataŭ.

• 0
• 0
• 0
• 0
• 0
• 0
• 0
• 0