Milinkievič uvajšoŭ u inicyjatyŭnuju hrupu Kastusiova
Kamanda kandydata ad Partyi BNF naličvaje 1307 čałaviek.
Kandydat u prezidenty ad Partyi BNF Ryhor Kastusioŭ prezientavaŭ svaju kamandu. Kiraŭnikom inicyjatyŭnaj hrupy staŭ lider arhanizacyi Alaksiej Janukievič.Uvohule u inicyjatyŭnuju hrupu Kastusiova ŭvajšło 1307 čałaviek. Na dumku kamandy, hetaha budzie dastatkova, kab sabrać 110 tysiač podpisaŭ.
Ludzi Kastusiova buduć źbirać podpisy ŭ 84 haradach i miastečkach. Prynamsi, u 40 ź ich buduć vystaŭlenyja pikiety kandydata. Było adznačana, što absalutna ŭsie ŭdzielniki hrupy buduć pracavać zadarma.
Dałučyŭsia da inicyjatyŭnaj hrupy Kastusiova i lider Ruchu «Za Svabodu» Alaksandr Milinkievič. Jon płanuje pačać zbor podpisaŭ užo ź pieršaha dnia.
Taksama BNF pačynaje vyłučeńnie svaich pradstaŭnikoŭ u terytaryjalnyja vybarčyja kamisii. U minskuju haradskuju buduć prapanavanyja takija viadomyja ludzi, jak Jury Chadyka, Halina Siamdzianava, Lavon Barščeŭski.
Alaksiej Janukievič pryznaŭsia, što sam chacieŭ by ŭdzielničać u vybarach, ale jašče nie padychodzić pa ŭzroście. «Zrešty, ja liču, što Kastusioŭ — najlepšy varyjant. Metanakiravany čałaviek, jaki dabivajecca ŭsich pastaŭlenych zadač. Jon staŭ uvasableńniem kansiervatyŭnych pohladaŭ», — skazaŭ A.Janukievič.
Łozunham kampanii stanie «Svaboda. Dabrabyt. Biaśpieka». Pa słovach Kastusiova, prahramu BNF mohuć padtrymać 30% vybarcaŭ. «Mnohija našy napracoŭki pačali vykarystoŭvać i ŭłady. Heta tyčycca i Bałta‑Čarnamorskaha kalektara, i sielskaj haspadarki, i lesu», — zaznačyŭ R.Kastusioŭ.
Siaredni ŭzrost kamandy Kastusiova składaje ŭsiaho 30 hadoŭ. Heta budzie ci nie samaja maładaja inicyjatyŭnaja hrupa.
Kamientary