Z 1 vieraśnia 2026 hoda ŭ biełaruskich školnych stałovych płanujuć źmianić arhanizacyju charčavańnia. Asnoŭnuju ŭvahu buduć nadavać druhim stravam, sałatam i napojam, a supy bolš nie buduć abaviazkovaj častkaj mieniu, piša Times.by.
Taksama źmienicca padzieł vučniaŭ pa ŭzrostavych hrupach dla raźliku normaŭ charčavańnia. Zamiest dźviuch katehoryj (6—10 hadoŭ i 11—18 hadoŭ) uviaduć try: vučni 1—4-ch, 5—7‑ch i 8—11‑ch kłasaŭ. Heta pavinna dazvolić lepš uličvać patreby dziaciej roznych uzrostaŭ.
U školnym mieniu stanie bolš śviežaj harodniny i zielaniny, jakija biełaruskija vytvorcy mohuć pastaŭlać ciaham usiaho hoda. Adnačasova šyrej buduć vykarystoŭvacca hatovyja paŭfabrykaty biełaruskaj vytvorčaści: katlety, nahietsy, bitočki, pielmieni, bliny i inšyja vyraby. Urad abiacaje, što dla škoł buduć adbirać tolki tyja pradukty, jakija adpaviadajuć patrabavańniam biaśpieki i jakaści.
Namieśnica premjer-ministra Natalla Piatkievič na admysłovym kruhłym stale adznačyła, što sanitarnyja patrabavańni da školnaha charčavańnia taksama płanujuć pierahledzieć, kab zrabić sistemu bolš hnutkaj i prystasavanaj da sučasnych zvyčak. Pavodle jaje słoŭ, siońniašnija baćki i dzieci charčujucca inakš, čym niekalki dziesiacihodździaŭ tamu, tamu štodzionny sup abo abaviazkovaja ryba ŭ peŭny dzień užo nie adpaviadajuć sučasnaj madeli charčavańnia.
Pavodle pryviedzienych danych, za apošni hod pastaŭki miasnych rublenych paŭfabrykataŭ dla školnych stałovych pavialičylisia bolš čym u try razy — sa 135,5 % da 329 %.
Papiaredniaja reforma školnaha charčavańnia ŭ Biełarusi pačała dziejničać z 1 vieraśnia 2024 hoda. Tady było raspracavana kala 400 novych straŭ z ulikam hustaŭ dziaciej i pryncypaŭ zdarovaha charčavańnia. Novyja źmieny pavinny stać praciaham hetaj reformy.
Kamientary