«Voś nie soramna, što Žłobin taki horad niemaleńki, a parku dzieciam niama?»
Dziaŭčyna sa Žłobina ŭ tyktoku zrabiła ahlad na haradskija karusieli, zaŭvažyli «Mocnyja naviny».
Pavodle aŭtarki, park vyhladaje «staražytnym», tut dziesiacihodździami niama nijakich abnaŭleńniaŭ, akramia słajoŭ farby na starych płatach. Jana kaža, što parku nie mienš za 30 hadoŭ.
«I akramia adnoj karusieli za hety čas ničoha nie źmianiłasia. Absalutna. Taja ž aharodža, pafarbavanaja piaćciustami słajami farby. Hetyja ž mašynki, taksama strašnyja, iržavyja, pierafarbavanyja. Ničoha nie abnaŭlajecca. Voś ci nie soramna, što Žłobin taki horad niemaleńki, a parku dzieciam niama?» — kaža jana.
U kamientaryjach razharnułasia dyskusija pra sapraŭdny ŭzrost parku. Kali aŭtarka videa vykazała zdahadku, što jamu kala 30 hadoŭ, to staražyły papravili: parku ŭžo bolš za 50, a to i 60 hadoŭ.
«Mnie zaraz 68, i hetyja atrakcyjony stajali jašče ŭ majoj junackaści», — pišuć žłobincy.
Haradžanie ŭspaminajuć, što ŭ 80‑ch nabor zabaŭ byŭ značna bahaciejšy. Tady pracavali «Ramonak», «Aŭtadrom», «Łancuhovaja karusiel», cir i znakamityja «Łodački». Śviaty ŭ parku adznačali cełymi siemjami z šašłykami i sapraŭdnaj viesiałościu.
Ciapierašni stan atrakcyjonaŭ vyklikaje ŭ žycharoŭ nie radaść, a tryvohu: «Viasiołyja horki» nie pracujuć, papularny «Vals» uvieś čas łamajecca, asabliva ŭ pikavyja śviaty nakštałt Ivana Kupały. I zamiest paŭnavartasnaha abnaŭleńnia ŭ parku pierarabili plitku z łaŭkami, ale sami karusieli zastalisia «karavymi i iržavymi».
Mnohija pišuć, što vazić dziaciej na atrakcyjony davodzicca ŭ Minsk ci Homiel, bo na miascovych kanstrukcyjach, jakija «strašna rypiać», katacca niebiaśpiečna.
Žłobincy zadajucca pytańniem: čamu ŭ niemałym horadzie adkryvajucca dziasiatki adnolkavych kram, a adzinaje miesca dla dziciačaha adpačynku znachodzicca ŭ takim zapuścieńni?
«Heta śpiecyjalna nie prybirajuć, kab možna było filmy pra SSSR zdymać biez dekaracyj», — iranizujuć haradžanie.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty44
Kamientary