Mulara z Žodzina asudzili pa spravie Hajuna i za «abrazu» Łukašenki
Ihar Niejman šmat hadoŭ zajmaŭsia budaŭnictvam damoŭ, a ŭ volny čas korpaŭsia ŭ mašynach. Niadaŭna jaho asudzili pa dvuch palityčnych artykułach.
Iharu Niejmanu 39 hadoŭ. Jon žyvie ŭ Žodzinie. Doŭhi čas mužčyna pracavaŭ u śfiery pryvatnaha budaŭnictva: razam z kamandaj uzvodziŭ katedžy ŭ rodnym horadzie, a taksama ŭ Minsku i Barysavie. Paśla jon sam pracavaŭ mularam, kłaŭ i błoki, i cehłu.
Asobnym zachapleńniem Ihara byli aŭtamabili. U jaho raniej byŭ stareńki aŭtamabil Renault 11, jaki jon ciuninhavaŭ i ramantavaŭ sam dy raiŭsia z ekśpiertami na forumach pra asablivaści hetaha aŭto.
Niadaŭna Minski abłasny sud vynies mužčynu prysud pavodle častak 1 i 2 artykuła 361‑4 (sadziejničańnie ekstremisckaj dziejnaści), a taksama pa častcy 1 artykuła 368 KK (abraza Łukašenki). Pieraśled pa artykule 361-4, chutčej za ŭsio, źviazany sa spravaj Hajuna.
Iharu prysudzili chatniuju chimiju. Dakładny termin i akaličnaści zatrymańnia pakul nieviadomyja.
***
«Biełaruski Hajun» — manitorynhavy OSINT-prajekt, jaki byŭ stvorany ŭ 2022 hodzie, kali Rasija praź Biełaruś napała na Ukrainu. Prajekt adsočvaŭ vajennuju aktyŭnaść rasijskich i biełaruskich vojskaŭ, abapirajučysia na infarmacyju ad biełarusaŭ. Kaardynavała jaho dziejnaść hrupa aktyvistaŭ na čale z Antonam Matolkam.
Sprava Hajuna pačałasia paśla taho, jak siłaviki zatrymali aktyvistku, jakaja niekalki hadoŭ žyła ŭ Biełarusi ŭ padpolli. U jaje mabilniku znajšli spasyłku na dałučeńnie ŭ bot Hajuna, jakuju joj dasyłali ŭ samym pačatku isnavańnia prajekta. Fatalnaja pamyłka była ŭ tym, što spasyłka była biesterminovaja. A tamu siłaviki zmahli padklučycca da bota i vypampavać adtul usiu infarmacyju. Jany atrymali paviedamleńni akaŭntaŭ, jakija pisali ŭ bot, a taksama ichnija ID i imiony karystalnikaŭ.
Zasnavalnik Hajuna Anton Matolka adrazu paśla ŭzłomu patłumačyŭ, jak adbyŭsia vyciek infarmacyi i abviaściŭ pra zakryćcio prajekta.
«Naša Niva» — bastyjon biełaruščyny
PADTRYMAĆ
Kamientary