Biznesu — aryjentacyju na zachodnija rynki, vojsku — sučasnaje ŭzbrajeńnie i kantrakt, studentam — admienu raźmierkavańnia. U halinie enerhietyki jon prapanuje stvareńnie naftahazavaha kansorcyuma z udziełam ES i Rasii.
Biznesu — spryjańnie, vojsku — sučasnaje ŭzbrajeńnie i kantrakt, piensijanieram — hodnuju piensiju. Svaju prahramu kandydat nazyvaje antykryzisnaj.
27 traŭnia kandydat u prezidenty Aleś Michalevič u Ratušy prezientavaŭ u minskaj Ratušy tezisy svajoj prahramy. Całkam prahrama, jakaja budzie składacca bolš čym sa sta staronak, źjavicca ŭ vieraśni.
Prahrama kandydata Michaleviča maje nazvu «Biełaruś: ctratehija evalucyi». Prajekt składajecca z troch vialikich častak i maje padkreśleny ekanamičny charaktar, pra što śviedčyć nazva pieršaha raździełu — «Ekanamičny rost». Rešta prahramy pryśviečanaja efiektyŭnaj dziaržavie dy aktyŭnamu hramadstvu.
Kandydat Michalevič nie bačyć budučyni Biełarusi biez mocnaj i kankurentnaj haspadarki. Jon kaža, što naša ekanomika nie daje rady z cyvilizacyjnymi źmienami, a daviaršajuć spravu centralizacyja ŭłady, biurakratyja i niedaskanałaja padatkovaja sistema.
Palityk abiacaje, što pry im Biełaruś budzie ekanamična pryvabnaja, kankurentazdolnaja, pradkazalnaja, dziełavaja i razvažlivaja, pradprymalnaja.Dziela hetaha płanujecca skaracić kolkaść padatkaŭ i fiskalnych orhanaŭ, padvysić uzrovień ekanamičnych svabodaŭ, admianić cenavaje rehulavańnie na kamiercyjnyja tavary pasłuhi. Ajčynnaja vytvorčaść budzie pieraviedzienaja na mižnarodnyja standarty jakaści, tut buduć ukaranionyja sučasnyja technałohii, arhanizacyi vytvorčaści, kiravańnia i zbytu. Nacbanku abiacajecca ŭzmacnieńnie niezaležnaści. Kandydat zajaŭlaje taksama pra raźvićcio kredytnaha rynku, stvareńnie Ahienctva finansavaha raźvićcia.
Palityk zakranaje ŭ svajoj prahramie važnyja pytańni ŭłasnaści na ziamlu i enierhietyčnaj niezaležnaści. Jon abiacaje ziamielnuju reformu, padtrymku fiermierstvu, a taksama robić staŭku na masavuju vytvorčaść ekałahična čystaj sielhaspradukcyi.
Dziela zabieśpiačeńnia enierhietyčnaj biaśpieki kandydat źbirajecca dyviersifikavać pastaŭščykoŭ enierharesursaŭ dy stvaryć naftahazavy kansorcyum z udziełam Biełarusi, Ukrainy, Rasii dy Jeŭrasajuzu.
Efiektyŭnaja dziaržava pavodle Alesia Michaleviča — heta ŭzmacnieńnie hramadskaha kantrolu za dziejnaściu dziaržaŭnych instytutaŭ, padzieł uładaŭ, niezaležnaść sudovaj sistemy, kantrol za dziejnaściu siłavych struktur, svaboda słova i adsutnaść cenzury, mocnaje vojska i hodnaje piensijnaje zabieśpiačeńnie.
Michalevič vystupaje za rasfarmavańnie KDB i stvareńnie na jaho miescy novaj słužby biaśpieki. Za skasavańnie ideałahičnych upraŭleńniaŭ. Za madernizavanaje vojska, asnaščanaje sučasnym uzbrajeńniem i pieraviedzienaje na prafiesijnuju asnovu. Michalevič abiacaje vajskoŭcam pavyšeńnie sacyjalnaha statusu i palapšeńnie žyllovych umovaŭ.
Michalevič zastajecca prychilnikam zbałansavanaj źniešniaj palityki. Razam z tym, hałoŭnymi zadačami tut jon bačyć aktyvizacyju palityčnych adnosin, jakija majuć na mecie dostup da zachodnich rynkaŭ, technałohij i inviestycyj. Jon vystupaje za najchutčejšaje ŭstupleńnie da Suśvietnaj handlovaj arhanizacyi. Što da dałučeńnia da Jeŭrasajuza, to palityk realistyčna aceńvaje našy šancy jak addalenyja. Pytańnie ab ustupleńni Biełarusi ŭ ES musić razhladacca z ulikam kankretnaj ekanamičnaj i hieapalityčnaj situacyi.
Važnaje miesca ŭ prahramie zajmaje ekałahičny aśpiekt. Kandydat Michalevič rezka suprać pabudovy ŭ Biełarusi AES. Jon ličyć, što Biełarusi pa siłach stać adnym ź jeŭrapiejskich centraŭ zialonaha ruchu. Michalevič zajaŭlaje pra nieabchodnaść na ŭzroŭni dziaržavy stvaryć pieradumovy da niedapuščeńnia niehumannaha abychodžańnia z žyviołami.
Aktyŭnaje hramadstva niemahčymaje biez samakiravańnia. Michalevič abiacaje decentralizacyju palityčnaj, ekanamičnaj i finansavaj ułady na karyść rehijanalnaj.
Jon abiacaje padzialić šeść sučasnych abłaściej na 17 administracyjnych adzinak — pavietaŭ — z centrami ŭ Breście, Pinsku, Mazyry, Homieli, Hrodnie, Baranavičach, Słucku, Babrujsku, Lidzie, Maładziečnie, Barysavie, Mahilovie, Kryčavie, Hłybokim, Połacku, Viciebsku i ŭ Oršy.
U śfiery adukacyi Michalevič abiacaje skasavać prymusovaje raźmierkavańnie, u miedycynie — pryniaćcie zakona ab abaronie pravoŭ pacyjenta. Relihijnym arhanizacyjam jon abiacaje biaspłatnuju ziamlu pad cerkvy i šyrokija mahčymaści dla misijanierskaj dziejnaści.
Kulturnaja Biełaruś — heta pašyreńnie śfiery ŭžyvańnia biełaruskaj movy, adnaŭleńnie i restaŭracyja historyka-kulturnych kaštoŭnaściej, konkursnaja padtrymka tvorčych ludziej.
Nadzvyčaj važnaj umovaj dla zachavańnia biełaruskaj identyčnaści źjaŭlajecca supracoŭnictva z dyjasparaj. Michalevič vystupaje za ŭviadzieńnie Karty biełarusa i abiacaje šyrokuju aŭtanomiju, pravy na zachavańnie i raźvićcio nacyjanalnych, duchoŭnych kaštoŭnaściej pradstaŭnikam nacyjanalnych mienšaściaŭ Biełarusi.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie47
Kamientary