Usio vyrašycca ŭ druhim tury. U Francyi prajšoŭ pieršy tur municypalnych vybaraŭ

Hałoŭnaje farmalnaje adroźnieńnie municypalnych vybaraŭ hetaha hoda ad hałasavańnia 2020 hoda — heta paraŭnalna vysokaja jaŭka. Šeść hadoŭ tamu, u razhar pandemii karanavirusa, na ŭčastki pryjšli mienš za 45% vybarščykaŭ, zaraz ža hety pakazčyk pieravysiŭ 57%.

Hałasavańnie prachodziła pa praparcyjnaj sistemie. Dla trapleńnia ŭ druhi tur partyjnamu śpisu nieabchodna atrymać jak minimum 10% hałasoŭ.

Najbolš uvahi było prykavana da Paryža. Mer stalicy, sacyjalistka An Idalho, nie stała vyłučacca na treci termin.

U pieršym tury pieršaje miesca z surjoznym adryvam zaniaŭ sacyjalist Emanuel Hrehuar (38,3%). Kandydat ad pravych, eks-ministr justycyi Rašyda Daci — na druhim miescy z 26% hałasoŭ. U druhi tur taksama prajšli Safija Šykiru (ultralevaja «Niepakoranaja Francyja», 11,3%), centryst Pjer-Iŭ Burnaziel (11,2%) i Sara Knafo, jakaja ź ciažkaściu pieraadoleła 10% barjer (ultrapravaja «Rekankista»).

Los vybaraŭ vyrašycca ŭ druhim tury, i kandydaty bolš za ŭsio havorać pra mahčymyja kaalicyi. Hrehuar papraknuŭ svaju sapiernicu Daci ŭ tym, što jana tak i nie skazała, ci budzie abjadnoŭvacca z ultrapravymi. U svaju čarhu, «makranist» Burnaziel hatovy akazvać padtrymku pravym tolki ŭ tym vypadku, kali jany nie stanuć supracoŭničać z nacyjanalistami. Rašyda Daci miž tym zajaviła, što zaraz «nie čas dla raskołu» i zaklikała da abjadnańnia «ŭsich, chto nie choča levych siektantaŭ va ŭładzie».

U Haŭry sa značnym adryvam lidziruje eks-premjer Eduar Filip, jaki ŭžo raniej zajaviŭ, što prymie ŭdzieł u prezidenckich vybarach.

Pa apytańniach, u 2027 hodzie ŭ jaho bolš za ŭsio siarod pravacentrystaŭ šancaŭ vyjści ŭ druhi tur prezidenckaj honki.

U pieršym tury Filip nabraŭ 43,8% hałasoŭ. Kamunist Žan-Pol Lekok atrymaŭ 33,2%, ultrapravy palityk Frank Kieler — 15,3%

U Nicy, jak i čakałasia, lidziruje z 43,2% ultrapravy palityk Eryk Śjoci, jaki zaručyŭsia padtrymkaj «Nacyjanalnaha abjadnańnia». Centryst Kryścijan Estrozi atrymaŭ 30,3%.

U Nancie razhortvajecca baraćba pamiž sacyjalistkaj Žaanaj Rałan (35,4%) i Fulkom Šambaram de Ło («Respublikancy», 33,8%). «Niepakoranaja Francyja», ź jakoj sacyjalisty pierad pieršym turam admovilisia supracoŭničać, praviała svajho kandydata Viljama Akana ŭ druhi tur z 11,3%. Ultralevyja ŭžo prapanavali Žaanie Rałan stvaryć «antyfašyscki front» i abjadnać śpisy ŭ druhim tury.

U Marseli z takoj ža prapanovaj da pravych źviarnuŭsia pradstaŭnik ultrapravaha «Nacyjanalnaha abjadnańnia» Frank Alizio, jaki zaniaŭ druhoje miesca z 34,3%. Lidziruje paśla pieršaha tura sacyjalist Bienua Pajan (36,8%).

«Abjadnajemsia, kab pieramahčy levych i ultralevych», — zajaviŭ Alizio.

U pieršym tury ultralevaja «Niepakoranaja Francyja» vystupiła lepš, čym čakałasia. Lidar partyi Žan-Luk Miełanšon, ź jakim admovilisia supracoŭničać sacyjalisty z-za jaho antysiemickich zajaŭ i ahresiŭnaj rytoryki, zajaviŭ, što «Niepakoranaja Francyja» spadziajecca na pieramohu ŭ Lile i Tułuzie, a taksama zadavolena vynikami ŭ Paryžy, Lijonie i Marseli. Jon zaklikaŭ «tradycyjnych levych» ustupić u šyrokuju kaalicyju, kab pieramahčy pravych i ultrapravych. «»Niepakornaja Francyja» pracuje nad farmavańniem adzinaha frontu dla razhromu pravych i krajnie pravych. Praciahnutuju ruku nieabchodna pryniać», — zajaviŭ Miełanšon.

«Nacyjanalnaje abjadnańnie» taksama zadavolena pieršym turam. Akramia pośpiechu ŭ Marseli i Nicy, ultrapravyja damahlisia pieravybrańnia meraŭ, jakija pradstaŭlajuć partyju, u niekalkich haradach, u tym liku ŭ Pierpińjanie. Taksama «Nacyjanalnamu abjadnańniu» ŭdałosia atrymać pieramohu adrazu ŭ pieršym tury ŭ troch haradach na poŭnačy krainy.

Druhi tur municypalnych vybaraŭ projdzie ŭ niadzielu, 22 sakavika. Heta apošniaje bujnaje hałasavańnie pierad prezidenckimi vybarami 2027 hoda.

• 1
• 0
• 0
• 0
• 0
• 0
• 0
• 0