Litoŭcy nie buduć tranślavać adkryćcio Paralimpijady praz udzieł biełarusaŭ i rasijan

U suviazi z udziełam Rasii i Biełarusi litoŭski hramadski televiaščalnik LRT nie budzie tranślavać cyrymoniju adkryćcia zimovych Paralimpijskich hulniaŭ, piša Delfi.lt.

Paśla taho jak Mižnarodny paralimpijski kamitet (MPK) dazvoliŭ rasijskim i biełaruskim spartsmienam udzielničać u sioletnich zimovych Paralimpijskich hulniach pad ściahami svaich krain, Litoŭskaje nacyjanalnaje radyjo i telebačańnie (LRT) abviaściła, što nie budzie tranślavać cyrymoniju adkryćcia Hulniaŭ.

«My rady mahčymaści tranślavać Paralimpijskija hulni litoŭskim hledačam, asabliva sioleta, kali paśla doŭhaha pierapynku ŭbačym i pradstaŭnika našaj krainy. Adnak my nie možam pahadzicca z rašeńniem Mižnarodnaha paralimpijskaha kamiteta dazvolić rasijskim i biełaruskim spartsmienam vystupać pad svaimi ściahami i dałučajemsia da inicyjatyvy bałtyjskich viaščalnikaŭ nie tranślavać cyrymoniju adkryćcia», — skazaŭ namieśnik hienieralnaha dyrektara hramadskaha viaščalnika Hicis Ahanaŭskas.

Cyrymoniju taksama nie buduć tranślavać hramadskija viaščalniki Łatvii, Estonii i Finlandyi.

«Heta rašeńnie było pryniata paśla viartańnia rasijskich i biełaruskich spartsmienaŭ na Paralimpijskija hulni, jakija buduć pradstaŭlać svaje krainy», — havorycca ŭ zajavie.

Litoŭskaja delehacyja taksama nie budzie ŭdzielničać u cyrymonii adkryćcia — adziny pradstaŭnik Litvy, Rapołas Misiavičus, nie budzie pradstaŭleny na adkryćci. Paralimpijski kamitet Litvy vystupiŭ z zajavaj, u jakoj adznačajecca, što ahresaram nie miesca na Hulniach.

Zimovyja Paralimpijskija hulni projduć z 6 da 15 sakavika ŭ tych ža łakacyjach poŭnačy Italii, dzie prachodziła Alimpijada, 

Na pačatku minułaha tydnia MPK dapuściŭ biełaruskich i rasijskich. spartoŭcaŭ da Paralimpijady, tamu čatyry biełaruskija i šeść rasijskich spartoŭcaŭ zmohuć vystupić pad svaimi dziaržaŭnymi ściahami.

Čatyry biełaruskija kvoty pryznačanyja dla łyžnych honak. Rasija atrymała pa dva miescy ŭ harnałyžnym sporcie, łyžnych honkach i snaŭbordzie.

Spartoŭcy voźmuć udzieł u šaści vidach sportu ŭ dźviuch katehoryjach: vidy sportu na śniezie (hornyja łyžy, biehavyja łyžy, bijatłon i snaŭbord) i vidy sportu na lodzie (chakiej na saniach i kiorlinh na vazkach).

Padčas Paralimpijady-2022 (4—13 sakavika 2022) biełaruskija i rasijskija spartoŭcy byli adchilenyja ad spabornictvaŭ praz pačatak poŭnamaštabnaj vajny. Pryčym jany byli adchilenyja za dzień da pačatku spabornictvaŭ.

Da ŭdziełu ŭ zvyčajnych Alimpijadach 2024 i 2026 hadach rasijskija i biełaruskija spartsmieny dapuskalisia ŭ niejtralnych statusie biez vykarystańnia ściahu i himna, pryčym udzieł bijatłanistaŭ i chakieistaŭ byŭ zabaronieny.

• 1
• 0
• 1
• 1
• 0
• 0
• 0
• 0