Viačorka patłumačyŭ, jak składajucca śpisy haściej na pryjom da prezidenta Polščy
Daradca Cichanoŭskaj adkazaŭ na pretenzii nakont zaprošanych na śviatočnaje mierapryjemstva.
Apošnija hady pradstaŭnikoŭ biełaruskaj dyjaspary štohod zaprašajuć na śviatočny kaladny pryjom u prezidencki pałac u Varšavie. Hetym razam u fejsbuku razharełasia dyskusija z nahody taho, što niekatoryja nie trapili ŭ śpisy zaprošanych. Usio tamu, ličać tyja, kaho nie paklikali na pryjom, što jany niełajalnyja Ofisu Cichanoŭskaj i tamu ich vykraślili sa śpisaŭ.
Daradca Cichanoŭskaj Franak Viačorka vyrašyŭ adkazać na pretenzii.
Viačorka ŭ fejsbuku tłumačyć, što kaladny pryjom u Vilni arhanizuje Ofis Cichanoŭskaj, a ŭ Varšavie — prezidencki pałac.
«Ideja kaladnych pryjomaŭ u prezidenta Polščy źjaviłasia naprykancy 2021 hoda, kali prezident Andžej Duda prapanavaŭ Śviatłanie Cichanoŭskaj pravieści supolnaje mierapryjemstva dla biełarusaŭ u Polščy — tak i była zakładziena hetaja tradycyja. Uvosień 2025 hoda Śviatłana Cichanoŭskaja prapanavała novamu prezidentu Polščy Karalu Naŭrockamu tradycyju praciahnuć», — piša Viačorka.
Jon źviartaje ŭvahu, što ŭ roznyja hady na pryjomach byli ŭ tym liku Zianon Paźniak, Natalla Radzina, Pavieł Usaŭ, jakija zajmajuć adroznuju ad Cichanoŭskaj pazicyju.
«Padrychtoŭkaj pryjomaŭ i mastackaj častki ź biełaruskaha boku tradycyjna zajmajecca pradstaŭnictva pa nacyjanalnym adradžeńni Abjadnanaha pierachodnaha kabinieta — ciapier heta Irena Kaciałovič i Pavieł Barkoŭski. Śpisy haściej farmujucca supolna polskim i biełaruskim bokam.
Niaprostaja zadača biełaruskaha boku — zrabić śpis inkluziŭnym, zachavać bałans i pradstaŭnictva, nie pakryŭdzić nikoha i razam z tym dać mahčymaść trapić na pryjom novym ludziam.
Tak, letaś byli zaprošanyja spartoŭcy, sioleta — niadaŭna vyzvalenyja palitviaźni».
«Kali pahladzieć na skład udzielnikaŭ pa fotazdymkach, to havaryć pra niejki favarytyzm nie vypadaje: na pryjomie možna ŭbačyć pobač ludziej, jakija ŭ publičnaj prastory adkryta kanfliktujuć pamiž saboj», — ličyć daradca Cichanoŭskaj.
Jon dadaje, što kančatkovaje rašeńnie pa śpisie ŭdzielnikaŭ zastajecca za polskim bokam.
«Prapanovy ź biełaruskaha boku daloka nie zaŭsiody prymajucca. U minułyja hady my, naprykład, sprabavali zaprasić niekatorych pradstaŭnikoŭ Ofisa, ale atrymlivali admovu».
«Akramia taho, paśla ŭzhadnieńnia śpisaŭ usimi instytucyjami adbyvajecca pravierka polskimi słužbami biaśpieki, što taksama skaračaje kolkaść zaprošanych», — dadaŭ Viačorka.
«Davajcie nie svarycca, a pracavać nad tym, kab takich mierapryjemstvaŭ stanaviłasia bolš i kab u budučyni chapała miescaŭ usim», — piša jon. I adznačaje, što varta być udziačnymi Polščy za toje, što jana prymaje biełarusaŭ i štohod robić takoje simvaličnaje śviata.
Kamientary
Bolš za tryccać hadoŭ jak im tłumačyš, a jany dahetul nie razumnieli.