«Maleńki hieroj». Chłopčyk vyratavaŭ siabie i maci, jakaja straciła prytomnaść za rulom na trasie
12‑hadovy chłopčyk z Uelsa ŭ Vialikabrytanii zmoh skiravać aŭtamabil svajoj maci ŭ biaśpiečnaje miesca, kali jana straciła prytomnaść za rulom na ažyŭlenaj darozie, piša Bi-bi-si.
Nikała Kramp z horada Ebu-Viejł jechała trasaj A40 razam z synam Zakam, kali joj raptam stała drenna i jana źnieprytomnieła.
Zak, jaki siadzieŭ na pasažyrskim siadzieńni, zmoh uchapicca za rul i nakiravać mašynu na centralnuju raździalalnuju pałasu.
«Usio, što ja pamiataju, — heta jak pračnułasia ŭžo pa druhi bok darohi, nie razumiejučy, što adbyłosia», — raspaviała Nikała.
U subotu Nikała nakiroŭvałasia na kaladny kirmaš u Birminhiem i kaža, što Zak paprasiŭsia pajechać ź joj u apošni momant paśla taho, jak jaje siabroŭka była vymušana admovicca ad pajezdki praz chvarobu.
«My dajechali da Ros-on-Uaja, kali mnie stała vielmi horača», — raspaviała jana ŭ efiry BBC Radio Wales Breakfast i dadała, što źjechała z darohi i ŭklučyła avaryjnuju sihnalizacyju.
«My stajali ŭ vielmi niebiaśpiečnym miescy, bo tam nie było abočyny», — skazała Nikała.
Kali jana źnieprytomnieła, jaje naha nacisnuła na piedal hazu, aŭtamabil razahnaŭsia amal da 100 km/h i praciahnuŭ ruch pa dźviuchpałosnaj darozie. Zak raspavioŭ, što sprabavaŭ rasšturchać maci, ale, zrazumieŭšy, što heta nie atrymlivajecca, vyrašyŭ uziać kiravańnie na siabie.
Jon źmienšyŭ chutkaść aŭto na travianistaj pałasie ŭzdoŭž darohi, a potym spyniŭ mašynu, vyklučyŭ ruchavik i patelefanavaŭ u ekstrannyja słužby.
«Mnie było vielmi strašna, ale ja viedaŭ, što mušu niešta zrabić», — raspavioŭ chłopčyk.
«Kali ja razmaŭlaŭ pa telefonie z 999, ja ŭbačyŭ, što ŭ jaje ruchajecca žyvot, tamu zrazumieŭ, što jana dychaje», — dadaŭ Zak.
«Jon uvieś čas mianie supakojvaŭ. Kazaŭ: «Usio dobra, mama, nie panikuj, z taboj usio ŭ paradku»», — dadała Nikała.
Nieŭzabavie na miesca prybyli palicyja i paramiedyki. Nikału ahledzieli na miescy i paźniej paviedamili, što ŭ jaje byŭ vielmi nizki arteryjalny cisk.
Ni Nikała, ni Zak nie atrymali traŭmaŭ, i, chacia aŭtamabil byŭ paškodžany, jaho možna budzie adramantavać.
Jany čakali svajakoŭ razam z paramiedykami, a potym zajšli ŭ kaviarniu pablizu, dzie Zak atrymaŭ biaspłatny napoj ad piersanału, jaki pačuŭ pra jaho śmiełaść.
Nikała skazała, što dla jaje vielmi niezvyčajna stračvać prytomnaść, i pierad tym, jak znoŭ sieści za rul, jana projdzie dadatkovyja abśledavańni.
Pavodle jaje słoŭ, palicejskija byli ŭražanyja tym, nakolki spakojnym zastavaŭsia Zak, prasłuchaŭšy zapis zvanka na 999.
Jana raspaviała, što jany zaprasili Zaka ŭ svajo ŭpraŭleńnie ŭ Vustery, kab uručyć jamu siertyfikat za prajaŭlenuju mužnaść.
Nikała nazvała syna svaim «maleńkim hierojem», adznačyŭšy, što jaho spakojnaja reakcyja i chutkaje myśleńnie nie dali ich niaŭdałaj kaladnaj pajezdcy skončycca značna bolš surjoznaj avaryjaj.
Ciapier čytajuć
Kvadrat u Minsku kaštuje rekordna doraha: narešcie pabity rekord 2007 hoda1
Kamientary