Apublikavali novuju partyju materyjałaŭ pa spravie Epštejna. Tam znoŭ zhadvajecca Tramp
Ministerstva justycyi ZŠA apublikavała ŭžo vośmuju partyju materyjałaŭ pa spravie finansista Džefry Epštejna. Hetym razam havorka idzie pra samy vialiki abjom dakumientaŭ za ŭvieś čas: kala 10 hihabajtaŭ danych, jakija ŭklučajuć tysiačy fajłaŭ — videa, aŭdyjazapisy, fotazdymki, śledčyja materyjały, tablicy z dokazami i hazietnyja vyrazki. Siarod ich amal 400 videazapisaŭ, piša Bi-bi-si.
U adnym z apublikavanych elektronnych listoŭ śćviardžajecca, što Donald Tramp lotaŭ na pryvatnym samalocie Epštejna značna čaściej, čym ličyłasia raniej. List datavany 7 studzienia 2020 hoda i ŭvachodzić u pierapisku, pryśviečanuju pieralotam Epštejna. Aŭtary lista nie nazvanyja, ale ŭnizie staić podpis pamočnika fiederalnaha prakurora Paŭdniovaj akruhi Ńju-Jorka z zaciortym imieniem.
Zhodna z hetym dakumientam, Tramp byŭ paznačany jak pasažyr minimum vaśmi rejsaŭ u pieryjad z 1993 pa 1996 hod. Na častcy ź ich taksama prysutničała siabroŭka Epštejna Hiślejn Makśvieł. U liście zhadvajecca, što Tramp lotaŭ razam z Marłaj Mejpłz, dačkoj Tyfani i synam Erykam.
Na adnym z rejsaŭ u 1993 hodzie ŭ śpisie pasažyraŭ značylisia tolki Tramp i Epštejn, a na inšym — jašče adzin małady čałaviek, imia jakoha zaciortaje. Taksama zhadvajucca dva rejsy, na jakich prysutničali žančyny, što mahli być śviedkami pa spravie Makśvieł.
Publikacyja dakumientaŭ adbyvajecca ŭ miežach «Zakona ab prazrystaści fajłaŭ Epštejna», pryniataha ŭ listapadzie. Jon abaviazvaŭ Miniust ciaham 30 dzion apublikavać usie materyjały spravy ŭ zručnym dla pošuku farmacie, prybraŭšy źviestki, jakija mohuć raskryć asoby paciarpiełych. Adnak z-za vialikaha abjomu infarmacyi viedamstva zajaviła, što budzie rabić heta pastupova.
Ministerstva justycyi ZŠA krytykujuć jak zakanadaŭcy, tak i achviary Epštejna: mnohija staronki akazalisia całkam zafarbavanyja čornym, i, na ich dumku, apublikavanaja tolki niaznačnaja častka najaŭnych materyjałaŭ. Situacyja ŭskładniła palityčnaje stanovišča Donalda Trampa: niekalki kanhresmienaŭ, u tym liku z Respublikanskaj partyi, pahražajuć sudovymi pazovami z-za niedastatkovaj prazrystaści publikacyj.
Sam Tramp upieršyniu prakamientavaŭ «daśje Epštejna», nazvaŭšy dyskusii vakoł jaho sprobaj adciahnuć uvahu ad dasiahnieńniaŭ svajoj partyi. Jon pryznaŭ, što byŭ znajomy z Epštejnam i što isnujuć fotazdymki ź ich sumiesnaj prysutnaściu, ale nastojvaje, što nie ździajśniaŭ nijakich supraćpraŭnych dziejańniaŭ. Raniej Tramp zajaŭlaŭ, što ich siabroŭstva skončyłasia jašče ŭ pačatku 2000-ch, zadoŭha da pieršaha aryštu Epštejna.
Finansista Džefry Epštejna abvinavačvali ŭ handli ludźmi z metaj ich seksualizavanaj ekspłuatacyi. Pavodle viersii śledstva, biznesmien atrymlivaŭ seksualnyja pasłuhi ad niepaŭnaletnich dziaŭčat i «pazyčaŭ» ich upłyvovym ludziam.
U 2008 hodzie jon pryznaŭ vinu pa spravie ab padbuchtorvańni da prastytucyi, u tym liku ŭ dačynieńni da niepaŭnaletnich, i byŭ asudžany da 18 miesiacaŭ źniavoleńnia, jakija adsiedzieŭ nie całkam. U 2011 hodzie Epštejn vyjšaŭ na volu, adbyŭšy 13 miesiacaŭ u turmie.
7 lipienia 2019 hodzie jaho znoŭ aryštavali, a praź miesiac, 10 žniŭnia, biznesmien ździejśniŭ samahubstva ŭ turemnaj kamiery ŭ Ńju-Jorku. Jamu pahražała da 45 hadoŭ źniavoleńnia, i suprać finansista hatovyja byli śviedčyć dziasiatki śviedkaŭ i paciarpiełych.
Donald Tramp i Džefry Epštejn siabravali na praciahu mnohich hadoŭ, ale ŭ siaredzinie 2000-ch, jak kazaŭ Tramp, pasvarylisia.
Raniej siabroŭstva z Epštejnam i ŭdzieł u jaho seks-viečarynkach kaštavali tytuła prynca bratu karala Vialikabrytanii Karła III Endru.
Bił Klintan, Majkł Džeksan i Mik Džahier. Kaho možna znajści ŭ novych dakumientach sa spravy Džefry Epštejna
Apublikavali novyja fota z archiva Džefry Epštejna. Na ich jość i Tramp
Tramp padpisaŭ zakon ab publikacyi «fajłaŭ Epštejna»
Pałata pradstaŭnikoŭ ZŠA prahałasavała za raskryćcio «fajłaŭ Epštejna». Sienat pryniaŭ hetuju pastanovu biez abmierkavańnia
Tramp, Pucin, homaseksualnyja kantakty i inšyja brudnyja namioki — u ZŠA apublikavali 20 tysiač fajłaŭ Epštejna
«Hienierał Biada vylecieŭ praz bakavoje škło «Čajki». Małaviadomaja avaryja 1976 hoda, u jakoj zahinuli druhi čałaviek u BSSR i bajavy lotčyk-hienierał33
Kamientary
I za ekanamičnyja złačynstva, za chabar pornaaktrysie Stormi Deniełs (jon ź joj zdradziŭ svajoj žoncy, kali nie viedali). I darečy. Klintan dobra ŭ svoj čas siabravaŭ z Trampam. Davoli ciesnyja stasunki ŭ ich byli. Heta vam pra štości kaža?
Tramp — dziejučy prezident, i tamu ŭvaha da jaho adpaviednaja.