Butan vydzielić 10 tysiač bitkojnaŭ na raźvićcio futurystyčnaha «Horada ŭśviadomlenaści»
Butan inviestuje 10000 bitkojnaŭ (kala miljarda dalaraŭ) z reziervu nacyjanalnaj kryptavaluty ŭ raźvićcio «Horada ŭśviadomlenaści Hielepchu». Maleńkaje himałajskaje karaleŭstva spadziajecca, što hety horad stanie nacyjanalnym ekanamičnym chabam, piša Bi-bi-si.
Butan — nievialikaja himałajskaja kraina, jakaja nie maje vychadu da mora i zacisnutaja pamiž dvuma hihantami, Indyjaj i Kitajem.
Nasielnictva pieravažna budysckaje i składaje kala 700 tysiač čałaviek. Heta pieravažna ahrarnaja kraina, u jakoj mała pryrodnych resursaŭ i amal adsutničaje pramysłovaść. Ekspart elektraenierhii, u asnoŭnym hidraelektraenierhii, u Indyju — źjaŭlajecca klučavym siektaram butanskaj ekanomiki.
Urad prasoŭvaje palityku pryjarytetu «vałavoha nacyjanalnaha ščaścia» nad ekanamičnym rostam, ale, jak adznačaje AFP, heta nie dapamahaje jamu spravicca z masavym biespracoŭjem, z-za jakoha tysiačy maładych ludziej vymušanyja pakidać krainu.
Dziaržava sprabuje źmianić hetuju tendencyju i pryciahnuć zamiežnyja inviestycyi.
Kraina prasoŭvaje hidraenierhietyčnyja prajekty, atrymlivajučy značnyja dachody za košt ekspartu elektraenierhii ŭ Indyju, i adnačasova vykarystoŭvaje tannuju elektraenierhiju dla raźvićcia majninhu kryptavalut, asabliva bitkojna.
Butan pačaŭ aktyŭna nabyvać kryptavalutu jašče ŭ 2019 hodzie. Pa dadzienych Suśvietnaha banka, u 2021‑2022 hadach dziaržaŭnaja kampanija Druk Holding and Investments (DHI) inviestavała 539 miljonaŭ dołaraŭ — amal piatuju častku ahulnaha VUP — u kryptavalutnyja apieracyi.
Z tych časoŭ kraina sfarmavała značnyja kryptavalutnyja reziervy, choć ich dakładny košt nie razhałošvajecca. Pa dadzienych Arkham Intelligence, zaraz karaleŭstva vałodaje 5 984 BTC koštam bolš za 522 miljony dalaraŭ, zajmajučy siomaje miesca ŭ śviecie siarod suvierennych trymalnikaŭ bitkojna.
U 2023 hodzie ŭrad abviaściŭ ab płanach stvaryć «Horad uśviadomlenaści Hielepchu» (Gelephu Mindfulness City) — śpiecyjalnaj ekanamičnaj zony na poŭdni krainy, kala miažy ź Indyjaj.
Sam horad z nazvaj Hielepchu ŭžo isnuje, jon byŭ zasnavany ŭ 2010 hodzie, i zaraz jaho płanujuć raźvivać jak urbanistyčny prajekt z nulavym vykidam vuhlarodaŭ.
Karol Butana Džyhmie Kchiesar Namhjał Vanhčuk zajaviŭ u 2023 hodzie, što Hielepchu stanie «horadam uśviadomlenaści, jaki abjadnoŭvaje ŭśviadomleny i ŭstojlivy biźnies, natchniony budysckaj duchoŭnaj spadčynaj».
«Jak vaš karol ja pavinien zabiaśpiečyć, kab kožny butaniec byŭ zachavalnikam, udzielnikam i bienieficyjaram GMC, — zajaviŭ jon užo ŭ hetym hodzie, u sieradu, u pramovie z nahody nacyjanalnaha dnia krainy. — U padtrymku hetaj palityki ja abjaŭlaju siońnia ab vyłučeńni da 10 000 bitkojnaŭ ahulnym koštam prykładna 1 miljard dołaraŭ. Dziela našaha naroda, našaj moładzi i našaj nacyi».
U hetym hodzie GMC paznačyŭ bitkojn, Ethereum i BNB u jakaści stratehičnych reziervaŭ, u mai zaklučyŭ partniorstva z Binance Pay dla zabieśpiačeńnia kryptapłaciažoŭ u turystyčnym siektary i intehravaŭ nacyjanalnuju ličbavuju sistemu identyfikacyi z Ethereum.
Takim čynam Butan staŭ pieršaj krainaj, jakaja zamacavała sistemu identyfikacyi ŭ maštabie ŭsiaho nasielnictva na publičnym błokčejnie.
Na minułym tydni GMC zapuściŭ TER — ličbavy tokien, zabiaśpiečany zołatam, na błokčejnie Solana. Butanski DK Bank vystupaje jaho ekskluziŭnym dystrybjutaram.
Člen savieta dyrektaraŭ GMC Džyhdreł Sinhaj paviedamiŭ vydańniu Decrypt, što Butan nie płanuje pradavać bitkojny i raźličvaje na rost ich koštu.
«Padychod budzie vyznačany ŭ bližejšyja miesiacy. Siarod razhladanych varyjantaŭ — vykarystańnie bitkojn-reziervaŭ karaleŭstva ŭ jakaści zakładu, stratehii kiravańnia kaznačejstvam i dachodnaściu z kantralavanymi ryzykami, a taksama naŭmysnaje doŭhaterminovaje zachoŭvańnie, nakiravanaje na zachavańnie i abaronu koštu ličbavych aktyvaŭ», — rastłumačyŭ jon.
Butan spadziajecca abjadnać vysokatechnałahičnyja inavacyi z budysckimi duchoŭnymi tradycyjami, adnačasova zrabiŭšy ekanomiku bolš technałahičnaj i pry hetym zastavacca «ŭ harmonii» z kaštoŭnaściami budyzmu.
Pradstaŭniki «Horada ŭśviadomlenaści» kažuć, što inicyjatyva budzie spryjać stvareńniu pracoŭnych miescaŭ, ekanamičnamu raźvićciu i ŭmacavańniu «nacyjanalnaj ustojlivaści».
Udzielničać u prajekcie zmohuć hramadzianie Butana z usich dzonhchahaŭ (rehijonaŭ): novaja ziamielnaja palityka budzie razhladać ich jak akcyjanieraŭ prajekta.
«Ujavicie GMC jak kampaniju, a ziemleŭładalnikaŭ — jak jaje akcyjanieraŭ, — skazaŭ karol. — Pakolki bolšaja častka ziamli naležyć dziaržavie, butancy z usich dzonhchahaŭ buduć udzielničać u jaho pośpiechu».
Kamientary