U śpis kulturnaj spadčyny JUNIESKA ŭklučyli ŭsiu italjanskuju nacyjanalnuju kuchniu. Heta pieršy taki vypadak u historyi
JUNIESKA aficyjna pryznała italjanskuju kuchniu častkaj niemateryjalnaj kulturnaj spadčyny čałaviectva. Heta histaryčnaje rašeńnie było abvieščana na pasiadžeńni arhanizacyi ŭ stalicy Indyi Deli i było ŭchvalena premjer-ministarkaj Italii Džordžaj Miełoni. Jaje ŭrad apošnija hady aktyŭna prasoŭvaŭ ideju ŭklučeńnia nacyjanalnaj kuchni ŭ śpis jak elemient nacyjanalnaj identyčnaści, piša The Guardian.
Italija stała pieršaj krainaj śvietu, dla jakoj u śpis uklučanaja nie adna kankretnaja tradycyja abo strava, a ŭsia kuchnia całkam — ad pasty i macareły da vina i tyramisu.
Da hetaha Italija ŭžo mieła 21 elemient u śpisie spadčyny JUNIESKA, u tym liku mastactva nieapalitanskaj picy i opierny śpieŭ.
Džordža Miełoni apublikavała videazvarot na Instagram litaralna praź niekalki chvilin paśla abviaščeńnia rašeńnia. Jana adznačyła, što pryznańnie napaŭniaje jaje honaram: dla italjancaŭ kuchnia — heta nie prosta ježa, a kultura, tradycyi, praca i važnaja častka nacyjanalnaj samaidentyčnaści.
Urad pačaŭ padrychtoŭku zajaŭki jašče ŭ 2022 hodzie, praź niekalki miesiacaŭ paśla prychodu da ŭłady. U dakumientach padkreślivałasia, što italjanskaja kuchnia — heta nie tolki kulinarnyja praktyki, a i ład žyćcia, sacyjalny rytuał, jaki abjadnoŭvaje siemji i supolnaści.
Siarod elemientaŭ prasoŭvańnia byŭ navat vialiki niadzielny siamiejny abied pad adkrytym niebam, jaki Miełoni i inšyja čynoŭniki praviali ŭvosień na terytoryi Rymskaha foruma.
JUNIESKA ŭ svajoj abjavie nazvała italjanskuju kuchniu «kulturnym i sacyjalnym sintezam kulinarnych tradycyj», sposabam kłapacicca pra siabie i inšych, prajaŭlać luboŭ i zachoŭvać karani. Padkreślivajecca jaje hramadski charaktar: za ahulnym stałom ludzi roznaha ŭzrostu dzielacca receptami, historyjami, siemji pieradajuć stravy z pakaleńnia ŭ pakaleńnie.
Ministr sielskaj haspadarki Italii Frančeska Łołabrydžyda zajaviŭ, što hetaja pieramoha — ahulnanacyjanalnaja, bo jana simvalizuje tvorčaść i zdolnaść italjancaŭ pieratvarać tradycyi ŭ sučasnaść.
Apublikavany ŭ toj ža dzień dakład Univiersiteta Sapijenca ŭ Rymie adznačaje, što status abjektaŭ JUNIESKA ŭžo pavialičyŭ patok turystaŭ na Uzhorki Prasieka ŭ Vienieta, na vostraŭ Pantelerija i inšyja abjekty, a ciapier, kali italjanskaja kuchnia trapiła ŭ śpis, turystyčny intares da krainy jašče bolš uzraście.
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju15
Kamientary