«Spačatku try hadziny my siadzieli ŭ samalocie». Jak biełarusy pakutujuć praz rehularnaje zakryćcio aeraporta ŭ Vilni
Bolš za ŭsio nie šancuje tym, chto ŭžo rychtavaŭsia ŭźlatać u aeraporcie Vilni, ale jaho zakryvajuć u apošni momant. Tady pačynajecca chaos, piša BGmedia.
U apošnija miesiacy aeraport Vilni pieryjadyčna zakryvajuć z-za mieteazondaŭ z kantrabandnymi cyharetami, jakija zapuskajuć ź Biełarusi. I heta prynosić vializny dyskamfort usim, chto lotaje na samalotach. Rejsy admianiajuć, zatrymlivajuć, pieranakiroŭvajuć. Siarod paciarpiełych i biełarusy. BGmedia sabrała historyi, jakimi jany dzialilisia ŭ čatach.
Jak biełarusy spraŭlajucca z rehularnym zakryćciom aeraporta Vilni
Bolš za ŭsio nie šancuje tym, chto ŭžo rychtavaŭsia ŭźlatać u aeraporcie, ale jaho zakryvajuć u apošni momant. Dla takich ludziej padarožža raściahvajecca nadoŭha.
Historyja biełarusa: «Heta była niesupynnaja viesiałość. U mianie samalot jakraz u 19.10 pavinien byŭ vylatać. A zakryli pavietranuju prastoru ŭ 18.55, ale pra heta nie adrazu stała viadoma. Spačatku my siadzieli try hadziny ŭ samalocie, potym u 22.00 nas adpravili nazad u terminał.
Usie rejsy admienieny, chaos poŭny. Niedzie da hadziny nočy stała viadoma, što naš rejs pieraniesieny na ranicu. La stojek Ryanair natoŭp ludziej, kab atrymać vaŭčar na hatel. Spačatku skazali, što pakojaŭ niama, potym da 2 hadzin nočy znoŭ stali razdavać. Uvohule, u 03.00 my zasialilisia, u 06.30 ustali na rejs, ale ŭsio roŭna lepš, čym u aeraporcie spać. Usie paznajomilisia i pasiabravali. Rejs vylecieŭ u 10.30 u vyniku.
Ad Ryanair pavinny prychodzić SMS, ale jany prychodziać časam nie ŭsim i častkova. Nie viedaju, ad čaho heta zaležyć, mnie pałova SMS nie pryjšła. U SMS ukazana, što na vaš boarding pass pryjšli hrošy, kab kupić papić i pajeści. Nočču heta było 4 jeŭra, ranicaj 13 jeŭra. Moža, kamuści dapamoža hetaja infarmacyja, prosta padychodźcie ŭ kaviarniu ŭ terminale i dajcie im praskanavać svoj boarding pass, na im budzie bačna, kolki hrošaj pryjšło. Heta na vypadak, kali chtości ŭ hetaj situacyi apyniecca. Dumaju, heta nie ŭ apošni raz było».
Składanaja situacyja i ŭ tych, chto źbiraŭsia lacieć u Vilniu i adtul jechać na aŭtobusie ŭ Biełaruś, a aeraport zakryli. Pasažyry siadziać hadzinami ŭ čakańni svajho rejsa. I dzielacca łajfchakami, jak zekanomić u takich situacyjach:
«U mianie zatrymali rejs z Frankfurta ŭ Vilniu ažno na 4 hadziny, tamu što znoŭ vilenski aeraport nie pracavaŭ z-za kantrabandnych šaroŭ. Ja pieršapačatkova brała aŭtobus pa časie, kab było kala 6 hadzin pamiž prylotam i aŭtobusam. Nie zabyvajcie, što ciapier zima. Rejsy na vylet mohuć zatrymać z-za śniehu i inšych umoŭ nadvorja. Lepš rabicie zapas času».
«Siadžu ŭ aeraporcie Dublina. Zatrymku rejsa ŭ Vilniu abviaścili dva razy. Ahułam užo bolš za try hadziny zatrymki. Dobra, što bilet na aŭtobus nie ŭziała».
Krychu bolš šancuje tym, čyje rejsy pieranosiać u aeraport Kaŭnasa. Tady płan pajezdki nie kančatkova rušycca. Tym bolš, što ludziej zavoziać u hety aeraport:
«Nam učora prapanavali alternatyvu — advieźli ŭ Kaŭnas i vylet u vyniku adbyŭsia adtul, zamiest Ryanair byli vienskija avijalinii. Noč była ciažkaj z-za zakryćcia aeraporta».
«My ŭžo ź Vilni hruzimsia ŭ aŭtobus u Kaŭnas. Adtul palacim u punkt pryznačeńnia. Arhanizavaŭ usio aeraport».
Ale ŭ niekatorych usio ž uźnikajuć prablemy z tym, kab dabracca z Kaŭnasa ŭ Vilniu. Sistema kampiensacyi srodkaŭ adładžana nieidealna:
«U mianie była takaja situacyja, kampiensacyja — bilet na aŭtobus da Vilni za 7 jeŭra. Šukali i łavili bilety na «Ekałajns» sami, bilet byccam byŭ 7 jeŭra — i heta ŭsio, što mahli kampiensavać, nie taksi!
Aŭtobus nam nie pradastavili, spasłaŭšysia na toje, što šmat rejsaŭ pasadzili ŭ Ryzie, i, maŭlaŭ, niama svabodnych aŭtobusaŭ. Ni vady, ni ježy nie było, ale ja była pieršaadkryvalnikam, skažam tak, u kastryčniku…
Plus stračany bilet Vilnia — Minsk, plus kuplała novy… ale heta ŭžo maja prablema, jany tolki da Vilni, tak pavinny nibyta ž byli sieści ŭ Vilni, hety punkt kančatkovy, i tolki za aŭtobus!»
Biełarusy zaraz vyvučajuć prahnoz nadvorja, kab acanić vierahodnaść zakryćcia aeraporta Vilni
Miarkujučy pa paviedamleńniach u pryhraničnych čatach, biełarusy aktyŭna cikaviacca mieteazondami z kantrabandaj ź Biełarusi. Niekatoryja navat pačali hladzieć prahnoz nadvorja i źviartać uvahu na napramak i chutkaść vietru, kab aceńvać vierahodnaść zakryćcia aeraporta.
Niekatoryja analizujuć zakryćcio aeraporta i aceńvajuć vierahodnaść, kali jon dakładna budzie pracavać.
«Treba jašče ŭličyć, što ŭ aŭtorak, sieradu i čaćvier šary nie zapuskajuć, adpačynak u ludziej».
«Ja nie palenavałasia i sabrała na aficyjnym sajcie aeraporta ŭsie rejsy za apošnija 2 miesiacy, kab spać pierad pajezdkaj spakojna».
«Šary laciać ź viečara, tak što samyja vierahodnyja vokny na zakryćcio aeraporta — heta z 18.00 da 7 ranicy».
«Kali niešta lacić u napramku da aeraporta, to zakryvajuć. Apošnim časam navat da 5—7 ranicy. A voś što z admienaj — heta jak pašancuje, kali zakryjuć da palotu, to, chutčej za ŭsio, admiena/pieranos, kali padčas palotu, to mohuć nakiravać u Kaŭnas ci Ryhu, tak i nazad u miesca vyletu».
Kamientary