Mopsy, francuzskija i anhlijskija buldohi — hetyja parody daŭno zavajavali sercy miljonaŭ svaim niezvyčajnym vyhladam. Ich firmovyja plaskatyja pysy, vialikija vyraznyja vočy i miłyja zmorščynki stali simvałam «dyzajnierskich» sabak. Adnak mienavita hetyja rysy, jakija robiać ich takimi papularnymi, mohuć źniknuć na praciahu nastupnaha dziesiacihodździa.
Jak paviedamlaje Daily Mail, u Vialikabrytanii navukoŭcy i abaroncy žyvioł raspačali kampaniju, jakaja moža nazaŭždy źmianić abličča mopsaŭ, a taksama francuzskich i anhlijskich buldohaŭ. I hałoŭnaja pryčyna ŭ tym, što ich miłyja pysy i jość klučavoj prablemaj.
Plaskatyja mordy pryvodziać da surjoznych prablem z dychańniem — sabaki časta chrypiać, zadychajucca i drenna pieranosiać śpioku ci fizičnyja nahruzki. Vialikija, vypukłyja vočy schilnyja da traŭmaŭ i infiekcyj.
Heta pryčyniaje bol žyviołam i abychodzicca ŭładalnikam u vielizarnyja sumy na vieterynarnaje lačeńnie.
Kab pakłaści kaniec pakutam žyvioł, brytanskija navukoŭcy raspracavali novuju sistemu pad nazvaj «Acenka zdaroŭja, ułaścivaha ad naradžeńnia» (Innate Health Assessment, IHA). Heta 10‑balnaja škała, pa jakoj buduć aceńvać sabak pierad dopuskam da raźviadzieńnia.
Siarod prykmiet, jakija ličacca niepažadanymi i niebiaśpiečnymi dla zdaroŭja: vypukłyja vočy, praźmiernyja zmorščyny na skury, abvisłyja abo vyviernutyja pavieki, niapravilny prykus (niedakus abo pierakus), adsutnaść chvasta, skaročanyja abo skryŭlenyja łapy, niedastatkova ruchomy pazvanočnik, mierl-afarboŭka (plamista-marmurovy koler poŭści).
Zhodna z płanam, na pieršym etapie da raźviadzieńnia buduć dapuskacca tolki sabaki, jakija nabrali 8 z 10 bałaŭ. Praź piać hadoŭ patrabavańnie ŭzraście da 9 bałaŭ, a praź dziesiać hadoŭ — da 10 z 10.
Aŭtary inicyjatyvy ź Mižpartyjnaj hrupy pa dabrabycie žyvioł (APGAW) padkreślivajuć: meta nie ŭ tym, kab zabaranić mopsaŭ ci buldohaŭ, a ŭ tym, kab pierahledzieć ich aficyjnyja standarty i viarnuć žyviołam zdolnaść žyć biez chraničnych pakut.
Adzin z raspracoŭščykaŭ sistemy, doktar Den O'Nił z Karaleŭskaha vieterynarnaha kaledža nazyvaje hety padychod «revalucyjnym krokam». Pa jaho słovach, hramadstva «desiacihodździami było zahipnatyzavanaje»: ludzi časta miarkujuć, što kali sabaka čystakroŭny i «typovy dla parody», to jon aŭtamatyčna zdarovy — navat kali jaho źniešni vyhlad sam pa sabie vyklikaje chraničnyja pakuty.
Na hety momant sistema IHA źjaŭlajecca dobraachvotnaj, ale jaje ŭžo padtrymali bujnyja dabračynnyja arhanizacyi i brytanski Kieneł-kłub (Kennel Club, anałah kinałahičnych fiederacyj). Aktyvisty spadziajucca, što ŭrad zrobić hetuju acenku abaviazkovaj na zakanadaŭčym uzroŭni. Heta dazvolić narešcie prymianić zakon 2018 hoda, jaki zabaraniaje raźviadzieńnie sabak z «ekstremalnymi» rysami, ale jaki dahetul nie pracavaŭ z-za adsutnaści vyraznych kryteryjaŭ.
Kieneł-kłub, u svaju čarhu, choć i padtrymlivaje ideju, nastojvaje na bolšym udziele vieterynaraŭ u pracesie acenki, kab zrabić jaho bolš dakładnym dla zavadskich parodzistych sabak.
Ciapier čytajuć
Pamiatajecie kadeta, jaki na sustrečy z Łukašenkam śmieła vystupiŭ pa-biełarusku? Jon vyjechaŭ z krainy21
Kamientary