Jakija sabaki žyvuć daŭžej za astatnich? Akazvajecca, možna vyznačyć pa nosie
Usie sabaki traplajuć u vyraj. Ale buldoh moža apynucca tam raniej, čym bordar-terjer, piša The New York Times.
Novaje daśledavańnie, apublikavanaje ŭ časopisie Scientific Reports, pakazała, što maleńkija sabaki i sabaki z doŭhimi nasami žyvuć daŭžej, čym bolšyja abo sa spluščanaj pysaj. Taksama sabaki-samki žyvuć krychu daŭžej, čym samcy.
Z hetych ahulnych tendencyj jość vyklučeńni, i atrymanyja vyniki mohuć być nieprydatnyja da sabak za miežami Brytanii, dzie praktyka hadoŭli i hienafond mohuć być inšymi, źviartajuć uvahu navukoŭcy.
Daśledavańnie zasnavana na bazie danych pra amal 600 tysiač brytanskich sabak, jakuju daśledčyki sabrali z rejestraŭ parod, kampanij pa strachavańni chatnich žyvioł, vieterynarnych kampanij i inšych krynic. Navukoŭcy pryznajuć, što vyniki nie abaviazkova reprezientatyŭnyja dla ahulnaj papulacyi sabak Vialikabrytanii. Adnak pry hetym nielha nie pryznać maštabnaść praviedzienaj raboty.
Daśledčyki kłasifikavali ahulny pamier cieła kožnaj parody jak maleńki, siaredni ci vialiki, a formu hałavy — jak spluščanuju, siaredniepraparcyjanalnuju abo vyciahnutuju.
Va ŭsich sabak siaredniaja praciahłaść žyćcia składała 12,5 hadoŭ, ale siarod parod varjiravałasia «vielmi istotna».
Tak, naprykład, łankašyrskija chilery, paroda minijaciurnych sabak, žyli ŭ siarednim 15,4 hoda. Adnak značna bolšyja kaŭkazskija aŭčarki mieli siaredniuju praciahłaść žyćcia ŭsiaho 5,4 hoda.
U cełym drobnyja parody žyli ŭ siarednim 12,7 hadoŭ u paraŭnańni z 11,9 hadami dla bujnych parod.
Heta supadaje z papiarednimi daśledavańniami na sabakach, jakija pakazvajuć, što ŭnutry hetaha vidu bolš drobnyja asobiny majuć tendencyju pieražyvać bolš bujnych.
Parody z płoskaj pysaj, jakija jašče nazyvajuć brachicefaličnymi, žyli ŭ siarednim 11,2 hoda, a parody ź siaredniaj i doŭhaj pysaj mieli siaredniuju praciahłaść žyćcia 12,8 i 12,1 hoda.
Niekatoryja parody z płoskaj pysaj, naprykład francuzski buldoh, majuć šalonuju papularnaść. Ale ekśpierty papiaredžvajuć, što ich nadzvyčaj karotkija pysy mohuć pryvieści da prablem z dychańniem, ciepłavoha ŭdaru i inšych prablem sa zdaroŭjem.
U cełym drobnyja parody z doŭhim nosam, takija jak minijaciurnyja taksy i uipiety, žyli ŭ siarednim 13,3 hoda — prykładna na 2,5 hoda daŭžej, čym bujnyja parody z karotkim nosam, takija jak baksiory i bulmastyfy, jakija mieli siaredniuju praciahłaść žyćcia 10,7 hadoŭ.
Daśledčyki taksama vyjavili, što čystakroŭnyja sabaki mieli siaredniuju praciahłaść žyćcia 12,7 hadoŭ u paraŭnańni z 12 hadami ŭ sabak źmiešanaj parody. Hety vynik kidaje vyklik ahulnapryniatamu mierkavańniu pra toje, što sabaki źmiešanych parod zdaraviejšyja. Navukoŭcy kažuć, takaja pieravaha čystakroŭnych sabak supiarečyć papiarednim nazirańniam i moža być źviazana z tym, što padčas daśledavańnia ŭsich sabak — niezaležna ad pamieru abo parody — abjadnali ŭ adnu katehoryju.
Kab vyśvietlić, čamu ŭ niekatorych parod praciahłaść žyćcia karaciejšaja, čym u inšych, spatrebiacca dadatkovyja daśledavańni. Viadoma, što niekatoryja parody hienietyčna schilnyja da surjoznych prablem sa zdaroŭjem, ale na skaračeńnie žyćcia mohuć upłyvać i inšyja faktary, takija jak roźnica ŭ ładzie žyćcia, dyjecie i navakolnym asiarodździ.
«Ciapier, kali my vyznačyli hrupy sabak, jakim pahražaje rańniaja śmierć, my možam pačać vyśviatlać, čamu heta adbyvajecca», — kaža Kirsten Makmiłan, aŭtarka novaha daśledavańnia. «Heta daje nam mahčymaść palepšyć žyćcio našych sabak».
Kamientary
a jak u ludziej? bo taksama ž ličycca (ličyłasia), što ad źmiašanych brakaŭ bolš zdarovyja dzieci. i asabliva, maŭlaŭ, kali roźnica vialikaja samaja - kali z roznych ras. ale bačyła daśledvańnie, što kali i tak, to ŭ pieršym pakaleńni, a potym u naščadkaŭ prablemy sa zdaroŭjem pačynajuć tolki ŭzrastać