«Hety huk jak katavańnie vadoj — spać niemahčyma». Minčuk skardzicca na huł, jaki danosicca z padvała
Panelka na staličnaj vulicy Čkałava ničym nie adroźnivajecca ad sotniaŭ inšych. Kvatera Alaksandra taksama samaja zvyčajnaja. U hetaj trochpakajoŭcy 40‑hadovy mužčyna pražyvaŭ spačatku z baćkami, a ciapier žyvie z žonkaj i dačkoj. I ŭsio b ničoha, ale hod tamu raźmieranaje žyćcio było parušana dziŭnym hułam, jaki źjaviŭsia byccam z niadkul, — jak byccam pad padłohaj niechta ŭklučyŭ stary chaładzilnik i zabyŭ vyklučyć.
Akazałasia, hety huk vydaje cyrkulacyjny nasos sistemy aciapleńnia. Ciapier jak tolki batarei znoŭ stanoviacca haračymi, adzin z pakojaŭ puścieje, bo doŭha tam znachodzicca i tym bolš spać, pavodle słoŭ minčuka, niemahčyma, piša Onliner.by.
— Hety huk jak katavańnie vadoj. Zasnuć možna, ale potym padryvaješsia a pieršaj hadzinie nočy — i ŭsio. Kanapa vibruje, paduška dryžyć — vočy nie zapluščyć. I tak da samaj ranicy, — raspaviadaje Alaksandr i pravodzić u tuju samuju «katavalniu».
— Naohuł heta pakoj dački, ale ja pierabraŭsia siudy dva hady tamu, kali niepadaloku pačałasia rekanstrukcyja mosta. Časam pali zabivali navat nočču, tak što ja vyrašyŭ: chaj lepš dzicia vyśpicca, a ja paciarplu. Chutčej za ŭsio, z-za budoŭli ja moh nie zaŭvažyć šum z padvała, tamu jon moh być i raniej. Ale vyrazna ja jaho pačuŭ hod tamu, vosieńniu, kali nastupiŭ aciaplalny siezon, a ramont mosta zaviaršyŭsia.
Tady mužčyna i zrazumieŭ, što krynica hułu znachodzicca ŭ padvale doma: siamja žyvie na pieršym paviersie, tak što šukać pryčynu ŭ niaspraŭnaj technicy susiedziaŭ nie daviałosia. Akazałasia, što prablema ŭ cyrkulacyjnym nasosie sistemy aciapleńnia. Pryčym čuvać jaho ŭ adnym-adzinym pamiaškańni — u astatnich usio cicha. U žylcoŭ zboku taksama nijakaha šumu.
Žurnalisty hety huk taksama ŭłavili: varta tolki zamoŭknuć, jak źjaŭlajecca manatonny huł niabačnaha prybora, jaki ni na siekundu nie spyniajecca. Tak, heta nie hučnyja basy, a chutčej nizkačastotnaje dryžańnie, ale jano taksama moža razdražniać. Asabliva kali pravieści ŭ pamiaškańni niekalki hadzin.
U minułym hodzie Alaksandr kala miesiaca načavaŭ u hetym pakoi.
— Son staŭ pieraryvistym — pa dźvie-try hadziny, potym znoŭ pračynaŭsia ad vibracyj. Pastupova źjaviłasia biassońnica, razdražnialnaść, usio vakoł niervavała. Nie vytrymaŭ i źviarnuŭsia ŭ pryvatnuju kliniku: spačatku da psichaterapieŭta, potym da nieŭrołaha. Doktar pryznačyŭ kurs snatvornaha.
U listapadzie Alaksandra z pavyšanym ciskam, stenakardyjaj i išemijaj mijakarda zabrała chutkaja. Jon nie biarecca naŭprost źviazvać heta ź biassonnymi načami, ale pryznajecca: da źjaŭleńnia šumu takich prablem sa zdaroŭjem u jaho nie było.
— Pralažaŭ u BCHMD tydzień. Ničoha nie znajšli, prosta vyspaŭsia — i stała lahčej. Ale ciapier rehularna nazirajusia ŭ kardyjołaha — tak rekamiendavali ŭ balnicy.
Minčuk niekalki razoŭ źviartaŭsia ŭ miascovy ŽEU. U kvateru prychodziła kamisija — majstar učastka i santechnik.
— Spuścilisia ŭniz, adklučyli nasos — i adrazu stała cicha. Ale bieź jaho sistema aciapleńnia pracavać nie budzie, tak što ŭklučyli nazad. Adrazu ž viarnuŭsia i šum. I tak nikudy i nie źnik.
Tak praciahvałasia da viasny 2025 hoda. Biełarus nie vytrymaŭ i adpraviŭsia ŭ ŽEU asabista, dzie pakinuŭ zaŭvahu ŭ knizie skarhaŭ i prapanoŭ. Nieŭzabavie adtul pryjšoŭ adkaz — treba skazać, całkam aptymistyčny. Prablemu pryznali, ale ŭsio jašče nie vyrašyli, bo nie zmahli nabyć novy nasos.
U liście skazana, što situacyja praciahvaje znachodzicca na kantroli ŭ ŽEU № 1 Kastryčnickaha rajona. Adchileńnie ŭ hrafiku zakupak nieabchodnaha abstalavańnia źviazana z adsutnaściu ŭ pastaŭščykoŭ, ź jakimi supracoŭničaje arhanizacyja, nasosa, jaki całkam adpaviadaje nieabchodnym techničnym charaktarystykam.
U krasaviku Alaksandr atrymaŭ adkaz i z administracyi Kastryčnickaha rajona, kudy jon taksama paśpieŭ paskardzicca. Hety list uzradavaŭ jašče bolš: abstalavańnie ŭsio ž taki adramantavali.
«Zaraz praviedziena zamiena cyrkulacyjnaha nasosa na sistemie aciapleńnia ŭ ciepłavym vuźle žyłoha doma pa vulicy Čkałava», — zapeŭnili čynoŭniki.
Zdavałasia b, narešcie možna vydychnuć. Ale hetaj vosieńniu, jak tolki ŭ budynku ŭklučyli batarei, huł i vibracyja adnavilisia.
— Ja znoŭ źviarnuŭsia ŭ ŽEU. Tam adkazali, što nasos zamianili, a voś śpiecyjalista patrebnaj kvalifikacyi, jaki moh by jaho karektna naładzić, niama. Moža, niapravilna padabrali, moža, nie adkalibravali, a moža, jon prosta pracuje na znos. Tut ža patrebny zvyčajny inžynierny raźlik, ničoha składanaha. Heta ž nie CEC prajektavać! Ja sam inžynier pa adukacyi — chaj pakažuć abstalavańnie, ja pasprabuju razabracca! — u sercach kaža Alaksandr.
Pavodle jaho słoŭ, na čas aciaplalnaha siezona pamiaškańnie stanovicca nieprydatnym dla žyćcia i pustuje.
— Dačka śpić u baćkoŭskaj spalni razam z žonkaj, ja — na kanapie ŭ haścinaj. Ale ŭ mianie jašče i baćki jość, jany časam pryjazdžajuć ź vioski ŭ Minsk na miedycynski ahlad. Tady nam utraich davodzicca načavać u zale. Albo ja sam źjazdžaju ŭ ich domik pad Fanipalem. Maci i baćka ŭžo stareńkija, chutka nie zmohuć pastajanna znachodzicca za horadam. I što tady? Nam zastaniecca adzin pakoj na traich?
Viadoma, pazbaŭlacca traciny kvatery kožnuju vosień i zimu nikomu nie chočacca. Jašče i nie pa ŭłasnym žadańni. Kab razabracca ŭ situacyi, žurnalisty źviarnulisia pa kamientar u ŽEU №1 Kastryčnickaha rajona. Voś što tam adkazali:
«U sakaviku 2025 hoda ŭ ŽEU №1 źviarnuŭsia hramadzianin A. A. pa pytańni šumu ŭ kvatery. Pa vynikach abśledavańnia było pryniata rašeńnie ab nieabchodnaści zamieny cyrkulacyjnaha nasosa na sistemie aciapleńnia ŭ ciepłavym vuźle žyłoha doma pa vulicy Čkałava.
Raboty pa zamienie vyšejzhadanaj pompy byli vykananyja ŭ krasaviku 2025 hoda. Supracoŭnikami ŽEU №1 było praviedziena abśledavańnie kvatery hramadzianina A. A. dla vyznačeńnia najaŭnaści šumu ad pracy inžyniernaha abstalavańnia. Na momant abśledavańnia šum adsutničaŭ, što paćvierdziŭ ułaśnik kvatery (podpis akta abśledavańnia majecca).
U suviazi z paŭtornym zvarotam hramadzianina A. A. ab nieabchodnaści adrehulavać nasos rabotnikami ŽEU №1 pravodzicca šerah techničnych mierapryjemstvaŭ pa vyjaŭleńni krynicy šumu, u tym liku rehulavańnie nasosa.
Dadatkova nakiravany list u Centr hihijeny i epidemijałohii Kastryčnickaha rajona Minska ab nieabchodnaści zamieryć uzrovień šumu ŭ kvatery žychara».
Kamientary