Mužčyny i Łukašenka: biełarusy šukajuć vinavatych u demahrafičnaj katastrofie
Navina ab tym, što biełaruskaja žančyna ŭ siarednim naradžaje 1,1 dziciaci, a žycharka Minska — usiaho 0,6, vyklikała burnaje abmierkavańnie ŭ tyktoku. Ludzi pakinuli tysiačy kamientaryjaŭ. Ludzi vykazvajuć prapanovy i šukajuć vinavatych.
Samymi šmatlikimi i załajkanymi stali kamientary, pryśviečanyja finansavamu aśpiektu žyćcia. Karystalniki padkreślivajuć, što zarobak dazvalaje tolki isnavać, ale nie žyć, i ŭžo tym bolš nie vychoŭvać dziaciej.
Lidzirujučy kamientaryj nabraŭ bolš za 5200 łajkaŭ:
«U mianie ZP 1300. Na palito adkładaju miesiacami, a tut dzieci».
Ludzi ździŭlajucca rytorycy ŭładaŭ nakont naradžalnaści, kali zarobki i ceny nie pakidajuć vybaru: «Ceny bačyli? Na žyllo, na pradukty, na adzieńnie? Naradžać, kab što? Ja sa svajoj zarpłataj siabie ledź mahu prakarmić».
«Cha, jon [Alaksandr Łukašenka] ciapier skardzicca na naradžalnaść. Nie budzie norm zarobkaŭ, nie budzie i naradžalnaści. Patrebny ŭmovy dla žyćcia, a nie isnavańnie ad zarpłaty da zarpłaty».
«Mnie niama čym dziaciej karmić, chadzić na pracu pa 200+ hadzin za 1400 r, mnie ledźvie chapaje».
«Kata i sabaku ŭtrymlivać tańniej, čym dziaciej z našymi zarobkami».
Pra prablemy śviedčać i zamiežniki, jakija žyvuć u krainie: «Jak zamiežnik, jaki žyvie ŭ vašaj cudoŭnaj krainie 13 hadoŭ, mnie i žoncy ciažka siabie zabiaśpiečyć, nie toje što dzicia…».
Ludzi zaklikajuć: «Chaj padymuć ZP, kab realnyja ličby byli 2500-3000, i tady ludzi buduć razmnažacca».
«Adzin z asnoŭnych pryncypaŭ — žyłpłošča»
Nastupny klučavy faktar, jaki spyniaje ludziej ad baćkoŭstva, jak vynikaje z kamientaryjaŭ, — niemahčymaść nabyć žyllo pry nizkich zarobkach:
«Majmu synu 25! Kab uziać kredyt na žyllo, jon pavinien atrymać 5000 rubloŭ, a jaho zarobak u Minsku 1200!!! Surjozna vy dumajecie, što jon zachoča dziaciej???!!!»
«Z arendnym žyllom i adno dzicia šmat».
«Dajcie kvateru, ci chacia b dobry pracent źnižki na ipateku… Ja na zdymnaj naradžać nie źbirajusia».
«Nu dyk adzin z asnoŭnych pryncypaŭ — heta žyłpłošča. Kab chacieć zavodzić dziaciej, treba być upeŭnienymi ŭ tym, što dziciaci budzie dzie žyć. Kupla ž žylla zaraz — heta litaralna kabała biez nadziei».
«U Minsku 0,6, tamu što samy darahi kvadratny mietr pa krainie. Na ježu ZP chapaje, a na žyllo — nie».
Vysnova adnaznačnaja:
«Biez dastupnaha žylla i havorki nie budzie ab demahrafii. Zapomnicie».
«Mužčyny stali nienadziejnyja»
Častka kamientataraŭ sfakusavała ŭvahu na roli mužčyny ŭ siamji, adznačajučy, što prablema nie tolki ŭ zarobkach, ale i ŭ adsutnaści nadziejnaści ŭ partnioru.
«Za naradžeńnie dziciaci adkaznaja žančyna. Ale jana nie choča naradžać, kali nie ŭpeŭnienaja. I hetaja niaŭpeŭnienaść u pieršuju čarhu — u mužčynie! Pahladzicie, kolki razvodaŭ! Ich takaja kolkaść, bo nie žadajuć ciarpieć toje, što ciarpieli ŭ byłyja časy. A kolki ŭchilistaŭ ad alimientaŭ? Voś jak žančynie rašycca na rody, kali jana nie ŭpeŭnienaja, što ŭ dekrecie nie stanie prasiačaj-umolnaj?
Pabyvaŭšy adzin raz u zaležnym biaspraŭnym stanoviščy, sto razoŭ padumaješ, ci chočaš ty tudy viarnucca. Niezdarma siarod žančyn isnuje iścina: «Treba naradžać hetulki dziaciej, kolki SAMA zmožaš padniać!».
Niechta ličyć, što prablema ŭ infantylnaści mužčyn, jakija nie žadajuć zabiaśpiečvać siamju:
«Prablema nie tolki ŭ nizkich zarobkach u mužčyn i adsutnaści žylla. Zabieśpiačeńnie siamji — mužčynskaja zadača. A jany ŭ siłu svajoj biezadkaznaści i infantylnaści nie imknucca zarablać, niejak varušycca, kab kvatera była i hetak dalej. Im, naprykład, i ŭ kvatery z mamaj dobra. Tolki žančyna ŭ takich umovach naradžać nie moža.
Mužčyna pavinien nie na kanapie lažać, a ciažka pracavać. Usie maje znajomyja dziaŭčatki chto na dźviuch pracach, chto paśla pracy pa viečarach druhuju vyšejšuju atrymlivajuć abo kursy prachodziać, imknucca, varušacca rabić usio, kab dabicca dla siabie biaśpieki, kab stabilnaść u pracy była.
A hetym maminych kašołačkam ničoha nie treba, ich zadavalniaje za 1200, bo mama, kali što, hałodnym nie pakinie i nakormić za svoj košt. Mužyk, jaki abjadaje navat svaju maci, nie moža stać aporaj dla žančyny, kab jana naradziła. Jon ža i dzicia abjadać budzie. A kolki mužčyn kidajuć siemji??? Mužčyny stali nienadziejnyja, jak ad ich naradžać?».
«Žyviom jak na vułkanie»
Siarod pryčyn nizkaj naradžalnaści ludzi nazyvajuć represii i niaŭpeŭnienaść u budučyni.
«Kab naradžalisia dzieci, patrebnaja stabilnaść i ŭpeŭnienaść u zaŭtrašnim dni, a jaje niama, tamu adzin i dumaješ, kab pajechać lepšaha žyćcia šukać».
«Niama stabilnaści — niama dziaciej! Navat nie ŭ najaŭnaści žylla i kolkaści hrošaj sprava! Žyviom jak na vułkanie! Nie viedaješ, z čym zaŭtra pračniešsia!»
Niekatoryja zaŭvažajuć:
«Zatoje pa kolkaści palitviaźniaŭ pieršaje miesca ŭ śviecie». I hety kamient sabraŭ sotni łajkaŭ.
Kiepskaja miedycyna
Adna z karystalnic źviarnuła ŭvahu na prablemy ŭ śfiery achovy zdaroŭja, jakija taksama spyniajuć žančyn:
«Usie havorać pra hrošy, a ja zakranu temu pra našy raddamy, chiba z takim staŭleńniem miedpiersanału i takoj miedycynaj, dzie tolki b dastać. A pakalečać ci nie, heta ŭžo nie važna. Nikoha nie chvaluje, na jakija hrošy vy potym budziecie lekavać dziaciej i siabie. Viedaju šmat ludziej, u pryvatnaści, z Homiela, što paśla raddoma i čystak staviać dyjahnazy biaspłodździa, i chadzi lačy sama PŁATNA».
«Niachaj naradžajuć čynoŭniki»
Asobnuju hrupu kamientaroŭ składajuć zaŭvahi ab tym, kab układ u vyrašeńnie prablemy ŭ pieršuju čarhu rabili čynoŭniki:
«Chaj čynoŭniki i razmnažajucca, u ich, u adroźnieńnie ad nas, śmiarotnych, usie ŭmovy stvorany. I nie pa adnym dziciaci, a minimum piać».
«Čym lepš ludzi žyvuć, tym mienš jany chočuć naradžać»
Akramia krytyčnych zaŭvah, prysutničajuć taksama kamientaryi, aŭtary jakich davodziać, što naradžalnaść nizkaja va ŭsich sučasnych hramadstvach:
«Užo daŭno dakazany fakt, što čym vyšejšy IQ nasielnictva, tym nižejšaja naradžalnaść».
«Čym lepš ludzi žyvuć, tym mienš jany chočuć naradžać. Heta statystyka. Pahladzicie indeks fiertylnaści pa śviecie, i vy ździviciesia. Samy vysoki ŭ Afrycy».
«Čym mienšaja naradžalnaść, tym bolš raźvitaja kraina».
«Jak va ŭsich raźvitych krainach».
Niekatoryja davodziać, što ŭ Biełarusi situacyja nie samaja horšaja:
«Pahladzicie ličby naradžalnaści ŭ śviecie, i daviedajeciesia, što ŭ nas jašče nie tak drenna. U Karei dzicia heta nakštałt adzinaroha».
Jość i tyja, chto spasyłajecca na minułaje i abvinavačvaje sučasnuju moładź, jakaja ŭ lepšych umovach nie choča naradžać:
«Usio chłuśnia. Raniej žyli pa siem čałaviek u dvušcy i byli ščaślivyja. A ciapier usio vam daj, usio padaj. Pracavać idzicie, a nie patrabujcie».
A jašče adzin čałaviek zadumaŭsia ab pierśpiektyvach piensijnaha zabieśpiačeńnia tych, chto ciapier nie choča naradžać:
«Adno pytańnie. Jak budziem piensii za 20‑30 hadoŭ płacić?».
Pradstaŭnica Akademii navuk raskryła ŭzrovień naradžalnaści ŭ Biełarusi. Jon žachliva nizki
Kačanava: Kab narmalna žyć, treba pracavać i naradžać. Pahladzicie na Uźbiekistan
Jak biełarusy adreahavali na tydniovuju zabaronu abortaŭ
Biełarusy ŭ sacsietkach aburajucca, što dekretnicam nibyta płaciać bolš, čym tym, chto chodzić na pracu
Čamu ŭ Biełarusi imkliva padaje naradžalnaść?
Ciapier čytajuć
Jak u halečy śpivałasia radnia Łukašenki? Małaviadomyja fakty19
Kamientary
Pierśpiektiv, dla dietiej, niet nikakich....