Dyrektarka turfirmy nie paznała biełaruskuju movu, kali vinšavała z Dniom jadnańnia Biełarusi i Rasii. I praciahvaje siabie zakopvać
Iryna Duboŭskaja, dyrektarka turfirmy «Na vyšyni», pakazała ŭ Threads, jak upryhožany Minsk da Dnia jadnańnia Biełarusi i Rasii. U kamientarach spytali pa-biełarusku, ci ŭpryhožana tak Maskva.
Iryna apublikavała ŭ Threads fota i videa, zroblenyja la Pałacu respubliki ŭ Minsku. Na im bačnyja kampazicyi sa ściahoŭ u čyrvona-zialonych i bieła-sinie-čyrvonych kolerach.
«Nu što, Biełaruś i Rasija. Z Dniom jadnańnia nas. Minsk upryhožany i hatovy da śviata», — napisała dyrektarka turfirmy «Na vyšyni».
Samy papularny kamientar pad dopisam nabraŭ 235 łajkaŭ. I jon taki: «Bačyli, kab u Maskvie takoje rabili ŭ hetyja dni? Prosta na padumać».
Iryna nie zrazumieła, što kamientar hety napisany na biełaruskaj movie, i adkazała na ruskaj: «Ja nie viedaju vašu movu. Pišycie na biełaruskaj ci ruskaj».
U chutkim časie jana, vidać, zrazumieła, što publična raśpisałasia ŭ svajoj nieadukavanaści i vydaliła svoj kamientar.
Ale skrynšoty pajšli hulać pa sacsietkach i źbirać aburanyja kamientary. Niechta prychodzić u kamientary da samoj Iryny, kab davieści joj absurdnaść situacyi.
Dyrektarka turfirmy reahuje davoli ahresiŭna. Svoj biazhłuzdy kamientar jana sprabuje rastłumačyć tak: «Vybačajcie. Ja nie čytaju ŭvažliva paviedamleńni ŭ sacyjalnych sietkach. Kali baču chejt, prosta pasyłaju».
Iryna ličyć, što ŭsie niehatyŭnyja kamientary pišuć boty Śviatłany Cichanoŭskaj (demakratyčnuju lidarku Iryna nazyvaje chatniaj haspadyniaj).
Zhadvaje jana i svaje kryŭdy na 2020 hod, raspaviadajučy historyi ŭzroŭniu fejka pra raśpiataha chłopčyka: «Byŭ 2020. Maja kampanija zmahałasia z pandemijaj i sankcyjami suprać čempijanatu śvietu. U vyniku jaho pieranieśli ŭ Ryhu. Vielmi šmat tady stracili finansava. A potym mnie pačali pahražać, što puściać pa kole maju 15‑hadovuju dačku (jana ž u ciabie pryhažunia. Tak, jana ŭ mianie pryhažunia). Tamu na 6‑m tydni ciažarnaści ja straciła jaje bracika/siastryčku. Z ofisa mianie zabrała chutkaja, i hałasavała ŭ balnicy paśla dźviuch apieracyj. A potym adepty «chatniaj haspadyni» jašče paŭhoda isteryli ŭ mianie pad voknami».
Treba adznačyć, što čempijanat śvietu pa chakiei ź Minska ŭ Ryhu pieranieśli ŭžo paśla vybaraŭ-2020, a nie da jaho, jak u historyi žančyny.
Na dasiahnutym žančyna nie spyniajecca. Jana pryśviaciła skandału novy dopis: «Ja raźvivaju pryhažość i haścinnaść svajoj rodnaj krainy. A boty chatniaj haspadyni zaminajuć. Jak reahavać na ludziej, u jakich ničoha nie atrymałasia i jany sprabujuć za*ć pryvatny biznes u Biełarusi?».
Na pytańnie, što ž moža raspavieści čałaviek, jaki navat movy svajoj nie viedaje, Iryna pasprabavała adkazać na biełaruskaj — ale atrymałasia chiba na dvojku pa dziesiacibalnaj sistemie: «Nu davajtie parazmaulajem pa biełaruski. Tolko vriad li vy jaho viedajecie».
Na znakamituju cytatu Kastusia Kalinoŭskaha pra toje, što narod Biełarusi zažyvie ščaśliva tolki tady, kali nad im nie budzie maskala, Iryna znoŭ adreahavała na trasiancy: «Nu Kalinovskij davno v mohile. A my živiom zdieś i siejčas. I točno jeho pozirki mimo. Stranno ssyłaťsia na mnienije ludiej, kotorych davno niet».
Šmat chto z kamientataraŭ spadziajecca, što Iryna nasamreč rasijanka, jakaja žyvie ŭ Biełarusi — tamu i nie moža raspaznać biełaruskuju. Ale ž nie.
Iryna vučyłasia ŭ licei ŭ Navapołacku, potym skončyła Połacki dziaržaŭny ŭniviersitet imia Jeŭfrasińni Połackaj. Z 2001 pa 2009 hod jana pracavała ŭ Navapołackim harvykankamie.
Potym było 7 hadoŭ pracy ŭ «Elektrasile» i dva hady ŭ pryvatnym miedcentry «Łade» (na pasadzie kiraŭnika adździeła pa pracy z klijentami). U 2018 hodzie Iryna zasnavała turfirmu «Na vyšyni».
U 2021 hodzie jana publikavała ŭ sacsietkach fotazdymki z aŭtaprabiehu ŭ padtrymku Łukašenki.
Iryna lubić raźmiaščać videa, u jakich ździekujucca z uładaŭ krain Jeŭrasajuza — u pryvatnaści, Litvy.
Iryna taksama źjaŭlajecca siabroŭkaj pieršasnaj arhanizacyi žančyn-pradprymalnic Minska. Letaś u kastryčniku žančyna publikavała fotazdymki z łukašenkaŭskaha Pałacu Niezaležnaści.
Pieryjadyčna byłaja supracoŭnica vykankama pryznajecca ŭ lubovi da dyktatara: «Da 2020 hoda ja vaziła turystaŭ u Jeŭropu i Ukrainu. Uvohule, pad hetyja napramki ja i adkryła biznes. I 2019 byŭ varjackim u dobrym sensie hetaha słova. Tysiačy turystaŭ — i ŭsie ŭdziačnyja. U 2020 mnie vyrazna abaznačyli: abo tvoj prezident — chatniaja haspadynia z hetym cudam błochieram i adkrytyja miežy (parahatała), abo Łukašenka, zakryćcio miežaŭ, straty ŭ biznesie. Kožny, chto mianie viedaje, viedaje, što ja vybrała straty ŭ biznesie. U 2020 my vybrali našu Biełaruś. Siońnia suprać «Biełavija» źniali sankcyi, Baćku prezident ZŠA doryć zapinki, z Rasijaj i Kitajem my siabry. A my zachavali svaju krainu i «kości». A jak «miasa» naraścić — my viedajem. Z čarhovaj Pieramohaj, maja lubimaja».
Ciapier Iryna vozić hrupy ŭ Rasiju i inšyja biaźvizavyja dla biełarusaŭ krainy (ale sprabuje rabić niešta i praź Jeŭropu).
Naprykład, letaś 9 maja jana fatahrafavałasia z turystami ŭ Tulskim muziei zbroi — tam tady jakraz išła «patryjatyčnaja» akcyja: naviedvalnikam prapanoŭvali napisać list z samymi ciopłymi pažadańniami «Zaŝitnikam Otiečiestva».
Pry hetym mara na 2026 hod u Iryny źviazanaja z Hiermanijaj. Žančyna raspaviadaje, što vielmi spadziajecca sioleta trapić u znakamity zamak Nojšvanštajn.
«Chachłuša kanał viadzie». Fanatka Łukašenki abraziła ŭkrainku i palivaje brudam Litvu, dzie sama pracuje
«U nas usie razmaŭlajuć na ruskaj movie». Dziciačy centr nie ŭziaŭ na pracu žančynu, bo jana razmaŭlaje pa-biełarusku
Biełarusy staviać adnu zorku dziciačamu centru, jaki trapiŭ u skandał ź biełaruskaj movaj
Ciapier čytajuć
Rasijski pradaviec paśpiachovaha pośpiechu pasprabavaŭ adkryć filijał u Minsku. Reakcyja biełarusaŭ była pakazalnaj7
Rasijski pradaviec paśpiachovaha pośpiechu pasprabavaŭ adkryć filijał u Minsku. Reakcyja biełarusaŭ była pakazalnaj
«Miesiacami ŭ kabinie, na siabie zabiŭ. I staŭ pytać: moža, žonka taksama budzie pracavać?». Čamu emihracyja raźbivaje siemji i što rabić, kab usio papravić3434
Kamientary