Rasijski pradaviec paśpiachovaha pośpiechu pasprabavaŭ adkryć filijał u Minsku. Reakcyja biełarusaŭ była pakazalnaj

U rasijanina Michaiła Hrabianiuka reputacyja nieadnaznačnaja: niechta ličyć jaho hienijalnym biznes-trenieram, a niechta čarhovym machlarom, jaki pradaje paśpiachovy pośpiech.

ŚMI paviedamlali, što Michaił naradziŭsia ŭ padmaskoŭnaj Bałašysie ŭ siamji majora FSB. Baćka maryŭ, kab syn pastupiŭ u akademiju FSB i taksama staŭ vajskoŭcam, ale chłopiec abraŭ inšy šlach. Jon doŭha zajmaŭsia spartyŭnymi balnymi tancami, zajmaŭ pryzavyja miescy na čempijanatach Jeŭropy, a potym pastupiŭ u piedahahičny instytut i vyvučyŭsia na nastaŭnika historyi. Pa prafiesii adpracavaŭ dva hady, a potym pasprabavaŭ raspačać niejki biznes.

Ciapier ža Michaił Hrabianiuk vučyć inšych zarablać šalonyja hrošy. Na jaho YouTube-kanale pieryjadyčna vychodziać videarazbory. Robiacca jany tak: Michaił pryjazdžaje ŭ niejki horad, ładzić sustreču pad kamierami ź niejkim miascovym biznesoŭcam i na vačach publiki raźbiraje składanyja dla surazmoŭcy pytańni jaho biznesu. I zaadno pradaje svaje kansultacyjnyja pasłuhi pa stvareńni adździełaŭ prodažaŭ.

Padčas čarhovaha razboru ŭ Čalabinsku Michał raspavioŭ pra svoj pravał u Minsku (imavierna, havorka idzie pra 2018 hod — mienavita tady biznes-trenier ładziŭ piersanalny treninh u biełaruskaj stalicy).

Pa słovach Michaiła, adnojčy jon vyrašyŭ, što jaho kampanija pavinna być mižnarodnaj, i adkryŭ pieršy filijał u Minsku.

— Ja znajšoŭ čuvakoŭ-partnioraŭ, jakija sabrali ludziej na moj majstar-kłas u Minsku. U Biełarusi, dzie kožny treci žychar — heta milicyjanier, a nie pradprymalnik. Pa statystycy tam kožny treci siłavik, nu, moža, kožny čaćviorty. Dzie ŭsio nasielnictva jak maskoŭskaje Čartanava. To-bok usio nasielnictva Biełarusi — 10 miljonaŭ čałaviek, a nasielnictva tolki Maskvy — 25‑30 miljonaŭ. I jašče ekanamična na dušu nasielnictva vy razumiejecie, jakaja roźnica — Maskva ci Rasija i Biełaruś.

Atrymałasia pradać kala 300 kvitkoŭ. Śpikier płanavaŭ, što jak zaŭsiody lohka pradaść sa sceny svaje inšyja infa-pradukty, ale ŭsio pajšło nie pa płanie.

— Spačatku ja kažu: «Biełarusy, padymicie ruku, chto zarablaje bolš za miljon čystaha prybytku štomiesiac» (napeŭna, havorka idzie pra rasijskija rubli. U 2018 hodzie heta było kala $15 tysiač — NN). I nichto nie padniaŭ. Nie tamu, što jany nie zarablajuć. A tamu, što jany na takija pytańni nie adkazvajuć nikoli. Nidzie. Ad hrachu dalej.

Kaža, što pytańni, pra prybytak u 500 tysiač i 2 miljony rubloŭ (adpaviedna, $7500 i $30 tysiač na miesiac — NN) taksama zastalisia biez adkazaŭ. A kali trenier pacikaviŭsia, chto ž z prysutnych biznesoŭcaŭ choča mocna vyraści, jamu padałosia, što ludzi naadvarot jašče i schavali ruki.

— Karaciej, heta byŭ samy tupy majstar-kłas u maim žyćci. Heta byŭ poŭny pravał. Ja raspalvaŭ boli, emocyi, prezientacyja… Śpiecprapanova: pieršym biełarusam źnižka na start pracy z našym adździełam prodažu… Źnižka, možna pajści aformić. Kali ja tak rabiŭ u Rasii, ludzi išli i kuplali. Unosili pieradapłatu, imknulisia pieršyja 20 pakietaŭ kupić…

Ale ŭ Minsku nichto nie padniaŭsia sa svajho miesca, kab skarystacca takoj prapanovaj. Michaił uspaminaje, jak jon staić na scenie, 300 čałaviek hladziać na jaho z uśmieškaj, a supracoŭniki za stałami stajać i čakajuć niečaha. Trenier uzdychnuŭ i skazaŭ: «Nu voś takaja prapanova ŭ nas jość…». Publika adreahavała cichim śmiecham.

— I ja zakryŭ filijał u Biełarusi.

@sergey_zhushma

Vot osnovnaja problema biełorusskoho priedprinimatiela, a nie vniešnije usłovija

♬ orihinalnyj zvuk - Sierhiej Žušma

Na hetaje videa Hrabieniuka źviarnuŭ uvahu biełaruski tyktokier Siarhiej Žušma, jaki sprabuje pajści šlacham Michaiła. Siarhiej nazyvaje siabie lidaram biznes-kłuba «Anamalija» (heta pradukt Hrabieniuka) u Biełarusi. I sam užo abiacaje «pierasabrać myśleńnie pradprymalnikaŭ i madel biznesu».

Siarhiej cikavicca ŭ svaich padpisčykaŭ: «U čym asnoŭnaja prablema biełaruskich pradprymalnikaŭ?». Ale asablivaha entuzijazmu ŭ kamientarach nie nazirajecca.

Navat prychilniki Hrabieniuka ličać, što jaho dośvied nie kacirujecca ŭ Biełarusi: «Kali niechta niedzie paśpieŭ zarabić, nikoli nie raspaviadzie, jak kankretna i dzie».

A niechta žartuje, što hałoŭnuju prablemu Michaił adrazu i ahučyŭ: «Statystyka pra kožnaha treciaha žychara».

• 2
• 1
• 61
• 8
• 0
• 0
• 0
• 0