Na miažy z Ukrainaj pačynajecca novy etap budaŭnictva vajskovaha palihona
U Homielskaj vobłaści ŭ niepasrednaj blizkaści ad miažy z Ukrainaj rychtujecca novy etap maštabnaha budaŭnictva vajskovaha abjekta. Abvieščany tendar nie źmiaščaje padrabiaznaj dakumientacyi, adnak «Fłahštok» identyfikavaŭ hety prajekt jak novy vajskovy palihon. Ahułam na jaho vydatkujuć 400 młn rubloŭ.
Na miažy z Ukrainaj pačynajecca novy etap budaŭnictva vajskovaha palihona
AAT «Homielski domabudaŭničy kambinat» abviaściŭ bujny tendar na sumu amal 65 młn 830 tys. rubloŭ (bolš za 22,3 młn dołaraŭ). Farmuloŭka zakupki hučyć tak: vybar subpadradnaj arhanizacyi na vykanańnie rabot pa budaŭnictvie abjekta «Budaŭnictva abjekta ŭ Homielskaj vobłaści. Inžynierna-transpartnaja infrastruktura».
Što za zahadkavy abjekt — nie ŭdakładniajecca. Bolš za toje, da tendara nie prymacavana nijakaja dakumientacyja. Ale, jak vyśvietliŭ «Fłahštok», mienavita Homielski DBK zajmajecca budaŭnictvam vajskovaha palihona ŭ Rečyckim rajonie i nazyvaje jaho ŭ zakupkach mienavita jak «abjekt», stvarajučy sakretnaść vakoł uźviadzieńnia palihona.
Terminam pastaŭki pasłuh paznačany pieryjad z 7 krasavika 2026 pa 15 krasavika 2027 hoda.
Heta značyć, što na praciahu hoda subpadradčyk pavinien uźvieści inžynierna-transpartnuju infrastrukturu: darohi, elektra– i vodazabieśpiačeńnie, a taksama inšyja kamunikacyi.
Jak raspaviadaŭ «Fłahštok», Dziaržaŭnaj inviestycyjnaj prahramaj u 2026 hodzie na budaŭnictva palihona vydzielena 15 młn rub., a ŭ 2027 i 2028 hadach jašče pavinna być vydzielena 150 młn i 245,7 młn adpaviedna.
Palihon źjavicca ŭ rajonie stancyi «Jakimaŭka» ŭ Rečyckim rajonie — zaraz rychtujecca placoŭka pad jaho budaŭnictva, tam siakuć i karčujuć drevy.
Jak vidać na spadarožnikavych zdymkach, u kancy sakavika praciahvali siačy prosieki. Ad stancyi da palihona bačna vydaleńnie dreŭ na niekalki dziasiatkaŭ mietraŭ ad darohi.
Kamientary