Viktar Kalina zajaviŭ, što nikoli nie nazyvaŭ Łukašenku tarakanam
Skandalna viadomy śpiavak Viktar Kalina zapisaŭ videazvarot, u jakim zajaviŭ, što padtrymlivaje Łukašenku, ale pry hetym nie źjaŭlajecca «jabaćkam». A ŭ tym, što režym u Biełarusi stavicca da jaho kiepska, abvinavaciŭ Natallu Kačanavu, zaŭvažyŭ telehram-kanał «Vitiebsk, ja hulaju!»
U svaim zvarocie Kalina zajaviŭ, što padtrymlivaje Łukašenku, ale nie źjaŭlajecca «jabaćkam», bo apošnija — heta, maŭlaŭ, fanatyki. Prytym «časta siarod jabaciek prysutničajuć kryvadušniki i zakanśpiravanyja vorahi. Čym hučniej kryčać, tym značniejšaj budzie ich zdrada».
Prablemy, jakija jon maje ŭ Biełarusi, Kalina adličvaje z 2020‑ha hoda i źviazvaje ź dziejnaściu «nacyjanalistaŭ», u tym liku na dziaržaŭnym uzroŭni. Hałoŭnym vinavatym u svaich biedach skandalny šansańje ličyć Natallu Kačanavu.
Što da Łukašenki, to Kalina śćviardžaje:
«Ja nikoli jaho nie abražaŭ. Nie było takich słoŭ jak «tarakan» i inšaje. … Ja dvojčy pisaŭ u administracyju prezidenta i navat publična paprasiŭ prabačeńnie. I navat nie adzin raz».
Nasamreč prablemy ŭ ciapierašniaha hramadzianina Rasii Viktara Kaliny, jaki ŭ svoj čas pa papularnaści kankuravaŭ z Saładucham, u Biełarusi pačalisia zadoŭha da 2020 hoda, i nie zaŭsiody hetamu byli pryčynaj niejkija idejnyja razychodžańni. 5 studzienia 2007 hoda Kalina byŭ aryštavany, a 12 červienia 2007 hoda jaho razam z žonkaj Śviatłanaj asudzili za sprobu ažyćciaŭleńnia machlarstva ŭ asabliva bujnym pamiery. Viktar atrymaŭ piać hadoŭ i šeść miesiacaŭ źniavoleńnia ŭ kałonii ŭzmocnienaha režymu, a Śviatłana — čatyry hady i šeść miesiacaŭ u kałonii ahulnaha režymu. Praŭda, pravioŭšy amal dva z pałovaj hady ŭ kałonii, Kalina byŭ vyzvaleny 29 maja 2009 hoda pa amnistyi.
Paśla taho prablemy ŭźnikali z-za taho, što jahonaja prarasijskaja pazicyja była praźmiernaj navat u vačach režymu Łukašenki. Paśla 2014 hoda Kalina aktyŭna i publična padtrymlivaŭ sieparatystaŭ na Danbasie, sproby arhanizacyi jahonych kancertaŭ u roznych rehijonach vyklikali pratesty z boku hramadskaści, da jakich, jak ni dziŭna, niaredka prysłuchoŭvalisia i ŭłady, pad roznymi adhavorkami nie dajučy dazvołu na mierapryjemstvy.
U 2020‑m Kalina niečakana padtrymaŭ pratesnuju aktyŭnaść i navat na svaim smalenskim chutary vyviesiŭ bieł-čyrvona — bieły ściah-praŭda, užo ŭ nastupnym hodzie jaho prybraŭ (ciapier tam visić čyrvona-zialony ściah). I zatym šmat razoŭ, jak jon sam pryznajecca, prasiŭ prabačeńnia ŭ svaich prychilnikaŭ za pratesnuju słabaść.
Ale heta ŭsio adno nie dapamahło Kalinu viarnucca na kancertnyja placoŭki Biełarusi, choć, vidać, takoje žadańnie jaho nie pakidaje. U kamientary da svajho videa jon rassypajecca ŭ kamplimientach Łukašenku:
«Ja całkam padtrymlivaju rašeńni Alaksandra Ryhoraviča Łukašenki. Mierkavańnie źmianiłasia ŭ 2021 hodzie, kali ŭbačyŭ zusim inšaha čałavieka, a samaje hałoŭnaje siabra i sajuźnika Rasii… Ja nie jabaćka, ale pavažaju hetaha čałavieka, navat niahledziačy na ŭsie minułyja kryŭdy, choć ja i maja siamja pieraśledujucca ŭładaj, choć ja całkam zabaronieny. Ja daŭno jaho prychilnik, i heta liču hałoŭnym».
Pry hetym i Pucin dla jaho zastajecca «najvialikšym z usich lidaraŭ, jakija kali-niebudź isnavali ŭ Rasii».
U KDB danieśli navat na Viktara Kalinu
Viktar Kalina: My — jeŭrapiejcy. Ja vieru Cichanoŭskaj
«Ludzi amal dajšli da žabractva», — Viktar Kalina raspavioŭ pra admienu kancerta ŭ Dokšycach i pravierku KDB
Viktar Kalina: Ja napisaŭ himn «My ruskija, z nami Boh», a mianie ni za što źbili rabotniki rasijskaj kałonii
Žychary Vilejki sabrali 650 podpisaŭ za admienu kancerta Viktara Kaliny. Ale Pałac kultury pakul nie zdajecca
Viktar Kalina prosić Łukašenku abaranić jaho ad «apazicyi, radykałaŭ i banderaŭcaŭ»
Ciapier čytajuć
Ceny na paliva pavyšajucca na 4 kapiejki, a praz tydzień jašče na try2
Kamientary